Pad Minskam kala Zasłaŭskaha vadaschovišča źbirajucca pabudavać maštabny haściničny kompleks FOTY
U vioscy Kryžoŭka, što niedaloka ad MKAD i Zasłaŭskaha vadaschovišča, źbirajucca pabudavać maštabny haściničny kompleks.
Źmieny čakajuć terytoryju byłoha łahiera, dzie adpačyvali dzieci čyhunačnikaŭ (i ŭsie, chto zmoh trapić u viedamasny dziciačy sad u rajonie vakzała). Na tym miescy, dzie kaliści stajali žyłyja karpusy, stałovaja i dziciačyja placoŭki «Žuraŭlika», moža źjavicca «turystyčna-azdaraŭlenčy kompleks z vyłučeńniem čerhaŭ budaŭnictva», piša «Anłajnier».
Siarod sosnaŭ chočuć uźvieści šaścipaviarchovy (piać paŭnavartasnych uzroŭniaŭ plus adzin mansardny) haściničny kompleks.
A jašče bazu adpačynku, jakaja składajecca z hramadskaha korpusa z basiejnam i restaranam. Taksama tut płanujecca raźmiaścić niekalki haściavych domikaŭ, bankietnuju zału i parkoŭku na 150 mašyna-miescaŭ.
Nad zaharadnym prajektam pracavała studyja «Arch-Nuvo», viadomaja pa stylnym ŽK «Andrejeŭski», jaki ciapier budujecca ŭ rajonie vulicy Zacharava ŭ Minsku.
Hramadski korpus budzie adnapaviarchovym. Hatel, jak užo zhadvałasia, — na šeść uzroŭniaŭ. Jaho razabjuć na try asobnyja karpusy. Numary zaprajektavanyja dvuchmiesnyja i dvuchmiesnyja z haścinaj. Akramia ŭłasna dachu nad hałavoj haścinica prapanuje adpačyvalnikam restaran na 128 pasadačnych miescaŭ, dva bankietnyja zały, basiejn, kaljannuju, kinapakoj, prajekcyjnuju i pamiaškańnie dla majstar-kłasaŭ. Na mansardnym paviersie žylla nie budzie: tam raźmieściać zony VR, dziciačyja pakoi, biljardavuju i niejkuju ŭniviersalnuju zału.
«Dla piersanalnaha adpačynku ŭ vuzkim kole ź siamjoj abo siabrami prajektam raspracavany haściničnyja domiki, jakija akružany lasnym masivam, śvietłavymi fihurami, jakija stvarajuć asablivuju atmaśfieru, zonami adpačynku. Kožny domik abstalavany asabistaj terasaj, ź jakoj adkryvajecca vid na ŭnutrany vadajom i dobraŭparadkavańnie kompleksu», — udakładniajuć u «Arch-Nuvo», z čaho stanovicca zrazumieła, što na terytoryi budzie svajo aziarco.
Asobnaja bankietnaja zała (paŭnavartasny budynak) taksama budzie znachodzicca kala vadajoma. Jaje akružać zony aktyŭnaha adpačynku, hulniavyja placoŭki dla haściej roznych uzrostaŭ, a taksama «aśvietlenaja śvietłavymi kolcami zona pad adkrytym niebam, jakaja stvaraje niezabyŭnuju kazačnuju atmaśfieru momantu».
Budzie praviedziena dobraŭparadkavańnie terytoryi, u ramkach jakoha vydzielać miesca dla kafe. Na hienpłanie ŭsio heta vyhladaje tak: razhledzieć možna kutok dla johi, niekalki altanak na krai lesu, viarovačny haradok, łabirynt i navat teleskop.
Dla realizacyi prajekta treba budzie źnieści 10 cahlanych karpusoŭ: šeść spalnych, haspadarčy, stałovuju, budku vartaŭnika i chleŭ.
Letaś «Žuraŭlik» vystaŭlali na aŭkcyjon. Pačatkovy košt łota składaŭ 640 820 rubloŭ. Pieršy krok — 32 041 rubiel. Jak mienavita prajšli tarhi, nie paviedamlajecca. Zatoje viadoma, što ciapier zakazčykam prajekta pieratvareńnia terytoryi vystupaje ZAT «UKCH «BiełHAZaŭtaservis»».
Zaraz prajekt prachodzić stadyju hramadskaha abmierkavańnia. Jano praciahniecca pa 14 lipienia 2025 hoda. Arhanizatar — Minski rajonny vykanaŭčy kamitet. Aznajomicca z architekturna-płanirovačnaj kancepcyjaj možna ŭ Ždanovickim sielskim vykanaŭčym kamitecie (ah. Ždanovičy, vuł. Parkavaja, d. 4) abo na sajcie administracyi Minskaha rajona. Prezientacyja prajekta budzie pravodzicca 9 lipienia 2025 hoda ŭ 17:00 u Ždanovickim sielskim vykanaŭčym kamitecie.
Zaŭvahi i prapanovy prymajucca pa 14 lipienia 2025 hoda piśmova šlacham zaniasieńnia ŭ žurnał pa hramadskich abmierkavańniach u Ždanovickim sielskim vykanaŭčym kamitecie. Taksama možna adpravić elektronny list na e-mail: [email protected] z paznakaj «hramadskaje abmierkavańnie».
Ciapier čytajuć
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny24
Kamientary