Kolki času treba pravieści na miažy, kab trapić z Polščy ŭ Biełaruś pierad Kaladami?
Čerhi aŭtobusaŭ na polska-biełaruskaj miažy źnikli. Ciapier prajści jaje pry pajezdcy aŭtobusam možna za 7‑10 hadzin, na aŭtamabili — za 10‑14 hadzin. U advarotnym kirunku niekatoryja spraŭlalisia i za paŭhadziny. Vydańnie Most vyvučyła, što pišuć padarožniki ŭ prymiežnych čatach.
Apoŭnačy 24 śniežnia pierad punktam propusku «Terespal» u čarzie na vyjezd z Polščy čakali šeść aŭtobusaŭ. Da ranicy čarhi nie stała zusim.
«Studenty z Polščy raźjechalisia pa damach u RB, voś i palahčeła. Paśla 7 studzienia pačniecca viesiałość u zvarotnym kirunku», — piša ŭ pamiežnym čacie karystalnik pad nikam Sergio.
Prachodžańnie miažy na aŭtobusie z Polščy ŭ Biełaruś zajmaje ad 7,5 da 10,5 hadzin. Karystalniki čataŭ adznačajuć, što asnoŭny čas davodzicca čakać na terytoryi biełaruskaha punkta propusku, dzie ŭvažliva dahladajuć bahaž.
«Ciapier vyjechali na niejtrałku, jana ŭsia zabitaja. U našych usio vielmi pavolna, — piša Alona. — Praviarajuć usio ŭručnuju, potym mohuć jašče [adpravić na] skanier. Pracujuć šeść čałaviek. Pracujuć chutka, ale ludziej vielmi šmat», — piša Dzianis.
Na pamiežnym pierachodzie «Babroŭniki — Bierastavica» taksama niama čarhi z aŭtobusaŭ na vyjezd z Polščy. Pavodle spravazdač pasažyraŭ, pierasiačeńnie miažy ŭ bok Biełarusi zajmaje ad 7 da 8,5 hadzin.
Sotni mietraŭ čarhi
U «Terespali» nazirajecca vialikaja čarha ź lehkavych aŭtamabilaŭ. Ranicaj 24 śniežnia jana raściahnułasia na 850 mietraŭ, ale dniom skaraciłasia prykładna da 300 mietraŭ (kala 50 mašyn). Prachodžańnie miažy ŭ bok Biełarusi zajmaje prykładna 14 hadzin, u «Babroŭnikach» i «Bruzhach» — 11‑12 hadzin.
«Čarha [u «Terespali»] praktyčna nie ruchałasia z-za ludziej, jakija biaskonca abhaniali i ŭklińvalisia biez čarhi. My panazirali za hetym paŭtary hadziny i vyrašyli jechać na miažu ŭ «Babroŭniki». Tam pierachod mienšy, čym u Breście, tamu i prapusknaja zdolnaść mienšaja. Nam spatrebiłasia 12 hadzin, kab prajści. Za hety čas nivodnaja mašyna nie pierahnała i nie ŭlezła biez čarhi», — piša Maryna.
Paźniej źjavilisia paviedamleńni, što 24 śniežnia «Brest» chutčejšy». U «Babroŭnikach» čarha na ŭjezd u Biełaruś raściahvałasia na 650 mietraŭ, pastupova źnižajučysia da paŭkiłamietra. Dniom 24 śniežnia ŭ čarzie — 50‑60 aŭtamabilaŭ. Prajści miažu možna prykładna za 12 hadzin. U «Kuźnicy» — kala 100 mašyn.
U bok Polščy miažu prachodziać chutka
Na vyjeździe ź Biełarusi ŭ Polšču čerhaŭ z aŭtobusaŭ niama. Padarožniki pišuć u čatach, što prachodžańnie miažy praz «Brest» zajmaje ad 3 da 5 hadzin, prykładna za stolki ž možna prajści i praź inšyja punkty propusku.
Prachodžańnie miažy na lehkavym aŭtamabili praz «Brest» zajmaje 1, 5‑2 hadziny. Praz «Bruzhi» možna prajechać jašče chutčej: adzin z karystalnikaŭ pamiežnaha čata napisaŭ, što prajšoŭ miažu ŭsiaho za paŭhadziny.
Ciapier čytajuć
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki1
Kamientary