Achova i dziasiatki ludziej u kamandzie: za što žyvie Ofis Cichanoŭskaj u Vilni?
Litoŭski partał LRT.lt padniaŭ pytańnie, što viadoma pra vydatki Litvy na ŭtrymańnie Śviatłany Cichanoŭskaj i jaje kamandy. Pavodle vydańnia, hučać mierkavańni, što ŭtrymańnie Ofisa Cichanoŭskaj abychodzicca doraha litoŭskim padatkapłatnikam. Što jany vyśvietlili?
Dyskusii ab srodkach, što Litva vydzialaje biełaruskaj apazicyi, aktyvizavalisia paśla taho, jak u Vilniu prybyŭ muž Śviatłany — Siarhiej Cichanoŭski, jaki vyjšaŭ na svabodu paśla piaci hadoŭ źniavoleńnia, piša vydańnie.
«Znoŭ byŭ zhadany nieabhruntavany pamier «renty» — nibyta byłaja kandydatka na pasadu prezidenta Biełarusi atrymlivaje 35 tysiač jeŭra ŭ miesiac.
Hetaja suma zhadvajecca nie ŭpieršyniu. Jašče ŭ 2021 hodzie pra jaje kazaŭ lidar partyi «Zara nad Niomanam» Remihijus Žemajtajcis, adnak, kali žurnalisty paprasili jaho ŭdakładnić krynicu hetych danych, jon tak i nie zmoh jaje nazvać», — piša vydańnie.
Miž tym i Ministerstva zamiežnych spraŭ Litvy (MZS), i ofis Śviatłany Cichanoŭskaj abvierhli infarmacyju pra toje, što jana atrymlivaje jakuju-niebudź rentu.
Pa słovach MZS, urad Litvy tolki zabiaśpiečvaje biaśpieku lidara biełaruskaha demakratyčnaha hramadstva.
«Litva ŭžo šmat hadoŭ paśladoŭna padtrymlivaje hramadzianskuju supolnaść i demakratyčnyja siły Biełarusi, imknučysia zabiaśpiečyć mahčymaść praviadzieńnia svabodnych i demakratyčnych vybaraŭ u Biełarusi i vyzvaleńnie palityčnych źniavolenych», — havorycca ŭ adkazie MZS na zapyt LRT.lt.
Viedamstva padkreślivaje, što padtrymka demakratyčnaj Biełarusi — heta pytańnie nacyjanalnaj biaśpieki Litvy.
Taksama MZS źviartaje ŭvahu, što paśla sfalsifikavanych prezidenckich vybaraŭ u Biełarusi 2020 hoda Cichanoŭskaja była vymušana pakinuć krainu i pryjechać u Litvu, dzie jaje pryniali jak «aficyjnuju hościu ŭrada Litoŭskaj Respubliki».
Tym časam pradstaŭnica ofisa Cichanoŭskaj, pres-sakratarka palityka Hanna Krasulina padkreśliła, što čutki pra nibyta vielizarnyja sumy, atrymanyja biełaruskaj apazicyjaj ad Litvy, časta padahravajucca prapahandaj Minska i Maskvy.
Jana kaža, što nichto z supracoŭnikaŭ Ofisa i vałancioraŭ nie atrymlivaje zarobku ad litoŭskaj dziaržavy. Dziejnaść ofisa finansujecca za košt srodkaŭ ES i pryvatnych achviaravańniaŭ. Pa słovach Krasulinaj, praca Ofisa «nie darahaja».
Zhodna z danymi Centra rehistraŭ, u 2023 hodzie dachod jurydyčnaj asoby, jakaja kiruje Ofisam Cichanoŭskaj u Litvie, skłaŭ 122 929 jeŭra. Heta samyja aktualnyja danyja, jakija jość u centra.
Krasulina padkreśliła, što biełaruskija demakratyčnyja siły stali mišeńniu prapahandy režymu.
«My nazirajem maštabnuju skaardynavanuju infarmacyjnuju kampaniju, jakuju, vierahodna, arhanizujuć boty, źviazanyja z Rasijaj ci ź biełaruskim režymam, z metaj pasiejać niedavier i nianaviść pamiž biełarusami i litoŭcami», — kaža pradstaŭnik S. Cichanoŭskaj.
Dzianis Kučynski: u Ofisie pracujuć 30—40 čałaviek, ale z pracoŭnym dahavoram — mienšaść
Dypłamatyčny savietnik Śviatłany Cichanoŭskaj Dzianis Kučynski adznačaje, što častka vydatkaŭ na ŭtrymańnie lidara biełaruskaj apazicyi ŭ Litvie pakryvajecca litoŭskim uradam.
Havorka idzie pra achovu samoj Cichanoŭskaj, jaje žyllo i łahistyčnuju padtrymku z boku Ministerstva zamiežnych spraŭ Litvy padčas mižnarodnych pajezdak — «kali heta mahčyma».
«Pry hetym ni sama Śviatłana Cichanoŭskaja, ni supracoŭniki Ofisa nie atrymlivajuć ad Litvy nijakaha finansavaha ŭtrymańnia (za redkim vyklučeńniem niekalkich čałaviek, jakija atrymali karotkaterminovyja vypłaty ŭ ramkach prahramy intehracyi paśla atrymańnia mižnarodnaj abarony na ahulnych padstavach)», — padkreśliŭ u razmovie z LRT.lt Kučynski.
Pavodle jaho słoŭ, u Ofisie Śviatłany Cichanoŭskaj pracujuć kala 30—40 čałaviek, nie ŭsie ź ich znachodziacca na poŭnaj zaniataści. Pracoŭnyja dahavory jość tolki ŭ nievialikaj častki supracoŭnikaŭ, astatnija pracujuć pa dahavorach indyvidualnaj zaniataści.
U struktury Ofisa — kala šaści adździełaŭ, jakija adkazvajuć za roznyja śfiery: mižnarodnyja spravy, kamunikacyi, jurydyčnuju ci techničnuju padtrymku i inšyja.
«Faktyčna heta kampaktnaja kamanda, uličvajučy maštaby zadač. My imkniomsia racyjanalna vykarystoŭvać kožny jeŭra i pastajanna aptymizujem vydatki», — praciahvaje Kučynski.
Supracoŭniki Ofisa žyvuć na «zarobki ci hanarary ŭ ramkach realizoŭvanych prajektaŭ», adznačaje dypłamatyčny daradca Cichanoŭskaj. Pavodle jaho słoŭ, zarobki supracoŭnikaŭ, jak praviła, «nižejšyja za siarednija pa Litvie» — kala 2000 jeŭra da vyliku padatkaŭ (heta kala 1200 jeŭra čystymi — NN).
Kučynski, hetak ža jak i Krasulina, ukazvaje, što
asnoŭnyja dachody ŭ Ofis pastupajuć ad donaraŭ — jeŭrapiejskich i amierykanskich instytucyjnych partnioraŭ. Tamu, pavodle jaho słoŭ, pradstaŭniki Cichanoŭskaj śviadoma nie prosiać biełarusaŭ achviaravać hrošy na pracu Ofisa.
«My prosim padtrymlivać siemji biełaruskich palitźniavolenych, inicyjatyvy našaj hramadzianskaj supolnaści, kulturu, niezaležnyja miedyja i Ukrainu», — adznačaje Kučynski.
Vydańnie źviartaje ŭvahu, što Siarhiej Cichanoŭski paśla vyzvaleńnia «adznačaŭ, što achova ŭ Litvie raspaŭsiudžvajecca tolki na jaho žonku, ale nie na jaho samoha».
Kučynski adkazvaje, što naŭrad ci z vyzvaleńniem Cichanoŭskaha vydatki Litvy ŭzrastuć.
«Nie dumaju, što vydatki pavialičacca. Siarhieju dapamahajuć biełaruskija pravaabarončyja inicyjatyvy. Pytańni achovy nie ŭvachodziać u maju kampietencyju, tamu ja nie mahu ich kamientavać», — skazaŭ dypłamatyčny daradca Cichanoŭskaj.
LRT.lt źviarnuŭsia ŭ MZS z pytańniem, ci apłačvaje Litva žyllo Cichanoŭskaj. U adkazie MZS havorycca, što ministerstva «nie moža prakamientavać hetyja śćviardžeńni, pakolki heta nie adnosicca da kampietencyi MZS».
Pa danych litoŭskaha MZS, Litva pradastaŭlaje Cichanoŭskaj achovu. Pa słovach daradcy palityka, ź jakim pahavaryŭ LRT.lt, — taksama i žyllo.
Cichanoŭskaja nie atrymlivaje renty, jaje Ofis finansujecca za košt srodkaŭ zamiežnych prahram i pryvatnych achviaravańniaŭ, dadaje vydańnie.
Ciapier čytajuć
Kiraŭnik Lidy zaklikaŭ siłavikoŭ nie spyniać palityčnych represij11
Kamientary
Ale adnačasova z hetym nieabchodna dziejničać u intaresach Biełarusi i biełaruskaha naroda, a nie tych, chto finansuje ŭłasnuju dziejnaść. Tamu, kab vyklučyć navat sumnievy, nieabchodnaja poŭnaja prazrystaść. I toje, jak Ofis kamunikuje hetuju temu, na žal, zusim nie dadaje im davieru.