«Vinavaty bolš za ŭsich». Doktar, jaki pastaŭlaŭ kietamin akcioru Mećju Pery, atrymaŭ 2,5 hoda turmy

Mećju Pery. Fota: Phillip Faraone / Getty Images

Amierykanski sud prysudziŭ da 2,5 hadoŭ turemnaha źniavoleńnia kalifarnijskaha doktara, jaki pastaŭlaŭ kietamin zorcy telesieryjała «Siabry» Mećju Pery. Akcior pamior ad pieradaziroŭki hetym narkotykam u kastryčniku 2023 hoda, piša Bi-bi-si.

Doktar Salvador Płasiensija staŭ pieršym abvinavačanym, jaki atrymaŭ termin za zabieśpiačeńnie Pery kietaminam. Usiaho pa hetaj spravie prachodziać piać čałaviek, u tym liku jašče adzin doktar, asabisty pamočnik akciora i dvoje vinavatych u pradastaŭleńni akcioru dozy, jakaja stała pryčynaj jaho śmierci. Usie jany pryznali svaju vinu i buduć asudžanyja ŭ najbližejšyja miesiacy.

Paśla śmierci Pery fiederalnyja ŭłady ZŠA praviali maštabnaje rasśledavańnie, u chodzie jakoha ŭstanavili, što jon atrymlivaŭ kietamin praz padpolnuju sietku pa pastaŭkach narkotykaŭ, jakaja pracavała ŭ Halivudzie.

Pery byŭ najbolš viadomy pa roli daścipnaha Čendlera Binha ŭ papularnym sieryjale «Siabry». 54‑hadovy Pery pamior ad pieradaziroŭki, da hetaha jon na praciahu mnohich hadoŭ pakutavaŭ ad depresii i zaležnaści ad narkotykaŭ.

Siamja akciora prasiła sudździu prysudzić Płasiensiju da doŭhaha terminu, zajaviŭšy, što jon «vinavaty bolš za ŭsich» inšych abvinavačanych.

Maci Pery Śjuzan Morysan raskazvała ŭ sudzie pra tekstavyja paviedamleńni Płasiensii, u jakich toj nazyvaŭ akciora «id**tam» i razvažaŭ pra toje, kolki jon hatovy zapłacić za narkotyki. «U hetym čałavieku nie było ničoha idyjockaha», — skazała jana Płasiensiju padčas pasiadžeńnia suda.

«Apraŭdańniaŭ być nie moža». U čym mienavita abvinavačvajuć doktara

U adkaz doktar prynios členam siamji Pery prabačeńni i raskajaŭsia ŭ svaich dziejańniach. U hety momant na adnym ź siadzieńniaŭ zzadu płakała jaho ŭłasnaja maci.

Płasiensija skazaŭ, što ŭ jaho jość dvuchhadovy syn. «Ja chaču jaho vyraścić. I dumaju, jak jamu ŭsio heta rastłumačyć, — skazaŭ doktar. — Ja sam siabie padvioŭ. Apraŭdańniaŭ być nie moža. Viarnuć nazad toje, što zroblena, niemahčyma. Ja heta viedaju. Ja pavinien byŭ jaho abaranić, jak skazała jaho maci. Prabačcie mianie»

Pa abvinavačvańniach, vystaŭlenych Płasiensiju, jamu pahražaŭ termin da 40 hadoŭ, adnak prakurory prasili prysudzić jaho da troch hadoŭ źniavoleńnia.

U svaim liście ab pryznańni viny Plesiensija tłumačyŭ, što jaho klinika adčuvała finansavyja ciažkaści, i choć jon bačyŭ prykmiety zaležnaści Pery ad narkotykaŭ, prapanova «vialikich sum hrošaj akazałasia pryvabnaj».

Kietamin — dysacyjatyŭny aniestetyk, jaki, pa dadzienych Upraŭleńnia pa baraćbie z narkotykami ZŠA, vałodaje halucynahiennymi efiektami. Jon moža skažać hladzielnaje i słychavoje ŭsprymańnie i vyklikaje ŭ spažyŭca pačućcio adchilenaści i straty kantrolu.

Jon vykarystoŭvajecca ŭ jakaści injekcyjnaha aniestetyka dla ludziej i žyvioł, pakolki dazvalaje pacyjentam nie adčuvać bol i adchilicca ad rečaisnaści.

Pa słovach śledčych, heta rečyva pavinna ŭvodzicca tolki doktaram, a pacyjenty, jakija prymali preparat, pavinny znachodzicca pad nahladam śpiecyjalista z-za mahčymych nastupstvaŭ dla zdaroŭja.

Pery lehalna prymaŭ kietamin pa recepcie doktara, ale sprabavaŭ atrymać z roznych krynic bolšyja dozy, čym jamu vypisvali.

U liku abvinavačanych — niekalki daktaroŭ i Džaśvin Sanha, jakuju prakurory nazvali «kietaminavaj karalevaj» — jana pastaŭlała vialikija abjomy kietaminu Pery i inšym ludziam.

Pa dadzienych prakuratury, Płasiensija (jaki taksama byŭ viadomy jak «doktar P.») rabiŭ Pery injekcyi kietaminu ŭ jaho doma, a taksama na stajancy akvaryuma, raźmieščanaha prykładna za 30 km ad Łos-Andželesa.

Płasiensija taksama navučyŭ pamočnika Pery Kieneta Ivamasu, jak rabić ukoły kietaminam, i pradavaŭ jamu dadatkovyja dozy narkotyku. Jak kažuć prakurory, tolki z 30 vieraśnia pa 12 kastryčnika 2023 hoda jon pradaŭ akcioru 20 ampuł z kietaminam pa 100 milihramaŭ kožnaja, a taksama kietaminavyja tabletki i šprycy.

U abvinavaŭčym zaklučeńni skazana, što Płasiensija i inšyja abvinavačanyja «skarystalisia zaležnaściu Pery dla asabistaha ŭzbahačeńnia».

• 0
• 0
• 0
• 0
• 0
• 0
• 0
• 0