Biełaruska Maryja Žodzik pryniesła Polščy adziny miedal na čempijanacie śvietu pa lohkaj atletycy — srebra
Biełaruska z polskim pašpartam, jakaja asudziła represii i vajnu, ustalavała asabisty rekord u najciažejšych umovach i pieramahła rekardsmienku śvietu. A jašče niadaŭna jana pracavała ŭ «Makdonaldsie».
Biełaruska Maryja Žodzik, jakaja vystupaje za Polšču, zavajavała srebra ŭ skačkach u vyšyniu na čempijanacie śvietu pa lohkaj atletycy ŭ Tokia. Heta adziny miedal dla zbornaj Polščy na turniry.
Žodzik ustalavała asabisty rekord, upieršyniu ŭ karjery ŭziaŭšy hrosmajstarskuju vyšyniu 2 mietry. Pryčym Maryja zrabiła heta ŭ najciažejšych umovach. Padčas spabornictvaŭ u Tokia pačałasia mahutnaja zaleva, jakoj nie dali rady mnohija favarytki.
U tym liku rekardsmienka śvietu z Ukrainy Jarasłava Mahučych — spartsmienka, najlepšy vynik jakoj 2 mietry 10 santymietraŭ, nie zmahła ŭziać 2 mietry i zastałasia z bronzaj. Miedal jana padzialiła ź sierbkaj Anhielinaj Topič.
A Žodzik, asabisty rekord jakoj składaŭ 198 santymietraŭ, 2 mietry ŭziała. Maksimalna dramatyčna, z treciaj sproby. Vyšynia 202 santymietry joj nie pakaryłasia. Čempijonkaj śvietu stała aŭstralijka Nikoła Olisłahiers. Jana ŭziała tyja ž 2 mietry, ale abyšła biełarusku z polskim pašpartam pa sprobach.
Maryja Žodzik naradziłasia ŭ Baranavičach. U 2020 hodzie padpisała list spartsmienaŭ suprać falsifikacyi vybaraŭ i milicejskaha hvałtu. A ŭ 2022 hodzie ŭ instahramie apublikavała post z asudžeńniem rasijskaj ahresii suprać Ukrainy. U tym ža hodzie Maryja pierabrałasia ŭ Polšču. Pieršy čas joj davodziłasia pracavać u «Makdonaldsie» i treniravacca samastojna. Ale potym jana znajšła miascovaha treniera, uładkavałasia ŭ spartovy kłub u Biełastoku, atrymała hramadzianstva i prabiłasia ŭ zbornuju Polščy. A ciapier stała srebnaj miedalistkaj čempijanatu śvietu.
Lohkaatlety sa zbornaj Biełarusi ad usich mižnarodnych spabornictvaŭ adchilenyja. Pazicyja kiraŭnictva suśvietnaj lohkaj atletyki takaja: jany nie viernucca, pakul vajna va Ukrainie nie skončycca.
Ciapier čytajuć
Stała viadoma imia jašče adnaho pałkoŭnika DFR, aryštavanaha KDB. Jon raskazvaŭ sukamiernikam, jak jaho katavali7
Kamientary