Navukoŭcy ŭpieršyniu zafiksavali sparvańnie leapardavych akuł. Akazałasia, što ŭdzielničajuć samka i adrazu dva samcy VIDEA
Daśledčyk pabačyŭ, jak dva samcy trymali samku za hrudnyja płaŭniki, uklučyŭ kamieru GoPro — i staŭ čakać.
Jak paviedamlaje The Gardian, la bierahoŭ Novaj Kaledonii vučonyja ŭpieršyniu zmahli zafiksavać na videa praces sparvańnia leapardavych akuł u dzikaj pryrodzie.
Pa słovach aŭtara videa, doktara Huha Łaso (Hugo Lassauce) z Univiersiteta Sanšajn-Kosta (Aŭstralija), jon naziraŭ za papulacyjaj leapardavych akuł, kali zaŭvažyŭ niezvyčajnuju scenu.
«Padčas nyrańnia z maskaj ja zaŭvažyŭ na piasčanym dnie samku, jakuju dva samcy trymali za hrudnyja płaŭniki, — raspaviadaje navukoviec. — Ja adrazu padumaŭ: «Niešta pavinna adbycca — ja zastajusia tut sa svaimi kamierami GoPro». Praz hadzinu heta narešcie zdaryłasia».
Uvieś praces zaniaŭ krychu mienš za dźvie chviliny — dakładna 110 siekund. Pieršy samiec spraviŭsia za 63 siekundy, a druhi, jaki dziejničaŭ adrazu paśla jaho, — za 47.
«Paśla hetaha samcy stracili ŭsiu svaju enierhiju i nieruchoma lahli na dno, u toj čas jak samka aktyŭna papłyła preč», — dadaŭ Łaso.
Hety vypadak staŭ pieršym zafiksavanym nazirańniem za sparvańniem leapardavych akuł u ich naturalnym asiarodździ. Śpiecyjalist adznačaje, što repraduktyŭnyja pavodziny dzikich akuł u cełym zastajucca małavyvučanymi.
«Pavodziny akuł mocna adroźnivajucca ad pavodzin delfinaŭ, — kaža Łaso. — Dla delfinaŭ sparvańnie — heta zvyčajnaja sprava, jany robiać heta vielmi časta».
Pa słovach doktarki Kryścin Dadžon (Christine Dudgeon), ekśpiertki ŭ halinie marskoj ekałohii i evalucyi, jakaja pracavała ź leapardavymi akułami bolš za dva dziesiacihodździ, videa Łaso maje vielizarnaje značeńnie dla zachavańnia vidu. Jano śviedčyć, što terytoryja la Novaj Kaledonii źjaŭlajecca važnym miescam dla razmnažeńnia. Videazapis moža dapamahčy raspracavać stratehii kiravańnia i achovy pryrody.
Bolš za toje, redkija kadry mohuć dapamahčy ŭ daśledavańniach pa štučnym apładnieńni, nakiravanych na adnaŭleńnie papulacyi vidu, jakija ŭ ciapierašni čas pravodziacca ŭ niekalkich krainach, u tym liku ŭ Aŭstralii.
«Dziŭna i zachaplalna, što ŭ hetym vypadku paśladoŭna ŭdzielničali dva samcy, — kaža Dadžon. — Z punktu hledžańnia hienietyčnaj raznastajnaści nam važna vyśvietlić, kolki baćkoŭ udzielničaje ŭ stvareńni partyj jajek, jakija samki adkładajuć kožny hod».
Navukovy artykuł z padrabiaznym apisańniem hetaha traistaha sajuza apublikavany ŭ časopisie Journal of Ethology.
Chto zabaraniaje ŭ Biełarusi knihi — voś hetyja 22 čałavieki33
Kamientary