«Majstar pryjšoŭ i paprasiŭ vydalić videa z tyktoku». U Mahilovie na dachu šmatpaviarchovika ŭtvaryŭsia vialiki basiejn
Miascovyja žychary kažuć, što prablemie ź liŭnioŭkami nie adzin hod, vada zalivaje kvatery, ale nichto ničoha z hetym nie moža zrabić.
Na dachu dzieviacipaviarchovika pa Dniaproŭskim bulvary ŭ Mahilovie ŭtvaryŭsia sapraŭdny basiejn. Tam zabiłasia liŭnioŭka, i vady nabrałasia vidavočna vyšej, čym pa kalena.
Adzin z žycharoŭ kaža, što prablemie ŭžo 3-4 hady. Paśla mocnych daždžoŭ zvyčajnaja panelka pieratvarajecca ŭ «elitnaje žyllo» z basiejnam na dachu. Ale ludziam nie da śmiechu: vada ŭ vyniku zatoplivaje kvatery. Kamunalniki nie mohuć z hetym ničoha zrabić, ale prosiać vydalać videa z tyktoka.
«Prablema praciahvajecca ŭžo 3-4 hady. Try hady my svarylisia i zmahalisia, kab nam źmianili dach, u kvatery padčas daždžoŭ byŭ vadaspad. Było vydatkavana šmat sił, času i hrošaj na adnaŭleńnie ramontu ŭ kvatery. Ciapier z-za nieprachodnaści liŭnioŭki na dachu pastajanna źbirajecca «basiejn», — napisaŭ miascovy žychar.
Jaho videa sabrała bolš za 450 tysiač prahladaŭ u tyktoku. I spravaj zacikaviłasia vydańnie «Mahiloŭ Onłajn». Kali žurnalisty prybyli na miesca, vadu z dachu ŭžo adkačali. Ale jana znoŭ zatapiła kvatery.
Žychar adnoj z kvater Pavieł raspavioŭ, što prablema pačałasia jašče ŭ 2021 hodzie.
«U tym hodzie napiaredadni Novaha hoda byli daždžy. Naš dach nie vytrymaŭ nahruzki i puściŭ vadu. Była vyklikana avaryjnaja słužba, jakaja prosta raźviała rukami i skazała: čakajcie pakul projduć daždžy. U vyniku praciakała až da siaredziny studzienia», — uspaminaje mahiloviec.
Ludzi skardzilisia ŭ roznyja instancyi, ale ŭ adkaz im raili čakać, pakul usio samo prasochnie. Adnak asadki majuć zvyčku vypadać znoŭ i znoŭ na praciahu hoda. I dobra, kali b pakutavaŭ tolki adzin dach, ale vada išła ŭ kvatery na vierchnim paviersie, psavała ramonty i meblu, u žylli ŭtvarałasia ćvil. U vyniku žychary doma pakutavali ad hetaj prablemy niekalki hadoŭ.
U vieraśni 2023 hoda ŭ domie pačali ramantavać dach i liŭnioŭki. Paśla rabot usio supakoiłasia: vada pierastała praciakać u kvatery. Adnak nienadoŭha. Na dniach utvaryŭsia toj samy «basiejn na dachu», a zatym vada znoŭ pajšła ŭ kvatery.
«U piatnicu, 20 červienia, adbyłosia žachlivaje: znoŭ pačało zalivać. Viečaram paśla pracy ja zajšoŭ u kvateru i adrazu adčuŭ pach «mokrych ścien». Pačaŭ ahladać kvateru i byŭ u žachu — zaliło kuchniu, kalidor, dva žyłyja pakoi…» — kaža Pavieł.
Za vychodnyja, 21 i 22 červienia, pa słovach mahiloŭca, na miesca pryjazdžali śpiecyjalisty, jakija sprabavali pačyścić liŭnioŭku, ale biez vyniku. Skazali čakać rabočych, jakija adkačajuć vadu pompaj.
«U vychodnyja nichto nie pryjazdžaŭ, praciok uzmacniŭsia, uskočyŭ łaminat u žyłym pakoi, pravisła naciažnaja stol, stała zboić elektryka i pravodka ŭ kalidory i ŭ žyłym pakoi. U paniadziełak ranicaj pryjšoŭ majstar pa ŭčastku, acaniŭ kvateru i paprasiŭ vydalić videa z tyktoku, na što my adkazali admoŭna.
Ale samaje cikavaje, što z 9:00 da 15:30 (za 6 z pałovaj hadzin) nichto z ramontnikaŭ tak i nie pryjšoŭ, uvieś hety čas vada praciahvała pastupać da nas u kvateru. Zatym dach ačyścili ad vady, zamianiŭšy kalena liŭnioŭki.
U starym kalenie byli bułyžnik i niejkaje śmiećcie, jakoje zaminała pravilnaj pracy liŭniovaj kanalizacyi. Usia vada paśpiachova rušyła ŭ padvały žycharoŭ i zatapiła ich», — raspaviadaje Pavieł.
Mužčyna sumniavajecca, što ramontu liŭnioŭki chopić nadoŭha. Akramia taho, mahiloviec zadajecca pytańniem: chto budzie kampiensavać čas i hrošy, jakija jon patraciŭ na kvateru? A taksama jak jamu žyć dalej, nie pieražyvajučy kožny raz padčas daždžu, što jaho znoŭ zatopić.
Kamientary