«Pa-tavarysku zaklikajem biełaruskich siabroŭ». U MZS Rasii papiaredzili Łukašenku pilnavać rasijskija intaresy ŭ adnosinach z ZŠA
U Maskvie nahadali Minsku pra rasijskija i kitajskija intaresy pry zaklučeńni «vialikaj ździełki» z Vašynhtonam, a taksama raskazali, što antysankcyjnyja kroki ZŠA ŭ adnosinach Biełarusi nie takija i značnyja.
Namieśnik kiraŭnika rasijskaha źniešniepalityčnaha viedamstva Michaił Hałuzin u intervju TASS «pa-tavarysku» zaklikaŭ Biełaruś «zachoŭvać pilnaść» pry ździełkach z ZŠA.
Hałuzina spytali, jak jon moža prakamientavać źniaćcie sankcyj ZŠA z avijakampanii «Biełavija»?
Jon kaža, što vitaje vyklučeńnie avijakampanii «Biełavija» z «čornych śpisaŭ» Minfina ZŠA, ale adznačaje, što «ŭ ahulnym i cełym, maštabny sankcyjny režym suprać Biełarusi praciahvaje dziejničać».
— Zastajucca ŭ sile i amierykanskija ekspartna-kantrolnyja abmiežavańni, jakija zakranajuć avijasiektar. U pryvatnaści, dazvolena ekspłuatavać tolki vosiem vuzkafiuzielažnych łajnieraŭ «Boinh-737». Pry hetym atrymańnie luboj amierykanskaj zapčastki i ahrehata ŭ vypadku raptoŭnaj pałomki zapatrabuje asobnaha ŭzhadnieńnia z «rehulatarami».
Hałuzin kaža, što administracyja ZŠA pakul nie admaŭlajecca ad palityki cisku na Biełaruś, i «Bieły dom hatovy zadziejničać ryčahi ekanamičnaha ŭździejańnia ŭ luby patrebny jamu momant».
Rasijski dypłamat havoryć, što RF vitaje «lubyja kanstruktyŭnyja pačynańni ŭ kantekście narmalizacyi biełaruska-amierykanskaha dyjałohu i admieny niezakonnych abmiežavalnych mier», ale pry hetym jany «pa-tavarysku» zaklikajuć «biełaruskich siabroŭ zachoŭvać pilnaść».
Dypłamat pachvaliŭ Łukašenku, jaki, kamientujučy naładžvańnie adnosin z ZŠA, uvieś čas padkreślivaje, što heta nie ŭ škodu Rasii.
«U takim kantekście cenim publičnyja zajavy prezidenta Biełarusi Alaksandra Łukašenki ab tym, što «vialikaja ŭhoda» Minska z Vašynhtonam mahčymaja vyklučna pry ŭliku nacyjanalnych intaresaŭ Respubliki Biełaruś i adsutnaści škody jaje supracoŭnictvu z klučavymi sajuźnikami — Rasijaj i Kitajem.
Zrešty, upeŭnienyja, što z ulikam asablivaha charaktaru rasijska-biełaruskich adnosin, lubyja sproby niedružalubnych dziaržaŭ znajści «zazory» ŭ našych pazicyjach u mižnarodnych spravach zastanucca biasplonnymi», — kaža Hałuzin.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary
A jak na rasiei ciapier atrymlivajuć amierykanskija zapčastki i ahrehaty ŭ vypadku raptoŭnych pałomak?