Minsk i Vilnia siońnia praviaduć pieramovy pa zachrasłych u Biełarusi hruzavikach
Pradstaŭniki litoŭskich i biełaruskich pamiežnych słužbaŭ 18 listapada praviaduć techničnyja pieramovy nakont viartańnia hruzavikoŭ, jakija zatrymalisia ŭ Biełarusi, pra heta paviedamili ŭ Słužbie dziaržaŭnaj achovy Litvy. Pa vynikach pieramoŭ litoŭski bok budzie rašać, kali adkryjuć miažu.
Pradstaŭnik Słužby achovy dziaržaŭnaj miažy (VSAT) Hiedrus Mišucis paviedamiŭ, što na techničnym uzroŭni na miažy pavinny sustrecca namieśniki kiraŭnikoŭ słužbaŭ.
Pa vynikach pieramoŭ litoŭski bok budzie rašać, kali adkryjuć miažu.
Staršynia Kamiteta pa zamiežnych spravach Siejma Remihijus Motuzas paviedamiŭ LRT, što adkryćcia miažy patrabujuć nie tolki litoŭskija pieravozčyki, ale i Kitaj, a taksama krainy Centralnaj Azii, jakija niezadavolenyja parušanymi łancužkami pastavak.
«Siońnia my bolš padkreślivajem prablemu našych pieravozčykaŭ. Tak, jana isnuje, jana vielmi važnaja, ale jak dypłamaty my viedajem, što hetaja prablema ŭźnikła ŭ bolš šyrokim maštabie. Centralnaja Azija, Kitaj, inšyja krainy taksama niezadavolenyja, tamu što byli parušanyja roznyja łancužki pastavak i ruch tavaraŭ. Tamu hetaja prablema značna bolš važnaja», — skazaŭ Motuzas.
Vice-prezident Litoŭskaj nacyjanalnaj asacyjacyi aŭtamabilnych pieravozčykaŭ Linava Aleh Tarasaŭ paviedamiŭ radyjo LRT, što, pavodle apošnich dadzienych, na śpiecyjalnyja parkoŭki ŭ Biełarusi pieravieziena kala 1,25 tysiačy ciahačoŭ i paŭpryčepaŭ, a pa ŭsioj terytoryi Biełarusi pryparkavana kala 2 tysiač.
Napiaredadni ministr zamiežnych spraŭ Litvy Kiastucis Budrys zajaviŭ, što dva časova zakrytyja pahraničnyja punkty ź Biełaruśsiu mohuć adkryć raniej, čym płanavałasia.
Litva zakryła miažu ź Biełaruśsiu ŭ kancy kastryčnika da 30 listapada paśla taho, jak pavietranuju prastoru krainy niekalki razoŭ parušali mieteazondy ź Biełarusi, u vyniku čaho zakryvaŭsia aeraport Vilni.
U vyniku zakryćcia litoŭska-biełaruskaj miažy z-za mietearałahičnych zondaŭ u Biełarusi zastalisia kala 1100 litoŭskich fur. Łukašenka zahadaŭ brać ź litoŭskich dalnabojščykaŭ pa 120 jeŭra za sutki na stajancy, a ŭ tych, chto nie budzie płacić, zabirać mašyny.
11 listapada ministru zamiežnych spraŭ Biełarusi Maksimu Ryžankovu daručana pačać pieramovy ź litoŭskimi kalehami. Alaksandr Łukašenka pastaviŭ zadaču narmalizavać situacyju na miažy i damovicca pra adkryćcio punktaŭ propusku.
Kamientary