Śpiavačka Kacia Vołkava raskazała, jak jaje ŭhavorvali vystupić na kancercie da vybaraŭ-2020 i čamu jana źjechała

Kacia Vołkava — biełaruskaja śpiavačka i aŭtarka piesień, jakaja apošnija hady buduje novaje žyćcio ŭ Hiermanii. Raniej jana ŭdzielničała ŭ kastynhu šou «Chaču ŭ VIA Hru», paśla budavała solnuju karjeru. U 2020‑m jaje zatrymali na žanočym maršy i dali 12 sutak.

Na svaim jutub-kanale śpiavačka padrabiazna raspaviała pra toje, što vymusiła jaje pakinuć radzimu. Nahodaj dla ščyraj spoviedzi stała rezanansnaja historyja kalehi pa cechu Alaksieja Chlastova, jaki paśla papadańnia ŭ «čornyja śpisy» pajšoŭ pracavać u taksi.

Pa słovach Vołkavaj, prablemy z karjeraj u jaje pačalisia za hod da vybaraŭ, kali hrymnuła pandemija. U toj čas jak ułady śćviardžali, što «karanavirusa nie isnuje», u artystaŭ masava admianialisia vystupleńni.

«U mianie admianili ŭsie vystupleńni, usie kancerty. Ja jašče tady pracavała ŭ roli viadučaj. I ŭ mianie admianili prosta ŭsie karparatyvy, usio, što ŭ mianie było, a ŭ mianie jašče visieŭ kredyt», — uspaminaje śpiavačka.

U toj ža čas źmianiŭsia miechanizm vypłaty aŭtarskich adličeńniaŭ za ratacyju piesień na radyjostancyjach — raniej jany kožny miesiac prynosili śpiavačcy «plus-minus dobry zarobak siaredniestatystyčnaha biełarusa». Ale ŭ adzin momant hety dachod «prosta skaraciŭsia ŭ 10 razoŭ»:

«Ja pryjechała ŭ hetuju arhanizacyju pa aŭtarskim pravie i kažu: «A mianie što, stali mienš krucić pa radyjostancyjach? Čamu minus nul?». (…) I jany mnie kažuć: «Vas nie stali mienš krucić». Prosta ŭviali niejki padatak na padatak, (…) i voś hetaja staŭka, jakuju raniej za adno prakručvańnie atrymlivali — nu, umoŭna, 10 dalaraŭ (…) ciapier stała 1 dalar», — raspaviadaje Vołkava.

U vyniku, śćviardžaje Vołkava, aŭtarskija adličeńni «syšli prosta na ništo». A kancertnaja praca ŭžo i tak była źniščanaja pandemijaj.

Prapanova vystupić na kancercie da vybaraŭ

Letam 2020‑ha za tydzień da vybaraŭ, kali śpiavačka siadzieła biez hrošaj, joj patelefanavali z prapanovaj vystupić na kancertach pa ŭsioj krainie. Heta pavinny byli być kancerty ŭ «dni cišyni», kali ahitacyja zabaroniena. Hanarar paabiacali ŭ try razy vyšejšy za zvyčajny.

«Ja prosta była nastolki hałodnaja da kancertaŭ i hrošaj, što ja razumieła mazhami, što heta źviazana z palitykaj, ale ja 10 razoŭ zadała pytańnie: heta sapraŭdy nie źviazana z palitykaj?», — raskazvaje jana.

Adnak u dalejšaj razmovie, jak zhadvaje śpiavačka, vyśvietliłasia, što nie ŭsie tak prosta:

«Nastupnaje pytańnie takoje: «Nu, ty ž heta, ničoha tam nie pościš apazicyjnaha?». A ja na toj momant užo kankretna vykazvała svaju pazicyju. Ja kažu: «Pošču». I mnie kažuć: «Davaj tak. Ty zaraz vydališ usio, što ŭ ciabie jość u sacyjalnych sietkach apazicyjnaha, i nie vychodziš 9 žniŭnia paśla hałasavańnia na pratest». Mnie jak by za tydzień skazali, chto pieramoža na hałasavańni, što buduć pratesty i što vychodzić na hetyja pratesty nielha».

Bolš za toje, pa słovach Vołkavaj, jaje papiaredzili: kali jaje zaŭvažać na pratestach ci ŭbačać «apazicyjnuju simvoliku» ŭ jaje sacsietkach, hrošaj za vystupleńnie jana nie atrymaje.

«Pahladzieła hałodnymi vačyma na hety kavałak kinutaha miasa i skazała: dziakuj, ale ničoha vydalać z svaich sacyjalnych sietak ja nie budu», — zhadvaje śpiavačka.

«Mianie pravodzili praz pašpart čužoj śpiavački»

Paśla ŭdziełu ŭ pratestach i sutak śpiavačka trapiła ŭ čornyja śpisy. Vołkava pryznajecca, što nadyšli «hałodnyja časy». Jana telefanavała ŭsim znajomym, prosiačy choć niejkuju pracu. Niekatoryja arhanizatary ryzykavali, kab dapamahčy joj.

«Było niekalki kancertaŭ, kali dziaržaŭnyja arhanizacyi, u jakich pracavali narmalnyja adekvatnyja ludzi, mnie dali pracu i pravodzili mianie praz pašpart čužoj śpiavački», — dzielicca Vołkava i zhadvaje, što ŭžo ŭ toj čas joj telefanavali sa Śledčaha kamiteta i vyklikali tudy.

«Ja skazała: «Dasyłajcie pozvu». Ale pozvu mnie nie dasłali. Ale strašna było da žachu. Ja tady straciła spakoj, son, piła žorstkija antydepresanty», — zhadvaje śpiavačka.

Jak tłumačyć Vołkava, u toj čas jana kančatkovy vyrašyła źjechać z krainy. Ale dla hetaha patrebny byli hrošy. Jana pačała šukać pracu pa ŭsich znajomych.

«Niekatoryja ludzi mianie brali vystupać u svaje kalektyvy. Heta značyć nidzie nie było na afišach Kaci Vołkavaj. Ja prosta była ŭ tych ža kaściumach, što i ŭdzielniki kalektyvu, i nidzie ŭvohule nie afišyravałasia. I ja, mahčyma, vystupała ŭ niečym horadzie, i vy navat nie viedajecie, što ja tam vystupała. Mnie ŭžo było pofihu, za jakija hrošy vystupać, mnie ŭžo było pofihu, što śpiavać, jakija pieśni. Mnie važna było sabrać sumu dla taho, kab chutčej źjechać», — emacyjna raskazvaje śpiavačka.

«Ludzi buduć jeści, a my budziem śpiavać u stałoŭcy?»

Adnym z samych prynižalnych momantaŭ dla śpiavački stała prapanova znajomaha prajechać z vystupami pa sanatoryjach.

«Ja pajechała. I ŭsio było b ničoha, da taho momantu, kali jon skazaŭ: «A zaraz nam treba pajści i śpiavać u stałoŭcy pa adnoj pieśni dla rekłamy, kab ludzi pajšli na hety kancert». Ja kažu: «U sensie? Ludzi pryjšli ź plažu, jany buduć jeści, a my budziem śpiavać u stałoŭcy?» — zhadvaje Vołkava.

Adnak samaje hałoŭnaje prynižeńnie adbyłosia na samim kancercie, na jaki pryjšło ŭsiaho 10 čałaviek. Pryčyna takoj nizkaj jaŭki była tempieratura ŭ +35 hradusaŭ u pamiaškańni biez kandycyjaniera:

«My śpiavali, u nas ściakaŭ pot, ludzi siadzieli abciakali potam. (…) Tuju sumu, jakuju ja atrymała — nu z ulikam taho, što my patracili hrošy na bienzin, z nami byŭ jašče hukarežysior, i nie ja adna tam vystupała… Ja nie pamiataju, kolki tam, moža, 5 dalaraŭ byŭ vychłap».

Paśla hetaha śpiavačka kupiła kvitok u Kijeŭ i źjechała (heta było jašče da lutaha 2022 hoda).

• 0
• 0
• 0
• 0
• 0
• 0
• 0
• 0