58‑hadovaj łahistcy dali kałoniju za kamientary ŭ internecie i nazvali terarystkaj
Juliju Zaroŭskuju asudzili pa troch palityčnych artykułach da pazbaŭleńnia voli. Ciapier jana za kratami, a niadaŭna jaje zrabili «terarystkaj», što jašče bolš uskładnić joj žyćcio ŭ źniavoleńni. Ahułam ciapier za kratami kala 200 palitźniavolenych žančyn.
Julii Zaroŭskaja 58 hadoŭ. Jana minčanka. U apošnija hady Julija pracavała łahistam u firmie, jakaja optam vyrablała i pradavała vyraby sa skury. Viadoma, što ŭ žančyny jość dzieci i ŭnuki.
Miarkujučy, pa sacsietkach, Julija padtrymała ruch za svabodnyja vybary ŭ 2020‑m i vystupała za mir va Ukrainie. Repościła jana i zvyčajnyja rečy — pryhožyja kvietki, fota svaich siabroŭ i svajakoŭ, zdymki z roznych mierapryjemstvaŭ.
Juliju zatrymali naprykancy minułaha hoda ci ŭ pačatku hetaha. Uvosień 2025‑ha jaje asudzili ŭ Minskim haradskim sudzie pa troch palityčnych artykułach — «raspalvańnie varožaści» (č. 1 art. 130 KK), «abraza pradstaŭnika ŭłady» (art. 369 KK) i «ŭvachodžańnie ŭ skład ekstremisckaha farmiravańnia» (č. 3 art. 361‑1 KK).
Prynamsi častka abvinavačańniaŭ źviazanaja z kamientarami Julii ŭ internecie, dakładnaja sutnaść ich nieviadomaja. Zaroŭskaj pahražała da šaści hadoŭ kałonii, ale i prysud nieviadomy.
Za apošni tydzień jaje imia dadali ŭ śpisy «ekstremistaŭ» i «terarystaŭ». Heta ŭskładnić joj žyćcio ŭ kałonii — ciapier Julii niemahčyma dasłać hrašovy pieravod ad svajakoŭ. U «terarysty» zapisali i 65‑hadovuju Natallu Vasillevu, asudžanuju za kamientary ŭ internecie.
Samaj pažyłoj žančynaj-palitźniavolenaj zastajecca Safija Bačurynskaja. Joj 70 hadoŭ.
Ciapier za kratami znachodzicca nie mienš za 205 palitźniavolenych žančyn.
«Naša Niva» — bastyjon biełaruščyny
PADTRYMAĆ
Kamientary