Rasijskija sudy z 2023 pa 2025 hod razhledzieli 349 pazovaŭ, u jakich asprečvalisia ździełki pa prodažy nieruchomaści pad upłyvam machlaroŭ, śviedčyć analiz sudovaj praktyki, jaki pravioŭ juryst Maksim Dacenka.
Ź ich u 29 vypadkach spracavała «schiema Dolinaj», to-bok sud viarnuŭ kvateru pradaŭcu i nie zapatrabavaŭ ad jaho viartańnia srodkaŭ pakupniku, piša «Ahienctva».
Za hod u Rasii razhladajecca prykładna 3000 sprečak ab asprečvańni pravoŭ na nieruchomuju majomaść.
Pavodle analizu Dacenki, jaki vyvučyŭ sudovuju praktyku pa sistemie Caselook, u takich spravach sudy, jak praviła, vynosiać try typy rašeńniaŭ. Sud moža pakinuć kvateru za pakupnikom; viarnuć kvateru pradaŭcu, ale abaviazać jaho viarnuć hrošy pakupniku (z prymianieńniem restytucyi); abo viarnuć kvateru biez abaviazku viartańnia hrošaj (biez restytucyi). «Schiema dziejańniaŭ telefonnych machlaroŭ paŭsiul praktyčna adna i taja ž. Supracoŭniki FSB, Finmanitorynhu, biaśpiečnyja rachunki», — adznačyŭ juryst.
Sprava Dolinaj nie była pieršym takim kiejsam u rasijskaj sudovaj sistemie, padkreślivaje ekśpiert: «U 2023 hodzie jašče i nie išła havorka ab prodažy jaje kvatery, a spravy ŭžo byli. U tym liku i biez restytucyi». Usiaho za 2023 hod juryst znajšoŭ 55 takich spraŭ, za 2024 hod — 180, za 2025 hod — 114 (ekśpiert udakładniŭ, što z-za asablivaściej sistemy pošuku pa sudovych aktach mahčymaja pamyłka padlikaŭ).
Varyjant biez restytucyi — samy redki. U 2023 hodzie takoje rašeńnie było vyniesiena pa čatyroch spravach, u 2024 hodzie — pa 15, u 2025 hodzie — pa 10.
Na bok pradaŭcoŭ z prymianieńniem restytucyi sudy stanavilisia čaściej. U 2023 hodzie tak zaviaršylisia 14 spraŭ, u 2024 hodzie — 59, u 2025 hodzie — 41. Pry hetym, padkreślivaje juryst, navat z prymianieńniem restytucyi viarnuć hrošy dla pakupnika — «zadača nietryvijalnaja».
Najčaściej sudy pakidali prava na kvateru za pakupnikami. U 2023 hodzie takich rašeńniaŭ było 34 (65,38% ad ahulnaj kolkaści spraŭ), u 2024 hodzie — 59 (33,52%), u 2025 hodzie — 61 (54,46%).
Bolšaść spraŭ ab asprečvańni ździełak pa nieruchomaści z-za ŭpłyvu telefonnych machlaroŭ razhladali sudy ŭ Maskvie (56 iskaŭ) i Maskoŭskaj vobłaści (30 iskaŭ). Na trecim miescy — Piermski kraj, sudy ŭ jakim razhledzieli 14 pazovaŭ.
Nahadajem, što machlary pad vyhladam supracoŭnikaŭ FSB i Raśfinmanitorynhu pierakanali śpiavačku, što złačyncy aformili na jaje kredyt pad zakład kvatery. Machlary pierakanali Dolinu pradać kvateru, paabiacaŭšy, što ździełka budzie fiktyŭnaj. Jana pradała kvateru za 112 młn rasijskich rubloŭ (tady kala 1 miljona dalaraŭ) i pieradała ŭsie hrošy nieviadomym afierystam.
U žniŭni 2024 hoda śpiavačka zrazumieła, što jaje padmanuli, i źviarnułasia ŭ palicyju. Była zaviedziena kryminalnaja sprava. Vykanaŭcaŭ afiery (kurjerku, jakaja zabrała hrošy ŭ Dolinaj, i jašče niekalki pasiarednikaŭ) prysudzili da terminaŭ ad 4 da 7 hadoŭ kałonii. Skradzienyja hrošy nie znajšli.
Chamoŭnicki sud Maskvy ŭ sakaviku pryznaŭ niesapraŭdnaj ździełku pa prodažy kvatery Dolinaj, nie viarnuŭšy hrošaj novaj uładalnicy Palinie Łurje. Paśla hetaha sudy niekalkich instancyj paćvierdzili heta rašeńnie. 16 śniežnia spravu budzie razhladać Viarchoŭny sud.
Sprava vyklikała vialiki rezanans u ŚMI, jakija pačali nazyvać anulavańnie ździełak ź nieruchomaściu bieź viartańnia hrošaj novamu ŭłaśniku «schiemaj Dolinaj».
Padčas pieradačy «Chaj havorać» Dolina paabiacała viarnuć hrošy Łurje, nie ŭdakładniŭšy, kali mienavita heta adbudziecca.
Bližejšym časam buduć vyzvaleny bolš za 150 palitźniavolenych39
Kamientary
" miełočiška na riebiatišiek " . Imieja kompru na dolinu , srok za davnosťju kotoryj na iźletie , on vyvieł jejo na ispołnienije standartnoj priestupnoj schiemy . Obieŝav , kak vsiehda kryšu 200 % . Vsie prošło po płanu . No kobyłka vzbryknuła na pośledniem etapie . Borzomietr zaškalił . Vot tiepieŕ nado razrulivať .