U Vieniesuele vyzvaleny jašče kala 80 palityčnych źniavolenych. Hetaha patrabavali ZŠA
Hałoŭnaja vieniesuelskaja pravaabarončaja arhanizacyja Foro Penal zajaviła, što pad ciskam ZŠA ŭ subotu z turmaŭ pa ŭsioj krainie byli vyzvaleny prynamsi 80 palityčnych źniavolenych, piša Bi-bi-si.
Kiraŭnik arhanizacyi Alfreda Ramera paviedamiŭ, što jaho supracoŭniki paćviardžajuć asoby vyzvalenych, paśla čaho nazavuć ich dakładnuju kolkaść. U publikacyi na płatformie X juryst Foro Penal Hansała Chimiob zajaviŭ, što, mahčyma, vyzvalenych akažacca bolš za vosiemdziesiat.
Ramera taksama apublikavaŭ fatahrafiju adnaho ź źniavolenych — supracoŭnika Foro Penal Kienedzi Techedy, jaki, pavodle jaho słoŭ, utrymlivaŭsia ŭ turmie Takaron na zachad ad Karakasa sa žniŭnia 2024 hoda.
Vykonvajučaja abaviazki prezidenta Vieniesueły Dełsi Radryhies zajaviła na dniach, što z tych časoŭ, jak ZŠA praviali apieracyju pa zachopu byłoha vieniesuelskaha lidara Nikałasa Madura, na svabodu vyjšli bolš za 600 palityčnych źniavolenych, pasadžanych pry jaho režymie.
Ale Foro Penal śćviardžaje, što hetaja ličba zavyšanaja. Pa jaje danych, z 8 studzienia i da siońniašniaha dnia (biez uliku apošniaj chvali) na svabodu vyjšli tolki 156 čałaviek.
Siarod ich — mnohija pradstaŭniki ŭnutranaj apazicyi, a taksama jak minimum piać hramadzian Ispanii.
Pry hetym Foro Penal vitaje namahańni novych uład, jakija pravodziać užo nie pieršuju chvalu vyzvaleńniaŭ za karotki pieryjad. Adnak, jak zajaŭlajuć u arhanizacyi, u dačynieńni da mnohich vyzvalenych abvinavačvańni aficyjna źniaty nie byli. Heta pakidaje ich u pravavym vakuumie, a taksama pazbaŭlaje prava publična vykazvacca, kažuć pravaabaroncy.
Dełsi Radryhies zajaviła, što ŭ paniadziełak płanuje pravieści telefonnuju razmovu ź Viarchoŭnym kamisaram AAN pa pravach čałavieka Folkieram Ciurkam, kab paprasić AAN pravieryć śpisy vyzvalenych na dadzieny momant.
Pravaabarončyja arhanizacyi i aktyvisty na praciahu mnohich hadoŭ abvinavačvajuć ułady Vieniesueły ŭ padaŭleńni apazicyi pry dapamozie aryštaŭ i pazbaŭleńnia voli pa rašeńni suda.
Urad Vieniesueły zaŭsiody heta admaŭlaŭ, śćviardžajučy, što ŭsie, chto akazvalisia ŭ turmach, byli vinavatyja ŭ kryminalnych złačynstvach.
Mnohija krytyki Madura byli zatrymanyja paśla prezidenckich vybaraŭ 2024 hoda, na jakich jon abviaściŭ ab svajoj pieramozie, choć apazicyja i mnohija krainy pastavili vyniki pad sumnieŭ.
Kamientary