Chłopiec ź Indyi pastupiŭ vučycca ŭ Sankt-Pieciarburh, a ŭ jaho adabrali pašpart i adpravili na vajnu
30‑hadovy Rakieš Kumar ź Indyi pajechaŭ u Rasiju ŭ žniŭni, atrymaŭšy vizu dla navučańnia ŭ Sankt-Pieciarburhskim univiersitecie. Adnak užo praź niekalki tydniaŭ jon paviedamiŭ svajoj siamji, što byŭ prymusova zavierbavany ŭ rasijskuju armiju i rychtujecca da adpraŭki na front va Ukrainu.
Rakieš Kumar pajechaŭ u adzin z VNU ŭ Pieciarburhu pa vučebnaj vizie. Ale praź niekalki dzion u razmovie z svajakami ŭ Indyi jon pačaŭ namiakać, što znachodzicca ŭ ciažkim stanoviščy, piša The Times of India.
30 žniŭnia Rakieš paviedamiŭ bratu, što jaho prymusova pryzvali ŭ rasijskuju armiju i nieŭzabavie nakirujuć u zonu bajavych dziejańniaŭ va Ukrainie. Paśla hetaj razmovy telefon Rakieša staŭ niedastupny, a paźniej siamji dasłali jaho fatahrafiju ŭ vajskovaj formie.
Praź niekalki dzion Rakieš znoŭ patelefanavaŭ, na hety raz ź nieznajomaha rasijskaha numara. Jon raskazvaŭ, što ŭ jaho kanfiskavali pašpart i asabistyja dakumienty, vydalili elektronnuju poštu. Jon prajšoŭ padrychtoŭku na Danbasie pierad tym, jak jaho adpravili na pole boju. Heta byŭ apošni raz, kali siamja čuła pra jaho.
Rodnyja napisali ŭ MZS Indyi, a taksama źviarnulisia pa padtrymku ŭ indyjskuju ambasadu ŭ Maskvie i da miascovych uładaŭ.
«My navat nie viedajem, ci jon žyvy. My prosta chočam, kab urad viarnuŭ jaho dadomu», — kaža starejšy brat Rakieša.
Pavodle The Times of India, heta nie pieršy padobny vypadak za apošnija miesiacy. Jak minimum 20 hramadzian Indyi zajaŭlali, što ich zavabili ŭ Rasiju pad vyhladam navučańnia abo pracy, a zatym prymusili ŭstupić u rasijskuju armiju.
Kamientary
[Zredahavana]