U Minsku skłali rejtynh samych darahich i tannych vulic. Roźnica ŭ canie značnaja

Daśledavańnie pakazała, što daražej za ŭsio abychodziacca kvatery ŭ novych kvartałach, a čakana tańniej kaštuje žyllo za kalcavoj, pobač z čyhunkaj i bujnymi zavodami. Roźnica ŭ košcie pamiž imi stała dvuchkratnaj, adznačyli pradstaŭniki placoŭki, piša Office Life.

Dzie znachodziacca samyja darahija vulicy

Samaj darahoj u stalicy akazałasia vulica Piatra Mścisłaŭca ŭ «Majaku Minska». Asabliva vysoka ceniacca kvatery ŭ pieršych damach uzdoŭž handlovaha centra. Jany budavalisia raniej za inšyja — i zabudova tam mienš ščylnaja i mienš vyšynnaja. Siaredni košt «kvadrata» dasiahnuŭ $2681.

Druhoje miesca zajmaje vulica Makajonka dziakujučy vyšynnym damam kala parku Čaluskincaŭ. Ceny na kvatery ź vidam na park dasiahajuć $2498 za «kvadrat».

Patrapiła ŭ top-3 i vulica Białhradskaja ŭ «Minsk-Śviecie» — $2498 za kv. m.

Radkom nižej akazałasia vulica bratoŭ Rajt u «Novaj Baravoj», jakaja znachodzicca za miežami horada. Ale na košt upłyvaje blizkaść da infrastruktury — dziciačych sadkoŭ, novaj palikliniki i centralnaj płoščy. Kvatery tam razychodziacca ŭ siarednim pa $2476 za kv. m.

Zamykaje piaciorku vulica Nikoły Tesły ŭ «Minsk-Śviecie». Tut kvatery na «druhasnym rynku» kaštujuć u siarednim $2239 za kv. m.

A dzie — samyja tannyja

Rejtynh samych tannych vulic uznačaliŭ pryharad Minska — vulica Akademika Krasina ŭ pasiołku Sosny, dzie siaredni košt kvadratnaha mietra składaje kala $1300.

Na druhim radku — vulica Majskaja ŭ Pryłukach: u siarednim $1301 za «kvadrat».

A voś na trecim radku ŭžo staličnaja vulica Karžanieŭskaha ŭ mikrarajonie Kurasoŭščyna — u siarednim $1320 za kv. m.

Na čaćviortym miescy akazałasia vulica Michasia Łyńkova ŭ Masiukoŭščynie, jakaja raściahnułasia ŭzdoŭž čyhunki. Siaredni košt — $1334 za kv. m.

Biudžetny śpis zamykaje vulica Aleha Kašavoha, jakaja źviazała Partyzanski praśpiekt z Traktarnym zavodam, — $1336 za kv. m.

Aŭtary rejtynhu ličać, što ŭ Minsku nie adčuvajecca padziełu na bahatyja i biudžetnyja rajony. Usio, jak praviła, zaležyć ad kancentracyi novabudoŭlaŭ abo staroha žyłoha fondu. U vyniku pobač z samaj darahoj vulicaj možna znajści chruščoŭki z dastupnym žyllom, a kali pierajści čyhunku, to pačynajecca Lebiadziny z bolš darahoj zabudovaj. Pry hetym popyt źmiaščajecca ŭ bok damoŭ, jakija pabudavanyja za apošnija 10‑15 hadoŭ. U toj ža čas raście papularnaść histaryčnaj zabudovy — kvatery ŭ stalinkach mohuć sychodzić pa vielmi vysokich koštach.

U svaju čarhu niezaležny ekśpiert pa žyłoj nieruchomaści Natalla Litoŭskaja adznačyła, što ŭ śpis nie patrapili tradycyjna darahija vulicy Minska — naprykład, Karła Marksa. Sprava ŭ tym, što ździełak tam mienš i analityki nie zmahli sabrać vybarku dla ŭklučeńnia ŭ rejtynh.

• 2
• 0
• 1
• 1
• 0
• 1
• 0
• 0