Chłopiec kinuŭ svaje krasoŭki ŭ kantejnier Čyrvonaha Kryža ŭ Miunchienie. Praz tydzień ich užo pradavali ŭ sekandzie ŭ Bośnii
Niamiecki błohier vyrašyŭ daviedacca, kudy adpraŭlajucca rečy z kantejnieraŭ dla dabračynnaha zboru, i byŭ vielmi ździŭleny.
Niamiecki błohier apublikavaŭ videa, u jakim raskazaŭ pra dziŭnaje padarožža svaich starych krasovak, jakija jon kinuŭ u śpiecyjalny kantejnier Čyrvonaha kryža dla zboru rečaŭ u Miunchienie.
Pierad hetym chłopiec ustaviŭ u ich nievialiki datčyk adsočvańnia Air Tag, jaki dapamahaje znachodzić rečy. Metaj było daviedacca, što dalej adbyvajecca z rečami, jakija ludzi kidajuć u takija dabračynnyja kantejniery ŭ roznych haradach Jeŭropy.
Jak raskazvaje mužčyna, na treci dzień krasoŭki pajechali ŭ pasiołak Puch u Aŭstryi, jaki znachodzicca niedaloka ad miažy z Bavaryjaj, zatym nakiravalisia ŭ Słavieniju, adtul — u Charvatyju.
Na piaty dzień transpartavańnia krasoŭki trapili ŭ baśnijski horad Kazin. Mužčyna byŭ vielmi ździŭleny, kali na karcie pabačyŭ, što trekier pakazvaje na sekand-chend.
Błohier vyrašyŭ źlatać u Bośniju i Hiercahavinu, kab spraŭdzić infarmacyju. Naviedaŭšy mahazin, jon znajšoŭ svaje staryja krasoŭki na palicy siarod inšaha abutku. Za ich prasili 20 miascovych marak, što adpaviadaje 10 jeŭra.
Mužčyna vyrašyŭ parazmaŭlać z pradaŭščycaj. Na pytańnie, adkul jany biaruć rečy, jana adkazała, što z Hiermanii.
«Moj bos — baśnijec, jaki žyvie ŭ Hiermanii. I jon pryvozić vopratku», — dadała jana.
Błohier spytaŭ, ci iduć hrošy ad prodažu na dabračynnaść, i pačuŭ admoŭny adkaz.
«Mianie cikavić, jak heta mahčyma, što my vykidvajem abutak u kantejnier Čyrvonaha Kryža ŭ Hiermanii, a jany pradajucca amal za 800 kiłamietraŭ adtul, biez zhadki rabotnikami ci niejkim inšym sposabam, što heta dabračynnaje achviaravańnie Čyrvonamu Kryžu?» — zadajecca pytańniem błohier i paviedamlaje, što jon źviarnuŭsia za kamientarom u Čyrvony Kryž.
Na žal, pa niejkich pryčynach hety rolik ciapier vydaleny, ale jon zachavaŭsia ŭ pierapostach u inšych sacyjalnych sietkach.
Sam ža błohier raźmiaściŭ novaje videa, u jakim raskazaŭ, što atrymaŭ adkaz na svoj zvarot. Jamu paviedamili, što tolki kala 10% adzieńnia, jakoje pastupaje ŭ kantejniery Čyrvonaha Kryža, niepasredna traplaje da ludziej, jakija majuć patrebu ŭ dapamozie.
Kala pałovy praz drenny stan idzie na pierapracoŭku i kala 40% źmieściva kantejnieraŭ pradajecca roznym kampanijam, jakija zajmajucca sekand-chendam. Takim čynam źbirajucca srodki na dabračynnyja prajekty Čyrvonaha Kryža. Krama ŭ Bośnii pradaje tavar u zvyčajnym paradku i nie achviaruje atrymanaha prybytku.
«Kali vy chočacie sapraŭdy dapamahčy svaim adzieńniem naŭprost, to nie achviarujcie jaho ananimna praz kantejniery, a addavajcie prosta ludziam u ruki. Ci to na vulicy, u prytułkach, ci ŭ susiedskich hrupach. Tak vaša dapamoha dakładna dojdzie da adrasata», — raić błohier.
Papularnaja hrodzienskaja błohierka prarekłamavała kramu z tavarami, vyrablenymi ŭ kałonijach. Aŭdytoryja nie acaniła
«Baćki nie razumieli, jak možna za kimści danošvać». Biełarusy raskazali, čamu zakuplajucca ŭ sekand-chendach
Błohierka Baba Niura raźviałasia z mužam-dalnabojščykam i syšłasia z hitarystam «Drazdoŭ»
Kamientary
Baśnijec kupiŭ hetyja krasoŭki i pierapradaje. Što nie tak?