«Канверт для Ціханоўскай». Геніі-лукашысты зноў самі сябе выкрылі і высцебалі
Два дні ўсе рэсурсы прапаганды анансавалі фільм АНТ як «разнос у шчэпкі», піша Мікола Бугай. Ну і што ж у тым відэа, публікацыю якога рыхтавалі пяць гадоў?
На АНТ паказалі кадры, на якіх Андрэй Паўлючэнка перадае скрутак Ціханоўскай. Не Ціханоўскай-2025 — упэўненаму ў сабе еўрапейскаму лідару з досведам, які абапіраецца на падтрымку штаба і сям’і, а Ціханоўскай-2020 — хатняй гаспадыні, якая з прынцыпу кінула выклік дыктатару і засталася ў дні пасля выбараў сам-насам з Карпянковымі і Паўлючэнкамі.
Генерал у фільме шчыра расказвае, як ён 10 жніўня па даручэнні Лукашэнкі прыехаў у Цэнтрвыбаркам, каб разабрацца з заявай, якую туды падала Святлана Ціханоўская.
Стоп! Вы кіраўнік спецслужбы, а Лукашэнка і Ціханоўская — два раўнапраўныя кандыдаты, афіцыйны канчатковы вынік выбараў яшчэ не абвешчаны. Людзі на вуліцах вакол з рызыкай для жыцця б'юць трывогу: выбары сфальсіфікаваныя, трэба перападлік галасоў. І як гэта вы, генерал, па «даручэнні» аднаго кандыдата прыязджаеце да другога кандыдата арганізоўваць яе дэпартацыю за мяжу, ды яшчэ з нейкімі грашыма ў валюце сумнеўнага паходжання?
Паводле слоў Паўлючэнкі, Ціханоўская была напалоханая і разгубленая, не ведала, да каго звярнуцца. Адзіным яе жаданнем было ўбачыць сваіх дзяцей, якія тады былі за мяжой.
«Вось грошы, якія вы прасілі», — кажа Ціханоўскай кіраўнік Аператыўна-аналітычнага цэнтра.
Ціханоўская сапраўды на відэакадрах сядзіць збянтэжаная і спалоханая і не разумее, што рабіць (каб застацца ў жывых!). Які кадр: хатняя гаспадыня сядзіць на кухні, а перад ёю — генерал.
Геніі-лукашысты зноў самі сябе выкрылі і высцебалі.
«Паўлючэнка спрабаваў падкупіць законна выбранага прэзідэнта», — як пажартаваў нехта ў каментах. Ці як гэта там называецца ў Крымінальным кодэксе, калі службовец забірае грошы ў дзяржпрадпрыемства і аддае іх нейкай фізасобе?
А можа некалі нарэшце ў Беларусі стане так, што афіцэры будуць дзейнічаць па законе, а не па паняццях, «згодна з даручэннямі» аднаго з кандыдатаў? Я ўжо не кажу пра тыя «традыцыйныя каштоўнасці», вернасць якім так траскуча дэкларуецца.
У сваім «не да законаў» лукашысты не разумеюць, што іх відэа толькі пацвярджае: пакуль ва ўсёй Беларусі адбываліся дэманстрацыі за сумленны падлік галасоў, Святлану Ціханоўскую фактычна ўзялі ў закладнікі сілавікі з бліжняга кола Аляксандра Лукашэнкі. Яны ізалявалі яе, кандыдата ў прэзідэнты, ад яе каманды — пакуль муж, Сяргей Ціханоўскі, знаходзіўся ў СІЗА. І вымусілі — усё яшчэ законнага, па іх жа законах законнага, кандыдата ў прэзідэнты пакінуць Беларусь.
Што ж, так і сталася тое, што сталася. Маем таталітарны рэжым у Беларусі, які раздзяліў лёс пуцінскай Расіі, і маем Ціханоўскую-2025, якая дагэтуль застаецца легітымным голасам еўрапейскай Беларусі.
Цяпер чытаюць
Што вядома пра жанчыну, якая загінула ў аўтобусе, што вёз беларускіх футбалістаў-школьнікаў у Геленджык?16
Каментары
Не смяшыця мае шкврпэткі, карацей)))