Kirył Bałachonaŭ: «Pakul pa horadzie asabliva nie hulaju, bo ludzi na mianie hladziać, byccam ja vyjšaŭ z Aśviencima»

«Na voli ja, atrymlivajecca, tolki dva dni (intervju brałasia 23 červienia. — NN), ale turma ŭžo nie ŭspaminajecca, byccam ja tam i nie byŭ. Zastałasia tolki zvyčka pračynacca: u kolki b ni loh spać, pračynajusia a 6-j ranicy», — padzialiŭsia Kirył Bałachonaŭ.

Jon adzin ź piaci fihurantaŭ spravy zakrytaha čata «Sajuz biełaruskaha nacyjanalnaha ščyta». Kirył byŭ zatrymany 8 listapada 2022 hoda i prysudžany da 3 hadoŭ i 6 miesiacaŭ pazbaŭleńnia voli ŭ kałonii va ŭmovach uzmocnienaha režymu. 21 červienia Kirył Bałachonaŭ razam ź jašče 13 palitviaźniami byŭ vyzvaleny i vypravadžany z krainy.

— Jašče ŭ piatnicu 20 červienia ranicaj ja vyjšaŭ jak zvyčajna na pramzonu, majučy namier pracavać, i, viadoma, nie moh vykazać zdahadku, što praź dzień apynusia na voli i ŭ Vilni. Dahetul mnie niezrazumieła, čamu vybar dla vyzvaleńnia ŭpaŭ na mianie.

Ja nie spadziavaŭsia, što mianie mohuć vyzvalić. Kali jašče letaś sa mnoj sprabavali pravodzić hutarki nakont prašeńnia ab pamiłavańni, ja adrazu skazaŭ, što svaich pryncypaŭ nie zdam i ničoha pisać nie budu.

— Jak vy siabie adčuvajecie ciapier fizična i psichałahična?

— Fizična narmalna siabie adčuvaju, najbližejšym časam płanuju zaniacca svaim zdaroŭjem. Praŭda, pakul pa horadzie asabliva nie hulaju, tamu što ludzi na mianie hladziać, byccam ja vyjšaŭ z Aśviencima. Mnie heta dastaŭlaje dyskamfort. Ale ja razumieju, što źniešnaść z časam źmienicca.

Mianie atačajuć i mnie dapamahajuć dobryja ludzi, usie jany zaradžanyja na pazityŭ. Asablivych prablem ciapier pieraličyć nie mahu. U paraŭnańni z tym, što ja pieražyŭ, liču, što ŭsio astatniaje možna vyrašyć.

— Jakija ŭ vas hałoŭnyja ŭražańni za apošnija dni, što ŭraziła?

— Vielmi mocna ździviŭ Siarhiej Cichanoŭski. Praz stolki času jon nie źmianiŭsia, u jaho zastałasia taja ž enierhija, toj ža zapał. Jon i dalej zmoža natchniać ludziej.

U astatnim pryjemna ŭśviedamlać, što možna zahuhlić što zaŭhodna i nie bajacca, što ciabie za heta pasadziać. Źmianiŭsia štučny intelekt, jon staŭ prosta masavym. Ale maje zapyty pakul nie moža apracavać.

Mnie na zonie ŭsio ž taki dachodzili niejkija razdrukoŭki, i ja cikaviŭsia mienavita raźvićciom čata-GPT, sačyŭ za AI. Dumaju, jak tolki trochi adaptujusia na voli, jak tolki ŭ mianie źjaviacca hadžety, taksama budu karystacca GPT.

— Pra płany ŭžo dumali?

— Kali mianie zatrymali, ja vučyŭsia na «śpiecyjalista aŭtamatyzavanaha prajektavańnia» na čaćviortym kursie kaledža, ź jakoha mianie, naturalna, adličyli. I ja dumaju praciahnuć navučacca ŭ IT, u mianie zastalisia viedy. Akramia hetaha ŭ płanach, viadoma, znajści pracu.

• 21
• 0
• 0
• 0
• 0
• 0
• 0
• 9