A čym ciapier zajmajecca Zareckaja? Jana pierajechała z Estonii ŭ Arabskija Emiraty

Stała viadoma, što jašče ŭ 2024 hodzie Jeŭrapiejskaja prakuratura pačała rasśledavańnie dziejnaści kampanii LaavaTech, čyim zasnavalnikam i publičnaj asobaj była biełaruska Taćciana Zareckaja — fihurantka rasśledavańnia «Našaj Nivy».

Čytajcie taksama: Paśpiachovaja startapierka ci baranesa Miunchhaŭzien? Jak Taćciana Zareckaja trapiła ŭ Abjadnany kabiniet i čamu jana jaho pakinuła

Prakuratura naličyła 450 tysiač jeŭra škody, plus ad Zareckaj patrabujuć viarnuć 2 miljony jeŭra hranta, vydzielenaha na raźvićcio technałohii pa paskoranym vyroščvańni raślin, jakoj tak i nie stvaryli. 

Paviedamlajecca taksama, što na sumiesnuju estonskuju majomaść (koštam 300 tysiač jeŭra) Zareckaj ź jaje mužam, finam Jusi Macijasam Pikarajnienam (Jussi Matias Pikkarainen), nakładzieny aryšt, a na budučyja pastupleńni na estonskija rachunki Zareckaj u Estonii nakładzieny aryšt da sumy 1,8 miljona jeŭra. 

Z hetych ličbaŭ možna zrabić vysnovu, što estonskija rachunki Zareckaj byli pustymi i śledstva tolki spadziajecca, što kali-niebudź tudy štości pastupić, kab kanfiskavać. 

Sama estonskaja kampanija — «pustaja». Paśla spynieńnia hrantavych tranšaŭ jana nie viadzie dziejnaści, nie zdaje spravazdač. Apošniaja finansavaja spravazdačnaść pa ŭsich narmatyvach zdadziena za 2023 hod. Hetyja zvanočki «Naša Niva» taksama padrabiazna aśviatłała. 

Čytajcie: Pamiatajecie «paśpiachovuju miljanierku» Zareckuju? Vyhladaje, što jaje kampanija — usio

Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii

Ale, što najbolš admietna, sama Zareckaja razam z mužam daŭno pakinuli Estoniju i aficyjna paviedamili miascovuju padatkovuju słužbu, što źjaŭlajucca rezidentami AAE.

Taćciana Zareckaja stała rezidentam Arabskich Emirataŭ 2 červienia 2025 hoda, a jaje muž — 10 červienia 2025 hoda. 

Pierabralisia tudy jany, jak mierkujecca, jašče raniej, tamu što niejki čas u AAE ŭładalniku biełaruskaha ci jeŭrapiejskaha pašparta možna znachodzicca bieź vizy. Ale sam status padatkovaha rezidenta AAE nie atrymlivajuć tolki pa fakcie kolkaści praviedzienych dzion, jon patrabuje pradprymalnickaj vizy abo dazvołu na rabotu.

Taksama źviartaje ŭvahu toje, što raniej aktyŭnaja i prabiŭnaja Zareckaja zakinuła, zakryła, a miescami navat vyčyściła svaje sacyjalnyja sietki.

Da taho jana dakumientavała amal kožny svoj pieralot, stvarajučy ŭražańnie čałavieka, čyj čas kaštuje hrošaj (adna ź jaje biznes-pasłuh — prodaž asabistych kansultacyj). Ale ź viasny 2025‑ha jaje instahram-akaŭnt staŭ zakrytym.

Na apošnim apublikavanym fotazdymku — u mai 2025‑ha — Zareckaja staić na fonie ściahoŭ ZŠA i Saudaŭskaj Aravii: «Saudaŭskaja Aravija — heta miesca, dzie być. Zblizku naziraju, jak robicca historyja», — napisała jana, adznačyŭšy horad Er-Ryjad.

Fejsbuk Zareckaja pačyściła ažno da publikacyj za 2022 hod. U Linkedin — sietcy, dzie jašče zusim niadaŭna Zareckaja prapanoŭvała lubomu achvotnamu za ścipłyja $100 tysiač znajomstva z členam saŭdaŭskaj kiroŭnaj dynastyi — taksama ŭžo hod niama novych publikacyj. 

• 0
• 0
• 10
• 6
• 2
• 0
• 3
• 0