Minsk, Varšava, Vilnia — paraŭnoŭvajem, dzie praściej kupić kvateru čałavieku ź siaredniaj zarpłataj

Minsk

Zhodna z apošnimi danymi (pa stanie na listapad 2025 hoda), siaredniaja zarpłata ŭ Minsku skłała 3060 rubloŭ na ruki, ci kala 1050 dalaraŭ pa tahačasnym kursie.

Kvadrat u Minsku naprykancy 2025 hoda ŭ siarednim kaštavaŭ pa 2084 dalary pa prapanovach. U vieraśni pa realnych ździełkach było pa $1900 za mietr. U vyniku siaredniestatystyčny minčuk na zarpłatu moža nabyć sabie kala 0,53 mietra siaredniestatystyčnaha žytła.

To-bok na kuplu kvatery płoščaj 50 kvadrataŭ spatrebicca kala 94 siarednich minskich zarpłat — daviadziecca źbirać hrošy troški mienš za vosiem hadoŭ, kali nie tracić ich ni na što.

Varšava

Siaredniaja zarpłata ŭ Varšavie za listapad — 7 687 złotych na ruki. Heta kala 2060 dalaraŭ.

Siaredni košt mietra ŭ polskaj stalicy składaje kala 16 350 złotych na padstavie realnych ździełak. Atrymlivajecca, što siaredniestatystyčny varšavianin na zarpłatu moža nabyć sabie 0,47 mietra siaredniestatystyčnaha žytła.

Takim čynam, na kuplu kvatery ŭ Varšavie płoščaj 50 kvadrataŭ spatrebicca kala 106 siarednich varšaŭskich zarpłat — amal dzieviać hadoŭ pracy.

Vilnia

Siaredni zarobak u Vilni pa vynikach treciaha kvartała 2025 hoda (bolš śviežych danych pakul niama) składaŭ 1660 jeŭra na ruki.

Siaredni košt mietra ŭ Vilni nabližajecca da 3 250 jeŭra. Atrymlivajecca, što na adnu siaredniestatystyčnuju zarpłatu možna nabyć 0,51 mietra siaredniestatystyčnaha žytła.

Na kuplu kvatery ŭ Vilni płoščaj 50 kvadrataŭ spatrebicca kala 98 siarednich zarpłat pa horadzie — troški bolš za vosiem hadoŭ.

Pavialičyć

Atrymlivajecca, što za adnu siaredniuju staličnuju zarpłatu bolš za ŭsio mietraŭ možna nabyć u Minsku, a mienš za ŭsio — u Varšavie.

A što z dastupnaściu kredytaŭ?

U Varšavie i Vilni kredyty na žyllo bolš dastupnyja, čym u Minsku. Nižej pryviedzieny staŭki bieź jakich-niebudź lhotnych prahram.

Najmienšyja staŭki pa kredytach u Litvie. Tam ipatečny kredyt ciapier možna ŭziać pad 4,6—5,6%.

U Polščy, jakaja, u adroźnieńnie ad Litvy, nie ŭ jeŭrazonie, staŭki pa ipatecy krychu vyšejšyja — kala 6,1—7%.

U Biełarusi ž staŭki pa kredytach nieparaŭnalna vysokija i znachodziacca ŭ miežach 16—18%.

Atrymlivajecca, što kali nie źviartacca da kredytnych hrošaj, to najbolš dastupnaje žytło ŭ Minsku, a kali brać ipateku, to praściej žycharam Vilni. 

Varšava ŭ svaju čarhu prajhraje Vilni jak pa dastupnaści adnosna siaredniaha zarobku pa horadzie, tak i pa pracentnych staŭkach pa kredycie. 

• 15
• 2
• 2
• 1
• 0
• 3
• 0
• 0