U Hiermanii adbyłosia hrandyjoznaje rabavańnie banka na miljony jeŭra, jakoha nichto nie zaŭvažyŭ

U cichija vychadnyja adrazu paśla Kaladaŭ hrupa złodziejaŭ uvarvałasia ŭ bank na hałoŭnaj vulicy zachodniaha horada Hielzienkirchien, praśvidravaŭšy ścianu pramysłovym drylom. Jany ŭzłamali bolš za 3 000 depazitarnych jačejek i źnikli ź miljonami jeŭra, raspaviadaje VVS. 

Praź miesiac palicyja ŭsio jašče nie zrabiła nivodnaha aryštu. Dla klijentaŭ banka, niekatoryja ź jakich kažuć, što stracili svaje pažyćciovyja aščadžańni, kaštoŭnyja siamiejnyja ŭpryhožvańni i majomaść, heta čas hnievu, razhublenaści i šoku. Prysutničaje mocnaje pačućcio, što davier da instytutaŭ pachisnuŭsia.

Hetaja sprava pastaviła mnostva składanych pytańniaŭ, i niekatoryja ź ich ahučyŭ Hierbiert Rojl, ministr unutranych spraŭ zachodniaj ziamli Paŭnočny Rejn-Viestfalija. Čamu nichto nie zaŭvažyŭ, što adbyvajecca? Ci było heta spravaj «svaich» ludziej? Čamu nichto nie čuŭ dryl i adkul złodziei dakładna viedali, dzie znachodzicca schovišča? Ci nie byli sistemy biaśpieki banka zanadta słabymi?

Śledčyja miarkujuć, što złodziei, vierahodna, pranikli ŭ aščadny bank Sparkasse na Nijenchofštrase praz susiedniuju šmatpaviarchovuju parkoŭku ŭ haradskim rajonie Buer.

Złodziei mahli paškodzić zapasnyja dźviery pamiž parkoŭkaj i bankam.

Pry zvyčajnych abstavinach dźviery nie mahli być adčynienyja zvonku, ale bandzie ŭdałosia zrabić tak, kab jany bolš nie začynialisia naležnym čynam, što dazvoliła im mieć «bieśpieraškodny dostup z parkoŭki ŭ budynak Sparkasse».

Adtul, jak ličyć palicyja, jany pieraadoleli niekalki sistem biaśpieki i prabralisia ŭ archiŭny pakoj pobač sa schoviščam u padvale banka. Jany ŭstalavali śvidravalny aparat i praśvidravali ŭ ścianie adtulinu šyrynioj 40 sm, jakaja viała ŭ siejfavy pakoj, dzie zachoŭvalisia depazitarnyja jačejki.

Pavialičyć

Pavodle źviestak aficyjnych asob, rabavańnie, imavierna, adbyłasia ŭ pieryjad pamiž subotaj 27‑ha i paniadziełkam 29 śniežnia.

Jany miarkujuć, što ŭzłomščykaŭ mahli złavić niezadoŭha da taho, jak jany dabralisia da schovišča.

Adrazu paśla 06:00 27 śniežnia pažarnaja słužba Hielzienkirchiena i pryvatnaja achoŭnaja firma atrymali papiaredžańnie ab pažarnaj tryvozie z banka, jakoje mahło być vyklikana złodziejami. Palicyja i 20 pažarnych prybyli ŭ bank u 06:15, «ale nie zmahli znajści ničoha, što pakazvała b na paškodžańni», havorycca ŭ zajavie palicyi.

Pažarnaja sihnalizacyja pastupiła mienavita sa schovišča, paviedamiŭ Hierbiert Rojl. Ale pažarnyja nie zmahli ŭvajści, bo jano było začyniena raletami. Rojl skazaŭ, što jany nie ŭbačyli «ni dymu, ni pachu haru, ni paškodžańniaŭ», tamu jany «pryličyli heta da iłžejtryvohi», što, pavodle jaho słoŭ, nie było niečym niezvyčajnym.

Palicyja nie mieła prava na ahlad u banku ŭ toj čas, bo heta była sprava pažarnaj słužby. Im spatrebiŭsia b ordar.

Apynuŭšysia ŭnutry schovišča, złodziei adčynili amal usie 3 250 depazitarnych jačejek, zabraŭšy najaŭnyja hrošy, zołata i ŭpryhožvańni.

Pavialičyć

Rojl paviedamiŭ, što kampjutarnyja sistemy banka pakazvajuć: pieršaja skrynka była ŭzłamanaja ŭ 10:45 27 śniežnia, a apošniaja — u 14:44. Pakul niezrazumieła, ci ŭdałosia im adčynić bolšaść skrynak za čatyry hadziny, ci technałohija prosta pierastała zapisvać danyja.

Paźniej śviedki paviedamili palicyi, što bačyli niekalkich mužčyn na leśvičnaj kletcy parkoŭki ź vialikimi sumkami ŭ noč na 28 śniežnia.

Ułady kažuć, što dakładna nie viedajuć, kolki było vykradziena, ale niamieckija ŚMI aceńvajuć, što złodziei mahli źbiehčy z sumaj da 100 miljonaŭ jeŭra.

Paźniej palicyja apublikavała fatahrafii i videazapisy z kamier parkoŭki, na jakich bačny mužčyny z zakrytymi tvarami i dva aŭtamabili: čorny Audi RS 6 i bieły Mercedes Citan. Abodva mieli padroblenyja numarnyja znaki.

Kradziež byŭ vyjaŭleny tolki 29 śniežnia, kali ŭ paniadziełak a 3:58 spracavała jašče adna pažarnaja sihnalizacyja, i pažarnyja, viarnuŭšysia ŭ bank, vyjavili chaos.

Pavialičyć

Hierbiert Rojl skazaŭ, što heta vyhladała jak «śmietnik», z bolš čym 500 000 pradmietaŭ, raskidanych pa padłozie — źmieścivam depazitarnych jačejek, što złodziei pakinuli paśla siabie.

Palicyja paviedamiła, što mnohija rečy byli paškodžanyja paśla taho, jak złodziei ablili ich vadoj i chimikatami. Z taho času jany staranna raźbirajuć reštki, sprabujučy vyznačyć, što kamu naležyć.

Kali stali viadomyja padrabiaznaści rabavańnia, kala Sparkasse sabrałasia kala 200 klijentaŭ, patrabujučy, kab ich puścili ŭnutr. Palicyja prybyła na niekalkich patrulnych mašynach i ačapiła ŭvachod.

63‑hadovy Iaachim Alfred Vahnier skazaŭ, što straciŭ nie tolki zołata na dziasiatki tysiač jeŭra, ale i ŭpryhožvańni, jakija naležali jaho baćku, babuli i dziaduli. Jon arandavaŭ jačejku paśla niekalkich uzłomaŭ u jaho kvatery, dumajučy, što jaho kaštoŭnaści buduć tam u biaśpiecy. «Ja płakaŭ ad lutaści», — skazaŭ jon.

Bank zajaviŭ, što źmieściva jačejek zvyčajna zastrachavana na 10 300 jeŭra kožnaja. Vahnier — adzin ź pieršych, chto padaŭ pazoŭ suprać banka, patrabujučy pakryćcia škody za toje, što jaho advakat Daniel Kulman nazvaŭ «słabaj biaśpiekaj».

Inšy klijent pakłaŭ 400 000 jeŭra najaŭnymi ad prodažu kvatery, jakija pryznačalisia dla jaho žyćcia na piensii.

Bank zajaviŭ, što sam staŭ achviaraj złačynstva i što jaho pamiaškańni byli «zabiaśpiečany ŭ adpaviednaści z pryznanymi sučasnymi technałohijami». U toj čas jak niekatoryja klijenty mieli aficyjnyja kvitancyi na źmieściva svaich jačejek, inšyja — nie.

«Navat Sparkasse nie viedaje, što znachodzicca ŭ [skrynkach], bo kožny čałaviek moža pakłaści tudy ŭsio, što zachoča», — skazaŭ Hierbiert Rojl. Jon padkreśliŭ, što psichałahičnuju škodu nie varta niedaaceńvać.

«Nam treba dapamahčy paciarpiełym», — skazaŭ jon. «Dla mnohich heta bolš, čym prosta strata majomaści, heta taksama moža paŭpłyvać na ich davier da ŭłasnaha pačućcia biaśpieki i… na ich davier da našaha paradku».

Načalnik palicyi Cim Frammajer zajaviŭ, što jany majuć spravu z «adnoj z samych bujnych kryminalnych spraŭ u historyi ziamli Paŭnočny Rejn-Viestfalija»: «Majo viedamstva i ŭsie jaho supracoŭniki ŭśviedamlajuć maštab hetaj spravy. Finansavaja škoda, niaŭpeŭnienaść i rasčaravańnie vielmi hłybokija!»

Nieŭzabavie paśla taho, jak kradziež byŭ vyjaŭleny, niamieckaja pravaradykalnaja partyja «Alternatyva dla Hiermanii» (AfD) praviała mitynh kala banka.

Niamiecki časopis Der Spiegel napisaŭ, što rabavańnie stała palityčnym pytańniem i simvałam čahości bolšaha, čym samo złačynstva: «Adčuvańnie taho, što abiacańni biaśpieki pustyja, što instytuty ciarpiać niaŭdaču, i što ŭ kančatkovym vyniku nichto nie niasie adkaznaści».

• 5
• 0
• 0
• 6
• 9
• 5
• 0
• 0