Prezident ZŠA śćviardžaje, što Izrail i Iran źviarnulisia da jaho «amal adnačasova» z hatoŭnaściu da miru.
«Izrail i Iran pryjšli da mianie amal adnačasova i skazali: «Mir». Ja viedaŭ, što čas pryjšoŭ», — napisaŭ jon u svajoj sacsietcy Truth Social.
Pavodle jaho słoŭ, abiedźvie krainy čakajuć «luboŭ, mir i roskvit» u budučyni.
«Jany mohuć šmat nabyć, ale taksama šmat stracić, kali syjduć z praviednaha i sapraŭdnaha šlachu», — dadaŭ amierykanski prezident.
U zajavie Trampa havaryłasia, što pieramirje pačniecca praź niekalki hadzin (prykładna a 7-j ranicy pa Minsku).
Vysokapastaŭleny pradstaŭnik amierykanskaj administracyi skazaŭ televizijnaj kampanii CBS, partnioru Bi-bi-si ŭ ZŠA, što Izrail i Iran pahadzilisia na spynieńnie ahniu, adnak nivodny z bakoŭ pakul nie vystupiŭ z aficyjnaj zajavaj.
Tramp napramuju źviazaŭsia z premjer-ministram Izraila Bińjaminam Nietańjachu, i toj pahadziŭsia na pieramirje pry ŭmovie, što Iran nie budzie praciahvać ataki, paviedamlaje CBS.
Pavodle źviestak surazmoŭcy televizijnaj kampanii, pahadnieńnie ab pieramirji było dasiahnuta paśla taho, jak vice-prezident ZŠA Džej Dzi Vens, dziaržsakratar Marka Rubia i śpiecpasłańnik Styŭ Uitkaf źviazalisia z Tehieranam praz pramyja i ŭskosnyja kanały.
Tehieran pieršapačatkova nie daŭ aficyjnaha adkazu na zajavu Trampa ab spynieńni ahniu.
Iranskija ŚMI, u tym liku dziaržaŭnyja, u svaich paviedamleńniach nazvali heta «zajavaj» Trampa — pakul uchilajučysia ad pramoha pryznańnia.
Ministr zamiežnych spraŭ Irana Abas Arahčy zajaviŭ, što na dadzieny momant niama nijakaha pahadnieńnia ab spynieńni ahniu ź Izrailem, ale kali izrailski bok spynić ataki, to Tehieran taksama hatovy spynić abstreły.
«Na dadzieny momant NIE ISNUJE nijakaha «pahadnieńnia» ab spynieńni ahniu abo bajavych dziejańniaŭ. Adnak, kali izrailski režym spynić svaju niezakonnuju ahresiju suprać iranskaha naroda nie paźniej za 4-ju ranicy pa tehieranskim časie, my nie majem namieru praciahvać našy adkaznyja dziejańni paśla hetaha», — napisaŭ Arahčy ŭ sacsietcy X.
Pavodle jaho słoŭ, kančatkovaje rašeńnie ab spynieńni bajavych dziejańniaŭ budzie pryniata paźniej.
Izrailskaja armija, u svaju čarhu, paviedamlaje pra niekalki zapuskaŭ rakiet ź Irana.
Pavodle źviestak CACHAŁ, «sistemy supraćpavietranaj abarony pracujuć, kab pierachapić pahrozu».
Chto toj nieadekvatny biełarus, jaki lasnuŭ dziciatka hałavoj ab padłohu ŭ maskoŭskim Šaramiećcievie8
Kamientary