Dobryja naviny dla amataraŭ sapraŭdnaj čornaj kavy: pavodle novaha daśledavańnia, štodzionnaje ŭmieranaje spažyvańnie kavy biez dabavak moža źnizić ryzyku zaŭčasnaj śmierci. Adnak kali ŭ kubak traplajuć cukar, małako ci viarški, karysnyja ŭłaścivaści źnikajuć.
Jak piša Onet.pl, daśledčyki z Univiersiteta Taftsa (ZŠA) analizavali zvyčki charčavańnia amal 46 tysiač darosłych amierykancaŭ u pieryjad z 1999 pa 2018 hod i źviazvali hetyja dadzienyja z Nacyjanalnym rejestram śmierciaŭ. Siarod inšaha aceńvałasia, jak roznyja typy kavy ŭpłyvajuć na ryzyku zaŭčasnaj śmierci.
Daśledčyki padzialili spažyvańnie kavy na katehoryi ŭ zaležnaści ad niekalkich faktaraŭ: ci była jana z kafieinam abo biez, ci dadavali tudy cukar u roznych formach, a taksama ci spažyvałasia jana z małakom, viarškami abo sumieśsiu «pałova na pałovu».
Akramia taho, navukoŭcy ŭličvali kolkaść cukru i nasyčanych tłuščaŭ, jakija ŭdzielniki dadavali ŭ svaju kavu. Nizkim uzroŭniem ličyłasia kolkaść, što nie pieravyšaje 5% ad sutačnaj rekamiendavanaj normy. Heta prykładna pałova čajnaj łyžki cukru i dźvie stałovyja łyžki małaka tłustaściu 2% abo adna stałovaja łyžka viarškoŭ.
Akazałasia, što tyja, chto piŭ prynamsi adzin kubačak zvyčajnaj kavy štodnia, mieli na 16% mienšuju ryzyku śmierci ad lubych pryčyn, a pry ŭžyvańni 2-3 kubkaŭ na dzień hety pakazčyk pavialičvaŭsia da 17%. Užyvańnie bolšaj kolkaści napoju ŭžo nie davała dadatkovaj karyści i navat mahło pahoršyć stanoŭčy efiekt, asabliva što da sardečna-sasudzistych zachvorvańniaŭ.
U cełym užyvańnie čornaj kavy i kavy ź nievialikim dadańniem cukru i nasyčanych tłuščaŭ było źviazana sa źnižeńniem ryzyki śmiarotnaści ad usich pryčyn na 14% u paraŭnańni ź ludźmi, chto kavu zusim nie piŭ.
Ale kali kolkaść cukru ci nasyčanych tłuščaŭ pieravyšała normu, stanoŭčy efiekt źnikaŭ.
Pa słovach aŭtaraŭ, ich vyniki paćviardžajuć rekamiendacyi dyjetołahaŭ ab nieabchodnaści abmiežavać spažyvańnie cukru i nasyčanych tłuščaŭ.
Praŭda, jany sami papiaredžvajuć pra abmiežavańni svajho daśledavańnia. Naprykład, dadzienyja pra toje, kolki kavy pili ŭdzielniki i što ŭ jaje dadavali, zasnavanyja na samaacency — a heta zaŭsiody niapeŭny indykatar. Taksama nie było znojdziena vidavočnaj suviazi pamiž biezkafieinavaj kavaj i źmianšeńniem ryzyki śmierci — mahčyma, tamu što kavu biez kafieinu pili tolki adzinki.
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma12
Kamientary