Zorku «Brydžertonaŭ» nazvali samym seksualnym mužčynam śvietu — 2025
Anhlijski akcior Džonatan Bejli — samy seksualny mužčyna śvietu 2025 hoda pavodle viersii amierykanskaha časopisa People. Jon adkryty hiej.
«Nastaje momant, kali aziraješsia nazad i kažaš sabie: «Vaŭ!»»
«Hety 37‑hadovy anhličanin, jaki vypramieńvaje šarm, daścipnaść i pryvabnaść, staŭ adnym z samych abajalnych akcioraŭ Halivudu. Choć sam jon usio jašče pryvykaje da hetaj uvahi», — apisvaje Džonatana Bejli vydańnie People.
U intervju hetamu časopisu akcior pryhadaŭ, što ŭpieršyniu ŭśviadomiŭ svaju papularnaść u 2020‑m — adrazu paśla vychadu sieryjała Netflix «Brydžertony», u jakim jon syhraŭ adnu ź viadučych rolaŭ, nahadvaje Bi-bi-si.
«Adnaho ranku ja pačuŭ: «Heta — naviny a siomaj, ale pierad hetym pahavorym pra Džonatana Bejli!» Ja padumaŭ: «Heta ŭvohule realna?» — pryhadvaje akcior.
U 2023‑m Bejli źniaŭsia ŭ minisieryjale «Padarožniki». Heta rola pryniesła jamu naminacyju na premiju «Emi» ŭ katehoryi «Najlepšy akcior druhoha płanu ŭ minisieryjale ci filmie».
U 2024‑m Bejli syhraŭ prynca Fyjera ŭ ekranizacyi viadomaha bradviejskaha miuzikła «Čaradziejka», a ŭletku 2025‑ha — doktara Hienry Łumisa ŭ błokbastary «Śviet Jurskaha pieryjadu: Adradžeńnie».
U listapadzie hetaha hoda na vialikija ekrany pavinien vyjści jašče adzin film z udziełam Bejli — «Čaradziejka. Častka 2».
«Nastaje momant, kali aziraješsia nazad i kažaš sabie: «Vaŭ!» — i raduješsia tamu, što možaš rabić toje, pra što maryŭ», — havoryć akcior.
«Bro, ty nie pavieryš, dzie apyniešsia»
Džonatan Bejli vyras u sielskaj častcy Oksfardšyra — hrafstva na poŭdni Anhlii — z tryma starejšymi siostrami, maci Kerał i baćkam Ściuartam.
Sam jon apisvaje siabie jak «zanadta enierhičnaje i navat dakučlivaje» dzicia, jakoje «ciažka było strymać».
Bejli vyrašyŭ stać akcioram u piać hadoŭ, kali babula paviała jaho na miuzikł «Olivier!», a ŭžo ŭ siem hadoŭ sam Džonatan vystupaŭ z Karaleŭskaj šekśpiraŭskaj trupaj u Łondanie.
Siońnia akcior uspaminaje, što pieršymi «krašami» dla jaho ŭ dziacinstvie stali prync Eryk z «Rusałački» i Tryni Kvan z «Mahutnych rejndžaraŭ».
Pryhadaŭšy svajo dziacinstva i junactva, Bejli kaža, što sabie piatnaccacihadovamu jon paraiŭ by rychtavacca da «varjackaha padarožža» ŭ budučyniu: «Bro, ty nie pavieryš, dzie apyniešsia. Usio budzie dobra, choć i nie vielmi roŭna. Ty sustrenieš nievierahodnych ludziej. I daviaraj instynktam — jany ciabie nie padviaduć».
«Siabry buduć u šoku, što ja im pra heta nie skazaŭ»
Džonatan Bejli śćviardžaje, što nikoli nie ličyŭ siabie seksualnym, tamu navinu pra pryznańnie jaho «samym seksualnym mužčynam śvietu 2025» spačatku ŭspryniaŭ jak absurd.
«Viadoma, mnie niejmavierna pryjemna. Heta vialiki honar», — havoryć akcior i dadaje, što da aficyjnaha abviaščeńnia hetaj naviny raspavioŭ pra jaje tolki svajmu sabaku.
«Siabry buduć u šoku, što ja im pra heta nie skazaŭ, ale potym, napeŭna, zakryčać ad radaści», — kaža Bejli.
Siońnia jon apisvaje siabie jak «niejmavierna ščaślivaha čałavieka».
«Žyćcio — atrakcyjon dla ŭsich, kim by ty ni byŭ i adkul by ni pryjšoŭ. Hałoŭnaje — pakul ty ŭ hetaj pajezdcy, azirajsia navokał, pierakanajsia, što ŭsie pobač i ŭ paradku», — raić Bejli inšym.
Mara pra vijałančel i francuzskuju movu
«Kožny mužčyna pavinien mieć siabra hieja», — ličyć Bejli.
Sam jon zrabiŭ kaminhaŭt u 2018-m, a ŭ 2024 hodzie zasnavaŭ dabračynny fond The Shameless Fund, jaki padtrymlivaje ŁHBTK+ arhanizacyi, što zmahajucca sa styhmaj.
«Jość stolki ludziej, jakija chočuć rabić niejmaviernyja rečy, ale adčuvajuć, što nie mohuć. Ciapier ŁHBT-siektar pad vialikim ciskam, tamu dla mianie vialiki honar sustrakać takich śpiecyjalistaŭ i bačyć, kolki patencyjału vakoł», — havoryć akcior.
Jon maryć stać baćkam i ličyć, što zarukaju ŭdałych stasunkaŭ źjaŭlajucca kamunikacyja, sumlennaść i ščyraje zachapleńnie pośpiechami partniora.
Bejli — adzin z papularnych Instagram-błohieraŭ: ciapier na jaho staronku padpisanyja bolš za 5,7 miljona čałaviek. Adnak sam jon pryznajecca, što starajecca nie čytać kamientary pad svaimi pastami.
«Rablu heta redka, mahčyma, raz na miesiac», — śćviardžaje akcior.
Siarod jaho maraŭ — navučycca hrać na vijałančeli i vyvučyć francuzskuju movu.
U 2024 hodzie samym seksualnym mužčynam śvietu nazvali akciora i režysiora Džona Krasinski, u 2023 hodzie — Patryka Dempsi.
Kamientary