Mahutny ziemlatrus kala bierahoŭ Kamčatki pryvioŭ da cunami, u Japonii i na Havajach abvieščana evakuacyja
Kala bierahoŭ rasijskaj Kamčatki adbyŭsia mahutny ziemlatrus, u vyniku cunami nakryła bierah Kamčatki, papiaredžańnie pra chvali vyšynioj da troch mietraŭ atrymali ŭsie prybiarežnyja terytoryi paŭnočnaj častki Cichaha akijana až da Kalifornii, piša Bi-bi-si.
Achviar, pa papiarednich danych, niama. Ministr achovy zdaroŭja Kamčackaha kraju Aleh Mielnikaŭ skazaŭ, što ŭ vyniku ziemlatrusu traŭmy atrymali niekalki čałaviek.
«Jość ludzi, jakija, vybiahajučy, atrymlivali traŭmy. Jość pacyjent, jaki vyskačyŭ z akna. Na žal, traŭmu atrymała žančyna, što znachodziłasia ŭ budynku novaha aeraporta. Usie pacyjenty ŭ zdavalniajučym stanie. Ciažkich traŭm na dadzieny momant nie zafiksavana», — cytuje Mielnikava ahienctva TASS.
Ziemlatrus mahnitudaj 8,7 bała, pavodle danych Kamčackaha filijała Hieafizičnaj słužby RAN, adbyŭsia prykładna za 150 km ad Pietrapaŭłaŭska-Kamčackaha, epicent ziemlatrusu znachodziŭsia na hłybini 17 km.
Pavodle siejsmołahaŭ, heta najmacniejšy ziemlatrus u rehijonie paśla ziemlatrusu i cunami 1952 hoda, kali na Kuryłach i Kamčatcy zahinuli nie mienš za 2000 čałaviek. Na ŭschodni bierah Kamčatki nakryli chvali vyšynioj 3—4 mietry.
Papiaredžańni pra cunami vydadzieny ŭ Japonii, na Havajach, na Alascy i pa ŭsim cichaakijanskim uźbiarežžy Paŭnočnaj Amieryki. Bolš za toje, Amierykanski centr papiaredžańnia pra cunami zajaviŭ, što chvala moža dasiahnuć navat Paŭdniovaj Amieryki, bierahoŭ Ekvadora i Čyli.
U Japonii i na Havajach ułady abviaścili pra nieabchodnaść terminovaj evakuacyi z prybiarežnych terytoryj na bolš vysokija miescy. Evakujavany, u pryvatnaści, piersanał atamnaj elektrastancyi «Fukusima», jakaja mocna paciarpieła padčas razburalnaha cunami ŭ sakaviku 2011 hoda.
Urad Japonii kala 11-j ranicy pa miascovym časie zajaviŭ, što pakul paviedamleńniaŭ pra achviary abo razbureńni ŭ vyniku cunami nie pastupała.
U Pietrapaŭłaŭsku-Kamčackim u vyniku ziemlatrusu abrynułasia ściana dziciačaha sadka, ale, jak zajaviŭ miascovy hubiernatar, nichto pry hetym nie paciarpieŭ.
Pavodle ministra achovy zdaroŭja Mielnikava, surjozna paškodžany budynak dziciačaj palikliniki.
Cunami dasiahnuła Kurylskich astravoŭ i nakryła bierah, u tym liku, u horadzie Paŭnočna-Kurylsk na vostravie Paramušyr.
Mer Paŭnočna-Kurylska Alaksandr Aŭsiańnikaŭ skazaŭ ahienctvu TASS, što ŭ horadzie paciarpieŭ port.
«Tam nie było abjektaŭ sacyjalnych i žyłych. Jany nie paškodžany. Zakranuta marskaja infrastruktura, jość łakalnyja razbureńni na terytoryi porta, rybapramysłovych pradpryjemstvaŭ. Acanić nie ŭjaŭlajecca mahčymym», — skazaŭ Aŭsiańnikaŭ.
Žycharoŭ Paŭnočna-Kurylska sabrali na ŭzvyššy — na sopcy, jany buduć zastavacca tam da poŭnaj admieny pahrozy paŭtornych chval.
«Zaraz vada znoŭ adyšła ad bieraha, i tam čakajuć druhuju chvalu cunami», — napisała ahienctva na pačatku druhoha času dnia pa miascovym časie (pačatak treciaj nočy pa Hrynvičy).
Va ŭradzie Sachalinskaj vobłaści ahienctvu skazali, što ŭ samim Paŭnočna-Kurylsku zafiksavany nievialikija razbureńni i «častkova parušana elektrazabieśpiačeńnie». Horad znachodzicca za 360 km ad epicentra ziemlatrusu.
Pramova hetaha minskaha vypusknika na liniejcy ŭ 2020-m uzarvała internet. Što z chłopcam ciapier?3
Kamientary