Jak nazyvajuć biełaruskija hryby ŭ roznych kutkach krainy

Baravik

Zvyčajnaja nazva dla hetaha hryba zastajecca «baravik». Ale jość svaje rehijanalnyja asablivaści.

Na zachadzie Hrodzienščyny baravik nazyvajuć «ščyrym hrybam». Na Maładziečanščynie i Vilejščynie baravik zavuć «dobry hryb». La Baranavičaŭ — «praŭdzivik».

Na Paleśsi isnuje šmat varyjacyj nazvy baravika. Samaja raspaŭsiudžanaja vielmi prostaja — «hryb». U vakolicach Homiela baravik nazyvajecca «dabrakom», na poŭnačy Homiela karystalisia słovam «dobryk». Na poŭdni Homielskaj vobłaści fihuruje nazva «charošy hryb». Na Brestčynie i terytoryi na miažy z Ukrainaj bolš raspaŭsiudžanym słovam było «praŭdziviec».

Šampińjon

Šampińjon u Biełarusi nazyvaŭsia nie zaŭsiody mienavita tak. Na Brestyčnie pra hety hryb vam skažuć, što heta «piačurka». Na Paleśsi i Homielščynie šampińjon nazyvali krychu inakš — «piečuryca». Tam ža, na Paleśsi, vy mahli pačuć i słova «bialak».

Na poŭdni Minščyny šampińjon byŭ «šapijonam», «šapionam», «špijonam».

Na Hrodzienščynie šampijon nazyvali pa-roznamu: «piačurka», «čerepicy» i toj ža «šampińjon» u mnohich varyjantach.

Muchamor

Adzin z samych niebiaśpiečnych hryboŭ taksama mieŭ roznyja varyjacyi nazvy ŭ biełaruskich rehijonach. Na poŭnačy, poŭdni, centralnaj Biełarusi i na ŭschodzie była nazva «muchamora». Na zachadzie — Hrodzienščynie i Brestčynie — hryb nazyvali jak i my ciapier «muchamoram».

Kropkava pa ŭsioj terytoryi Biełarusi hryb nazyvajecca «machamar». La Ivacevičaŭ i Hancavičaŭ hryb čaściakom mahli nazvać «mucharanka» (z naciskam na pieršy skład), tam ža jość krychu źmienienaja nazva — «mucharan». Na terytoryi ad Karmy, Čačerska, Žłobina i Rahačova vykarystoŭvali nazvu «machamora».

Padasinavik

Nazva «padasinavik» najbolš raspaŭsiudžana na poŭnačy Biełarusi, na poŭdni Minščyny i ŭschodzie našaj krainy.

Na poŭdni Homielskaj vobłaści, bližej da rasijskaj miažy, viedali słovy «krasnahałovik», «krasnahałoviec». Na poŭnačy Minščyny padasinavik nazyvali «krasnahałovikam», «asavikom», «asaviakom».

Na Paleśsi vy mahli pačuć takija varyjanty padasinavika: «saviak», «kraśniuk», «krasnałoviec», «asinavik».

Na Hrodzienščynie padasinavik nazyvali «asovič», «čyrvonik». Tam ža vykarystoŭvali i «krasnahałovik», i «padasinavik».

Maślak

Na poŭnačy Biełarusi vy mahli redka pačuć pra hety hryb, što jon maślak. Čaściej jaho nazyvali «kaźlakom», «kazłom», «kaziałkom». Darečy, tak nazyvali hryb i na zachadzie Minščyny. Tolki kropkava na Viciebščynie možna było pačuć niekalki varyjacyj maślaka — «maślanka» i «maśluk». Na Mahiloŭščynie amal na 100% karystalisia słovam «kazioł» u adnosinach da maślaka.

Na Hrodzienščynie, Brestčynie, Homielščynie bolš karystalisia mienavita słovam «maślak». Časam źmianiaŭsia da «maślenika» ci «maśluka».

Syraježka

Na Paleśsi syraježku nazyvali ŭłasna «syraježkaj». Byli i inšyja varyjacyi: «syrajažka», «suraježka», «syraježa», «syrajeha».

Na Homielščynie i Mahiloŭščynie la Dniapra syraježka nazyvałasia «syraviežkaj». U centralnaj Biełarusi najbolš raspaŭsiudžanaja nazva hryba — «suraviežka». Da prykładu, la Vilejki było svajo rehijanalnaje słoŭca dla syraježki — «syravieža».

Na samaj poŭnačy Biełarusi syraježku nazyvali «suraježa» ci «suraježyna».

Ababak

Najbolš varyjantaŭ nazvy hryba vy mahli by pačuć na poŭnačy Biełarusi. Naprykład, tam ža byli i «ababak», i «padbiarozavik». Rehijanalnyja słoŭcy, pra jakija vy mahli nie viedać, a heta ŭsio pra ababak, — «sušonik».

Na Hrodzienščynie ababak nazyvali «padbiarozavikam» ci «kaziakom». Na Brestčynie ababak byŭ «bieraźniakom». La Baranavičaŭ možna było pačuć słoŭca «saviak». Adnak čaściej na Paleśsi panavali nazvy «babka», «babki». Na Mahiloŭščynie ababak mahli nazyvać prosta «hrybkom».

Na Vilejščynie i Miadzielščynie ababak viedali jak «čaščavik». «Čaščevikom» nazyvali hety hryb na Maładziečanščynie, Smarhončyšnie i Astravieččynie.

• 2
• 0
• 0
• 0
• 0
• 0
• 0
• 0