Siastra kryminalnika z mahiloŭskaj turmy aburyłasia stanam brata. I tut pačałosia

13 studzienia biełaruska ŭ tyktoku raskazała pra spatkańnie z bratam Alaksiejem Harbunovym u turmie №4 u Mahilovie.

Pa słovach žančyny, brat byŭ pieraviedzieny tudy ŭ kastryčniku minułaha hoda z papraŭčaj kałonii Viciebska. Z 12 listapada jon znachodziŭsia ŭ štrafnym izalatary (ŠIZA). Z taho času rodnyja nie atrymlivali ad jaho ni zvankoŭ, ni listoŭ. Jany dvojčy naviedvali načalnika turmy, i paśla druhoha vizitu im dazvolili sustreču.

U videa žančyna dzielicca ŭbačanym:

«Siońnia my byli ŭ šoku. Paśla kancłahiera ludzi byli ŭ značna lepšym stanie, čym jon ciapier utrymlivajecca ŭ hetaj turmie. U siniakach. Pastajanna znachodzicca biez matracaŭ, na padłozie, u majcy i trusach. Na rukach — apioki ad cyharet».

Jak śćviardžaje žančyna, jaje brat prosić dapamohi, kab jaho pieraviali ŭ inšuju turmu, bo takoha jon bolš nie vytrymaje i skončyć žyćcio samahubstvam.

@veselaydevhonka Mohilov tiuŕma4#pomoŝ#sos ♬ orihinalnyj zvuk - LUBIMKA

«Ja prosta nie ŭjaŭlaju, jak u XXI stahodździ ŭ turmach, dzie ŭsio pad kamierami, tak ździekujucca ź ludziej. Ja razumieju, što jon ździejśniŭ złačynstva i adbyvaje pakarańnie. Ale, prabačcie, nie da takoj ža stupieni. Staić maci, jakaja ciapier u ślazach. Staić druhaja siastra.

My byli prosta šakavanyja, kali ŭbačyli jaho. Dzicia Aśviencima, jakoje prosta vysachła. Na im niama žyvoha miesca», —

adznačyła siastra źniavolenaha i paprasiła inšych karystalnikaŭ raspaŭsiudzić jaje videa, kab «jak maha bolš ludziej daviedałasia pra heta i narešcie dajšło da našaha prezidenta».

22 studzienia na jaje apovied adreahavała prapahanda — pakazała fotazdymki brata, nibyta bieź siniakoŭ i ŭ dobrym stanie zdaroŭja.

Prapahandysty źviarnuli ŭvahu, što 30‑hadovy brat žančyny adbyvaje pakarańnie za pjanaje zabojstva. Raniej jon byŭ sudzimy piać razoŭ.

Pa słovach aŭtaraŭ, sam mužčyna «byŭ ździŭleny» videa, jakoje zapisała jaho siastra, i navat «pahadziŭsia papaziravać u anfas, profil i sa śpiny, kab uvieś śviet ubačyŭ «ślady žachlivych katavańniaŭ».

Pavialičyć

Zdymki źniavolenaha prapahandysty supravadzili zaŭvahaju: «A dzie ž apioki, siniaki i źniasileńnie? Pierad nami — ceły i niepaškodžany mužčyna narmalnaj kamplekcyi dla svajho rostu i ŭzrostu. Bieź lišniaj vahi, ale turma ž nie kurort».

Samu ž siastru jany nazvali «isteryčkaj» i «biazmozhłaj pamočnicaj» ekstremistaŭ, jakija «forsiać čarhovy fejk z apastyłaha sieryjała «žachi režymu».

Žančyna ŭbačyła hetyja fotazdymki i zapisała novaje videa, u jakim dała svoj kamientaryj. Pa jaje słovach, navat pa apublikavanych fota vidać, što ŭ mužčyny zastalisia siniaki.

«Apiokaŭ taksama nie vidać, tamu što nie pakazali zapiaści. Nie pakazali nohi sinija», — zaŭvažyła žančyna.

«Paśla takich siniakoŭ i ja b paziravała. Jašče b i nie tak. I luby b na jaho miescy paziravaŭ», —

prakamientavała siastra zhodu brata paziravać prapahandystam i prapanavała «padniać zapis» jaje spatkańnia i pahladzieć, što jon na im demanstruje.

@veselaydevhonka #tiuŕma4mohilev ♬ orihinalnyj zvuk - LUBIMKA

«Davajcie heta pakažam. Čamu vy heta nie pakazali? Čamu vystavili raspłyŭčataje fota? Čamu videa nie zapisali? Fota možna adfotašopić. I toje nie adfotašopili. Usio roŭna vidać siniaki», — kaža žančyna i dadaje:

«Spužalisia, tak? Zabiehali? Tamu što skarhi pajšli va ŭsie instancyi».

Siastra źniavolenaha zapeŭnivaje, što budzie skardzicca i dalej:

«Heta ž moj brat. Što b jon ni zrabiŭ, jon usio roŭna zastaniecca bratam».

• 19
• 0
• 1
• 8
• 2
• 4
• 1
• 1