Ci paśpiejuć biełaruskija spartoŭcy adabracca na Zimovuju Alimpijadu?
Učora Spartyŭny arbitražny sud (CAS) abviaściŭ, što častkova zadavoliŭ apielacyju biełaruskich frystajlistaŭ na niadopusk da Alimpijskich hulniaŭ-2026. Chutka Mižnarodnaja fiederacyja łyžnych vidaŭ sportu (FIS), da jakoj naležyć i frystajł, zajaviła pra pryznańnie rašeńnia CAS. Kab trapić na Zimovuju Alimpijadu, što pačniecca praz dva miesiacy, treba paśpieć prajści kvalifikacyjnyja spabornictvy. «Trybuna» pahladzieła, ci jość u biełarusaŭ šancy. Našy frystajlisty z 1998 hoda pryvozili miedali z Hulniaŭ.
Pieršaj u piaciorcy była ŭkazanaja ŭładalnica zołata AH-2018 i srebra-2022 Hanna Huśkova. Jana — čempijonka Biełarusi i sumiesnaha z rasijanami «Kubka čempijonaŭ», jaki prajšoŭ na pačatku 2025‑ha (z taho času spabornictvaŭ nie było, u frystajle karotki siezon). Na miescy apynulisia taksama Hanna Dziaruha i Anastasija Andryjanava — jany dapoŭnili pjedestał vyšejzhadanych turniraŭ. Z mužčyn ža z top-3 biełaruskaha pieršynstva ŭ poźvie byŭ pradstaŭleny tolki adzin — pryčym nie Makar Mitrafanaŭ z zołatam, a Ihar Drabiankoŭ z srebram. Piaty ŭkazany CAS udzielnik — 18‑hadovy Uładzisłaŭ Vaźniuk, sierabrysty pryzior ČB-2024.
Razhledzieŭšy pazoŭ, u CAS pastanavili, što spartsmieny, jakija adpaviadajuć kryteram indyvidualnych niejtralnych atletaŭ (AIN) ad Mižnarodnaha alimpijskaha kamiteta, pavinny być dapuščany FIS da kvalifikacyjnych spabornictvaŭ da Hulniaŭ-2026. Sudździ pahadzilisia, što ban «parušaje statut FIS i supiarečyć pryncypam palityčnaj niejtralnaści i niedyskryminacyi».
Biełaruski bok taksama patrabavaŭ niekatorych źmien u ŭstalavańni i prymianieńni kryteraŭ adpaviednaści niejtralnamu statusu, ale ŭ hetaj častcy pazoŭ byŭ adchileny.
U FIS praktyčna adrazu zajavili, što prymajuć rašeńnie CAS, pry hetym navat udakładnili, što razumiejuć jaho jak dazvoł padavacca na niejtralny status ź Biełarusi i Rasii jak lubym spartsmienam, tak i «piersanału ź miedycynskaj i techničnaj funkcyjaj». Usim pretendentam prapanavali nakiroŭvać zapyt na status pa elektronnaj pošcie z nastupnaj pravierkaj na niejtralnaść pa tych ža kryterach, što i ŭ MOK, z boku śpiecyjalnaj kamisii FIS — pa vynikach paabiacali apublikavać śpis tych, kaho dapuścili.
Nahadajem, što biełaruski režym trochi navučyŭsia na svaich pamyłkach pierad Hulniami-2024 i zabaronienuju MAK prynaležnaść spartsmienaŭ da «siłavikoŭ» bolš nie raskryvaje, dy i ŭvohule starajecca bolš zapisvać da «minsporta». Chiba što niešta znojduć u sacsietkach — usio jašče nielha padtrymlivać vajnu i publikavać dziaržaŭnuju simvoliku.
Ci nie zatrymaje kamisija z rašeńniem? Tut možna tolki zdahadacca. Adnak jość paralelny prykład u sannym sporcie (u Biełarusi nie raźvity) — 31 kastryčnika CAS abviaściŭ ab zadavalnieńni anałahičnaj apielacyi z Rasii, u Mižnarodnaj fiederacyi sannaha sportu ciahnuli da 19 listapada, ale ŭžo 23‑ha rasijanie daviedalisia kankretnyja šeść proźviščaŭ tych, kaho dapuścili.
Dobraja navina ŭ hetaj situacyi: u frystajlistaŭ Kubak śvietu jašče ŭvohule nie pačaŭsia. Pieršy etap projdzie 6‑8 śniežnia ŭ Finlandyi — krainie, dzie zahadzia pahražali nie puskać «niezaležnych spartoŭcaŭ» na svaju terytoryju navat pry najaŭnaści dopusku. Ale propusk hetaha spabornictva pa luboj pryčynie — uvohule nie krytyčny.
Dalej — etapy ŭ Kitai, Kanadzie (dzie kampaktna adrazu dva starty) i dvojčy ŭ ZŠA. Usie hetyja krainy trapić biełaruskim spartsmienam siońnia realna.
Čysta technična adabracca na Alimpijadu nieskładana. Hałoŭny spartyŭny kryteryj — rejtynh za dva siezony, papiaredni i budučy, jaki sfarmirujuć 19 studzienia. U im treba patrapić u top-22 lepšych (ź jakoha jašče kaho-niebudź vyklučać z-za abmiežavańnia ŭ 4 čałaviek na krainu), nabraŭšy minimum 80 ačkoŭ (u kancy top-22 u spartsmienaŭ pakul mienš). Pry hetym, jak my ŭžo raskazvali, za pieramohu na etapie KS dajecca +100, za šostaje miesca, naprykład, +40, za 13‑ie — +20.
Dla dopusku da samich etapaŭ patrebny ački FIS, ale jakraz u top-3 žanočaj kamandy z hetym niama prablem — z 2022‑ho ich rejtynh zamarožany, u toj ža Huśkovaj zastalisia vielizarnyja 700 ačkoŭ (kali b ich uličyli ŭ zaliku na AH, jana stała b lidaram rejtynhu). Minimalna nieabchodnyja 50 bałaŭ zachoŭvajucca i ŭ čatyroch mužčyn — toj ža Vaźniuk paśpieŭ nabrać ich na pačatku 2022‑ho na etapie Kubka Jeŭropy ŭ Raŭbičach. Zastajecca trapić na etapy fizična i tam prosta vystupić u svaju siłu.
A što ŭ inšych łyžnych padvidach? Na AH-2022 pradstaŭnictva było ścipłaje: čatyry čałavieki ŭ łyžnych honkach i adzin u hornych łyžach. I tam, i tam zachoŭvajucca pa adnoj bazavaj kvocie dla mužčyny i žančyny — ich dajuć uvohule ŭsim, prosta treba nie pierabrać dosyć prostuju płanku ačkoŭ FIS (tut lik naadvarot — čym bolš, tym horš). Usie finalnyja padliki — taksama 19 studzienia.
U łyžnych honkach užo prajšoŭ adzin etap, ale napieradzie jašče šmat. U Biełarusi jość Hanna Karalova i Hanna Mačechina, jakija zdolnyja zajechać u top-20 u mocnym Kubku Rasii (a na čempijanacie hetaj krainy ŭ sakaviku ŭziali bronzu ŭ kamandnym spryncie, ale kamandy na Alimpijadzie pa-raniejšamu zabaronienyja dla «niejtralnych»). U mužčyn tołkam i vyłučyć nikoha, chiba što tolki eks-bijatłanist Raman Jalotnaŭ.
U hornych łyžach pa-raniejšamu adzin kandydat na AH — udzielnica čatyroch papiarednich, naturalizavanaja rasijanka, užo 36‑hadovaja Maryja Škanava, jakaja ŭ kancy 2024‑ho pieramahła na pary etapaŭ Kubka Rasii. U hetym hodzie pra jaje nie čuvać, ale ŭ sakaviku jana pahražała patrapić u top-15 na AH. Varyjantaŭ pasprabavać svaje siły na Kubku śvietu pry najaŭnaści dopusku chapaje.
Biełaruskija bijatłanisty pakul pa-za Hulniami.
Kamientary