Kab zabiaśpiečyć svaje data-centry, amierykanskija technahihanty budujuć «cieniavuju enierhasistemu»
U ZŠA na fonie bumu štučnaha intelektu pačynaje składvacca paralelnaja enierhietyčnaja sistema: technakampanii budujuć data-centry razam z ułasnymi elektrastancyjami, faktyčna ŭ abychod ahulnaj enierhasietki, piša Devby.io na padstavie publikacyi The Washington Post.
Adzin z pakazalnych kiejsaŭ — prajekt GW Ranch u Techasie: dziasiatki anharaŭ z vyličalnym žalezam, jakija buduć spažyvać bolš enierhii, čym uvieś Čykaha, ale pry hetym uvohule nie padklučacca da źniešnich linij. Elektryčnaść tam buduć hienieravać na miescy za košt hazu i častkova soniečnaj enierhii. Takija prajekty stanoviacca častkaj «cieniavoj enierhasietki», jakaja chutka razrastajecca pa krainie.
Pryčyna ŭ tym, što kłasičnaja infrastruktura nie paśpiavaje za popytam. Rost data-centraŭ vyklikaŭ cisk na sietki i supraciŭ z boku ŭładaŭ i miascovych žycharoŭ, tamu bihtech pajšoŭ u abychod — budavać ułasnyja mahutnaści.
Pa danych halinovych analitykaŭ, dziasiatki takich prajektaŭ zapłanavanyja ŭ Techasie, Ńju-Mieksika, Piensilvanii, Vajominhu, Jucie, Ahajo i Tenesi, častka ŭžo budujecca. U honcy ŭdzielničajuć najbujniejšyja hulcy — Meta, OpenAI, Oracle i navat enierhietyčnyja kampanii kštałtu Chevron. Užo ŭchvalenyja prajekty ŭ sumie zdolnyja hienieravać enierhiju, paraŭnalnuju sa spažyvańniem Ńju-Jorka — i nie adzin raz.
Klučavy niuans u tym, što amal usie hetyja mahutnaści budujucca na pryrodnym hazie. Adnaŭlalnyja krynicy kštałtu sonca i vietru zanadta niestabilnyja biez padtrymki sietki, tamu staŭka robicca na hazavuju hienieracyju, što aŭtamatyčna pavialičvaje vykidy vuhlakisłaha hazu i inšych zabrudžvalnikaŭ. Pa acenkach ekśpiertaŭ, heta moža surjozna ŭdaryć pa klimatyčnych metach, pra jakija sami ž technakampanii i havorać. Pry hetym častka prajektaŭ realizujecca na abstalavańni, jakoje mienš efiektyŭnaje i bolš zabrudžvaje navakolnaje asiarodździe, bo sučasnyja hazavyja turbiny raśpisanyja na hady napierad.
Jość i čysta inžyniernyja pytańni. Data-centry pracujuć kruhłasutačna, a hazavyja stancyi mohuć prastojvać na absłuhoŭvańni tracinu hoda i bolš. Zabiaśpiečyć stabilnuju padaču enierhii 24/7 bieź sietki — zadača, jakuju da kanca nie vyrašyli navat pry praktyčna nieabmiežavanych biudžetach. Akramia taho, taki popyt z boku bihtecha moža razhaniać ceny na abstalavańnie i ŭskosna pavialičvać taryfy dla tych, chto zastajecca na ahulnaj enierhasistemie.
Asobnaja linija napružańnia — miascovyja supolnaści. U šerahu štataŭ pad takija prajekty ŭžo źmiakčyli rehulavańnie, faktyčna pazbaviŭšy miascovyja ŭłady mahčymaści błakavać budaŭnictva. U vyniku žychary daviedvajucca pra budučyja hazavyja stancyi vielizarnaha maštabu ŭžo pastfaktum i pratestujuć. Krytyki kažuć pra «załatuju lichamanku», dzie rašeńni prymajucca nieprazrysta, a nastupstvy — ekałahičnyja i infrastrukturnyja — kładucca na rehijony.
Dla industryi heta, adnak, vymušany krok. Padklučeńnie da sietki moža zajmać hady, a ŭ honcy ŠI heta zanadta doŭha. Pakazalny prykład — prajekt data-centra xAI Iłana Maska ŭ Miemfisie. Jaho zapuskali ŭ 2024 hodzie ŭ maksimalna ścisłyja terminy, a kab nie čakać padklučeńnia da elektrasietki, placoŭku častkova siłkavali ad mabilnych hazavych hienierataraŭ. Heta dazvoliła padniać infrastrukturu za miesiacy. Unutry haliny heta ŭsprymajecca jak sihnał: chto chutčej zabiaśpiečyć siabie enierhijaj, toj i vyjhraje honku.
U vyniku najbujniejšyja technałahičnyja kampanii pastupova pieratvarajucca jašče i ŭ enierhietyčnyja. Prychilniki idei ličać, što takaja madel źnizić nahruzku na sietku i abaronić zvyčajnych spažyŭcoŭ ad rostu taryfaŭ. Skieptyki ž papiaredžvajuć, što heta stvaraje paralelnuju infrastrukturu z vysokimi vykidami, techničnymi ryzykami i doŭhaterminovymi nastupstvami dla ŭsioj enierhietyčnaj sistemy ZŠA.
Iłan Mask abjadnoŭvaje Space X i xAI dla stvareńnia data-centraŭ u kosmasie
Mask płanuje stvaryć na kalaziamnoj arbicie sapraŭdnaje suzorje centraŭ apracoŭki danych. Rasija zaniepakojenaja
Saudaŭskaja Aravija radykalna pierahladaje płany adnosna horada budučyni koštam $500 miljardaŭ — nie chapaje hrošaj
Stała viadoma, dzie ŭ Biełarusi pabudujuć majninhavyja fiermy
Amierykanski startap źbirajecca vyparyć parodu na hłybiniu 19 kiłamietraŭ. Praryŭ da vykarystańnia hieatermalnaj enierhii?
Ciapier čytajuć
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2929
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna29
Zialenski: Ja nie budu kazać, jakim sposabam, ale našyja ludzi zajmalisia tym, kab try-čatyry retranślatary ŭžo nie pracavali na terytoryi Biełarusi22
Kamientary