Samarobnyja bomby i treniroŭki na strelbiščy. Aŭstralijskaja palicyja raskryła padrabiaznaści napadu na Bondzi-Bič
Zhodna z novymi sudovymi dakumientami, padazravanyja ŭ stralbie na Bondzi-Bič pierad tym, jak adkryć ahoń, kidali ŭ natoŭp vybuchovyja pryłady, adnak tyja nie spracavali. Taksama za niekalki tydniaŭ da napadu hetyja ž dvoje mužčyn treniravalisia ŭ stralbie, piša Bi-bi-si.
Piatnaccać čałaviek byli zabityja, dziasiatki atrymali ranieńni ŭ vyniku stralby na plažy ŭ Sidnei padčas śviatkavańnia Chanuki 14 śniežnia.
24‑hadovamu Navidu Akramu vystaŭlenyja abvinavačańni pa 59 artykułach, u tym liku ŭ 15 zabojstvach i adnym terarystyčnym akcie. Druhi strałok — jaho baćka Sadžyd Akram — byŭ zastreleny palicyjaj na miescy zdareńnia.
Pavodle dakumientaŭ, jany staranna płanavali napad na praciahu niekalkich miesiacaŭ i za dva dni da stralby naviedali plaž z metaj raźviedki.
Na minułym tydni sud časova zabaraniŭ publikacyju palicejskaj daviedki z vykładańniem faktaŭ u intaresach abarony piersanalnych danych tych, chto vyžyŭ. U paniadziełak zabaronu źniali, i dakumienty byli apublikavanyja z peŭnymi kupiurami.
U apublikavanych materyjałach źmiaščajucca padrabiaznaści niekalkich videazapisaŭ, jakija fiksujuć pieramiaščeńni mierkavanych strałkoŭ pierad napadam.
Na adnym ź videa, źniatym na mabilny telefon u kastryčniku, mužčyny siadziać pierad vyjavaj ściaha hrupoŭki «Isłamskaja dziaržava».
Na videa čuvać, jak jany razvažajuć pra matyvy napadu i asudžajuć «dziejańni sijanistaŭ». Navid Akram taksama čytaje na arabskaj movie ŭryvak z Karana.
Palicyja paviedamiła, što na inšym videazapisie, taksama zroblenym u kastryčniku, baćka i syn «prachodziać navučańnie abychodžańniu z ahniastrelnaj zbrojaj u sielskaj miascovaści», mierkavana ŭ štacie Novy Paŭdniovy Uels.
Na videa vidać, jak jany «stralajuć z drabavikoŭ i ruchajucca taktyčna», dadali pradstaŭniki pravaachoŭnych orhanaŭ. Na zapisie z kamiery videanazirańnia, zroblenym uviečary 12 śniežnia, bačna dvuch mužčyn, jakich ličać baćkam i synam Akramami, u ich aŭtamabili kala Bondzi-Bič.
«Abvinavačany i jaho baćka, S. Akram, vychodziać z aŭtamabila i iduć pa piešachodnym moście, znachodziačysia ŭ tym samym miescy, dzie praz dva dni jany adkryli ahoń pa ludziach, — havorycca ŭ dakumiencie. — Palicyja śćviardžaje, što heta źjaŭlajecca dokazam raźviedki i płanavańnia terarystyčnaha aktu».
Kala 02:00 u dzień napadu kamiery videanazirańnia zafiksavali, jak dvoje mužčyn pakidali arandavanaje žyllo ŭ pryharadzie Sidneja Kempsi, «niesučy doŭhija i hruvastkija pradmiety, zahornutyja ŭ koŭdry», jakija jany skłali ŭ aŭtamabil.
U dakumientach adznačajecca, što siarod ich byli dva adnastvolnyja ružžy, vintoŭka Beretta, čatyry samarobnyja vybuchovyja pryłady i dva ściahi ID.
Pavodle danych palicyi, nieŭzabavie paśla 17:00 mužčyn znoŭ bačyli, kali jany pakidali arandavanaje žyllo. Na inšych kadrach vidać, jak jany prybyli na plaž u 18:50, pryparkavalisia i raźmiaścili ściahi na ŭnutranym baku piaredniaha i zadniaha voknaŭ aŭtamabila.
Zatym jany dastali z mašyny ahniastrelnuju zbroju i vybuchoŭku i nakiravalisia da piešachodnaha mosta.
Palicyja miarkuje, što mienavita adtul jany kinuli vybuchovyja pryłady — try samarobnyja bomby z abrezkaŭ trub i «bombu z tenisnaha miača» — u bok natoŭpu, adnak nivodnaja ź ich nie vybuchnuła.
Praź niekatory čas jany adkryli ahoń pa ludziach. Čatyrnaccać čałaviek byli zabityja na miescy. Jašče adzin pamior paźniej u balnicy ad atrymanych ranieńniaŭ.
Sadžyd Akram byŭ zastreleny padčas pierastrełki z palicyjaj. Navid Akram atrymaŭ ciažkija ranieńni ad palicejskaha ahniu. U paniadziełak jaho pieraviali z balnicy ŭ turmu.
Ciapier čytajuć
Analityk Hienštaba, jaki malavaŭ kartu «adkul rychtavałasia napadzieńnie», apynuŭsia ŭ SIZA KDB za pracu na ŭkrainskuju raźviedku12
Kamientary