Małady biełarus u ZŠA napaŭ na svaju dziaŭčynu i pahaliŭ joj hałavu — kali taja daviedałasia, što jon žanaty
35‑hadovy biełarus Uładzimir Alaksiejeŭ, jaki žyvie ŭ Piensilvanii, byŭ aryštavany ŭ Paŭdniovaj Fłarydzie. Jon nakinuŭsia na dziaŭčynu z nažom i dušyŭ jaje.
Uładzimir Alaksiejeŭ — 35‑hadovy emihrant, udzielnik akcyj salidarnaści biełarusaŭ u Amierycy. Jon pierajechaŭ u ZŠA z žonkaj i dziećmi, asieŭ u Ryčbara, maleńkim haradku ŭ Piensilvanii, na paŭdarozie ź Ńju-Jorka ŭ Fiładelfiju.
Para zastavałasia ŭ šlubie, adnak va Uładzimira tym časam paralelna pačaŭsia raman ź inšaj dziaŭčynaj. Kali ž jana daviedałasia, što biełarus schavaŭ ad jaje svoj šlub, to razarvała adnosiny. Heta daviało Alaksiejeva da šalenstva.
24 lipienia 2025 hoda jon pryjechaŭ da dziaŭčyny ŭ Paŭdniovuju Fłarydu i napaŭ na jaje kala žyłoha kompleksu ŭ Nort-Majami-Bič.
Dziaŭčyna raskazała palicyi, što biełarus zahadaŭ joj vyjści na vulicu, dzie čakaŭ jaje ŭ čornym usiedarožniku BMW. Uładzimir dastaŭ nož, pahražaŭ zabić i vykinuć cieła ŭ akijan. Pakul jana sprabavała vyrvacca, jon parezaŭ joj pieradplečča, nacisnuŭ kalenam na horła i z dapamohaj elektryčnaj mašynki sastryh častku vałasoŭ. Zatym jon nanios joj niekalki ŭdaraŭ kułakami, pierš čym dziaŭčynie ŭdałosia vyrvacca i źviarnucca pa dapamohu.
Alaksiejeŭ uciok, ale ŭrešcie byŭ aryštavany. Jamu vystavili abvinavačvańni ŭ ździajśnieńni niekalkich ciažkich złačynstvaŭ, uklučajučy ciažki napad z vykarystańniem śmiarotnaj zbroi, ciažkaje źbićcio z pryčynieńniem cialesnych paškodžańniaŭ, niezakonnaje pazbaŭleńnie voli z užyvańniem śmiarotnaj zbroi, chatni hvałt šlacham zadušvańnia, a taksama drobnaje chulihanstva, źviazanaje z napadam i źbićciom.
Niekalki miesiacaŭ tamu biełarusa karali za pieravyšeńnie chutkaści. Tady jamu dali 180 dalaraŭ štrafu.
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»22
Kamientary