Jurkonis pra zakryćcio miežaŭ: Davajcie nie dumać jašče pra Pieciu z Baranavič, jaki choča zarabić dzieści tam u Biełastoku
Niekatoryja biełarusy, maŭlaŭ, narakajuć: zakryćcio litoŭska-biełaruskaj miažy nie mocna zakranaje intaresy Łukašenki, ale škodzić prostym biełarusam. Ci dumajuć pra heta litoŭskija ŭłady? «Biełsat» zadaŭ hetaje pytańnie dacentu Instytuta mižnarodnych adnosinaŭ i palityčnych navuk Vilenskaha ŭniviersiteta, kiraŭniku «Frydam Chaus» Vicisu Jurkonisu.
Nielha skazać, što ŭłady Litvy nie dumajuć pra biełarusaŭ. Tych, kamu patrebnaja dapamoha, u krainu ŭpuściać, kaža Vicis Jurkonis.
Jon nahadaŭ, što Litva nie całkam zakryła miažu, a zrabiła mnostva vyklučeńniaŭ: dla dypłamataŭ; sproščanaha tranzitu; viartańnia hramadzianaŭ Litvy, krain Jeŭrasajuza, Jeŭrapiejskaj ekanamičnaj zony i NATO; členaŭ ich siemjaŭ; zamiežnikaŭ ź litoŭskim vidam na žycharstva abo humanitarnymi vizami.
Da prykładu, praz «Miedniki» u Biełaruś iduć miedykamienty, jakich nie vyrablajuć u Biełarusi, i ich prapuskajuć. Padčas pratestaŭ i represij 2020 hoda Litva, niahledziačy na pandemiju karanavirusa, adkryła biełarusam humanitarny kalidor.
U toj ža čas Jurkonis ličyć, što tyja, chto prosta choča zarabić u Jeŭrasajuzie, nie mohuć ličycca paciarpiełymi ad zakryćcia miažy.
«Davajcie pierad tym, jak zmahacca z režymam i jahonaj biezadkaznaściu, dumać jašče pra Pieciu abo Mašu z Baranavičaŭ, jakija chočuć zarabić dzieści tam u Biełastoku, tak?» — aburajecca Jurkonis.
Kali ŭmoŭna stryječny brat eks-deputata Andreja Savinych zachoča palacieć da dački Savinych u Łondan, ci pavinny jaho ŭpuskać, razvažaje dalej ekśpiert. Ci apraŭdanyja abureńni ŭmoŭnaha pracoŭnaha tytuniovaj fabryki, jaki svajoj pracaj dapamahaje dziejnaj uładzie zarablać na cyharetach? A kali aburajecca ŭmoŭny radavy ajcišnik, varta pahladzieć ci nie traplaje jon u śpis vyklučeńniaŭ?
Tych vyklučeńniaŭ šmat, i heta ŭžo, adznačaje Jurkonis, vyklikaje pytańni ŭ niekatorych litoŭcaŭ.
«Davajcie hladzieć fundamientalna: my chočam kazać pra toje, jak vyrašyć prablemu abo zmahacca z nastupstvami? U Łukašenki ahresiŭnyja, brutalnyja pavodziny ŭ dačynieńni da svaich hramadzianaŭ, ahresiŭnyja ŭ dačynieńni da susiedziaŭ i hetak dalej».
Jurkonis pieraličvaje ahresiŭnyja dziejańni biełaruskich uładaŭ (instrumientalizacyja mihracyi, zachop samalota Ryanair, raźmiaščeńnie ŭ Biełarusi bajevikoŭ rasijskaj «hrupy Vahniera», a ciapier jašče i pavietranyja šary, što nie dajuć karystacca aeraportam u Vilni) i zadajecca pytańniem, jak na heta reahavać?
Litva, nahadvaje jon, užo ŭvodziła sankcyi, padavała pazovy ŭ mižnarodnyja sudy, prymianiaje ŭniviersalnuju jurysdykcyju. Na jahonuju dumku, Litva — ledź nie adzinaja kraina, jakaja prymianiaje taki šyroki kompleks zachadaŭ.
Surazmoŭca zaklikaje hladzieć na sukupnaść faktaraŭ. Bo šary, jakija zalacieli z terytoryi Biełarusi, zaminali nie tolki hramadzianam Litvy, ale i zamiežnikam — vierahodna, u tym liku i hramadzianam Biełarusi. Im ža taksama było niazručna, kali aeraport zakryvaŭsia i samalot nie moh prylacieć u punkt pryznačeńnia.
Nie čakać ža, pakul praz sutyknieńnie z šaram z cyharetami, na kantrabandzie jakich vidavočna zarablajuć kankretnyja «hamancy» Łukašenki, upadzie samalot, tłumačyć ekśpiert dziejańni litoŭskich uładaŭ.
«Moža spytajcie prapahandystaŭ, ci nie škada biełaruskamu režymu, što jany škodziać i biełaruskim hramadzianam? — prapanuje Jurkonis.
Na jahonuju dumku, pretenzii ŭ zakryćci miažy majuć być adrasavanyja realnym vinavatym — biełaruskim uładam. «Strełki čamuści pieravodzicie, kamu hetaje pytańnie zadavać», — ličyć Vicis Jurkonis.
Ci dojdzie sihnał da Łukašenki?
Zakryćcio miažy — časovy srodak, i nie adziny, adznačaje ekśpiert. Heta sihnał Alaksandru Łukašenku. Jon nahadvaje, što Litva, kali pačaŭsia mihracyjny kryzis, užo pryniała šerah zachadaŭ — i heta spracavała. Raźlik robicca na toje, što i ciapier heta spracuje.
Akramia taho, nielha zabyvać, što havorka idzie pra biaśpieku Litvy, praciahvaje ekśpiert. Jon upeŭnieny: treba pakazać Łukašenku, što hibrydnyja pahrozy niedapuščalnyja ŭ dačynieńni da Litvy i zaklikaje biełarusaŭ, hramadzianskuju supolnaść i niezaležnyja miedyja razumieć, što dziejańni Litvy, Polščy ci Jeŭraźviazu — heta sproba pakazać Łukašenku «niekatoryja miežy».
«Alternatyva hetamu — naohuł biaździejnaść, ihnaravańnie hetych prablemaŭ», — ličyć Jurkonis.
Kali zakryć litoŭska-biełaruskuju miažu tolki dla tavaraŭ, dyk hetyja tavary prosta pojduć praz Łatviju i Polšču, razvažaje Jurkonis.
Pakul režym Łukašenki nie pryznaje svajho dačynieńnia da zapusku pavietranych šaroŭ z kantrabandaj. «Heta nie my», «kali daviedziacie, što heta my, vybačymsia», kažuć u Miensku. U toj ža čas Jurkonis ličyć heta vidavočnym: maštab i rehularnaść zapusku šaroŭ, «uklučanaść» režymu Łukašenki ŭ kantrabandu tytuniovaj pradukcyi ŭ JEZ, maštabny kantrol usiaho ŭ Biełarusi — usio heta robić zajavy «my nie viedali» nie vielmi praŭdapadobnymi.
Surazmoŭca «Biełsata» aburany takim padychodam biełaruskaj ułady: «daviedziacie — vybačusia». Pakolki, kali adbudziecca trahiedyja, dyk nijakija prabačeńni nie dapamohuć.
Jaho biantežyć toje, što sami biełarusy «hatovyja zmahacca z samavolstvam, z tym, što ich bjuć, kryŭdziać, katujuć», ale pry hetym pytajucca, čamu Litva zakryła miažu. Nie Litva vinavataja ŭ tym, što zakrytaja miaža, a režym Łukašenki, pierakanany Vicis Jurkonis.
Litva ž, paŭtaraje jon, imkniecca padymać pytańnie pra mižnarodnuju adkaznaść Łukašenki, padtrymlivaje demakratyčnyja siły Biełarusi i prymaje biełarusaŭ, jakija majuć patrebu ŭ mižnarodnaj abaronie.
Biełarusy, jakija chočuć žyć u demakratyčnaj krainie, ź jakoj možna svabodna jeździć za miažu i svabodna zarablać u inšych krainach, pavinny razumieć, što hałoŭnaja pieraškoda hetamu — režym Łukašenki, a nie dziejańni susiednich krainaŭ, pierakanany Vicis Jurkonis. Jon prosić u pieršuju čarhu dumać pra hetuju pieraškodu i imknucca vyrašyć hetuju prablemu.
Ciapier čytajuć
Akademiju KDB budujuć prosta na Załatahorskich mohiłkach. Ź ziamli dastajuć pareštki minčukoŭ, jakich tut chavali sotni hadoŭ22
Kamientary