Rasijskaja statystyka pakazała, nakolki praz sankcyi prasieŭ impart aŭto ź Biełarusi
Dyrektar rasijskaha ahienctva «Aŭtastat» padzialiŭsia ličbami, jakija pakazvajuć na značnaje padzieńnie abjomaŭ reekspartu mašyn ź Biełarusi ŭ Rasiju.
Sankcyi pierškadžajuć, ale nie ŭsim
U svaim telehram-kanale Siarhiej Cielikaŭ napisaŭ, što biełaruski impart skaraciŭsia ŭ try razy.
Kali za studzień—maj 2024 hoda ź Biełarusi ŭ Rasiju ekspartavali bolš čym 30 tysiač novych i b/u aŭto (biez uliku Geely/BelGee, jakija ad pačatku vyrablajucca dla rasijskaha rynku), to za pieršyja piać miesiacaŭ biahučaha hoda — usiaho 10,5 tysiačy lehkavikoŭ.
Takaja roźnica tłumačycca tym, što ŭ pieryjad sa studzienia pa maj 2024 hoda ŭsio jašče isnavaŭ dysparytet u sankcyjnych abmiežavańniach pamiž Biełaruśsiu i Rasijaj. Pasankcyjnyja dla RF mašyny, choć i z peŭnymi składanaściami, ale ŭsio jašče traplali ŭ Biełaruś naŭprost ź ES.
Inšaja pryčyna, jakaja mocna paŭpłyvała na cikavaść da pryhonu aŭto ź Biełarusi ŭ RF, u tym, što, pačynajučy z 1 kastryčnika 2024 hoda, u Rasii źmianilisia praviły apłaty ŭtylzboru dla aŭtamabilaŭ, razmytnienych u inšych krainach JEAES, u tym liku i ŭ Biełarusi.
Ciapier, kab rasijanam nie treba było płacić kamiercyjny ŭtylzbor za aŭto, nabytaje ŭ Biełarusi abo inšaj krainie JEAES, z momantu mytnaha afarmleńnia pavinna prajści nie mienš za 12 miesiacaŭ.
Tym nie mienš, statystyka pakazvaje, što ŭ vypadku z novymi aŭtamabilami padzieńnie nie takoje ŭžo i rezkaje — usiaho 19% u paraŭnańni z anałahičnym pieryjadam minułaha hoda. Ciapier na novyja aŭto i aŭtamabili, maładziejšyja za try hady, prypadaje kala 60% ad ahulnaha abjomu impartu mašyn ź Biełarusi ŭ Rasiju.
Užyvanaje nie ŭ trendzie
A voś z mašynami, starejšymi za try hady, impart ź Biełarusi ŭ Rasiju skaraciŭsia pryblizna ŭ piać razoŭ.
Taki dysparytet nazirajecca z-za taho, što, niahledziačy na sankcyjnyja abmiežavańni, rasijanie praciahvajuć davoli masava ŭvozić novyja i amal novyja aŭtamabili praź Biełaruś.
A dakładniej nie praź Biełaruś, a z zajezdam u našu krainu. Takija aŭto dastaŭlajuć ź Jeŭropy vialikim kruham praz Turcyju. U Biełaruś ich zavoziać vyklučna dziela taho, kab zekanomić na mycie, vykarystoŭvajučy biełaruskich lhotnikaŭ i 140-y ŭkaz.
U vypadku z mašynami, starejšymi za try hady, jakija razmytnivajucca ad abjomu ruchavika, a nie ad koštu, rasijanam vyhadniej razmytnivać ich u siabie pa poŭnym taryfie i płacić pry hetym kapieječny ŭtylzbor. Tamu schiema z zajezdam na razmytnioŭku ŭ Biełaruś pracuje tolki z darahimi aŭto va ŭzroście da 3 hadoŭ.
Bahatyja płaciać, a nie płačuć
Heta paćviardžaje asartymient mašyn, jakija možna ŭbačyć na mytnym składzie pad Minskam, jaki kišyć luksavymi padsankcyjnymi mašynami.
Admietna, što samym papularnym aŭtamabilem dla ekspartu ź Biełarusi ŭ Rasiju staŭ «Hielik» (Mercedes-Benz G-kłasa) — 451 štuka. Dalej iduć BMW X5 — 449 štuk, X7 — 378.
Ale razmytniajuć praź Biełaruś i bolš darahija i ekskluziŭnyja aŭto. Tak, za pieršyja piać miesiacaŭ 2025 hoda praz našu krainu prajšło:
23 Ferrari, 14 Lamborghini, 11 Bentley, 9 Rolls-Royce, 5 McLaren i 4 Maserati.
Heta statystyka čarhovy raz pakazvaje, što sankcyjnyja abmiežavańni najmienš adčuvajuć na sabie ludzi ź vialikimi dachodami.
Tym nie mienš, možna śmieła mierkavać, što pa vynikach druhoj pałovy 2025 hoda ahulnyja pakazčyki buduć jašče bolš ścipłymi — znoŭ ža za košt skaračeńnia doli impartu ź Biełarusi aŭto, starejšych za try hady.
Chto toj nieadekvatny biełarus, jaki lasnuŭ dziciatka hałavoj ab padłohu ŭ maskoŭskim Šaramiećcievie8
Kamientary