Pad Minskam mužčyna vyratavaŭ kazulu, jakaja apynułasia ŭ ledzianoj vadzie VIDEA
Historyja adbyłasia ŭ lesie kala Ratamki i chutka razyšłasia ŭ sacyjalnych sietkach, piša Tochka.by.
Pra zdareńnie raskazaŭ karystalnik Threads. Pavodle jaho słoŭ, u vadajomie zaŭvažyli kazulu, jakaja nie mahła vybracca na bierah. Žyviolina dryžała ad choładu i vyhladała mocna napałochanaj. Miarkujecca, što jaje zahnali ŭ vadu i pakusali — vierahodna, sabaki.
Na videa vidać, jak mužčyna aściarožna pierachodzić na druhi bierah pa pavalenym drevie i pavolna padychodzić da žyvioły, kab nie napałochać jaje jašče bolš. Spačatku kazula naściarožana adstupaje, ale potym, nibyta zrazumieŭšy, što čałaviek nie ŭjaŭlaje niebiaśpieki, padychodzić bližej. Mužčyna spakojna kliča jaje vybiracca i akuratna biare za rožki, paśla čaho vyciahvaje ź ledzianoj vady na suchoje.
Videa chutka stała papularnym i sabrała tysiačy łajkaŭ. Karystalniki ŭ kamientaryjach dziakavali mužčynu i adznačali, što takija ŭčynki viartajuć vieru ŭ ludziej.
Razam z tym niekatoryja ludzi vykazali zaniepakojenaść losam žyvioły. Jany miarkujuć, što kazuli mahła spatrebicca dapamoha vieterynara, kali jana sapraŭdy była pakusanaja. Ci źviarnulisia ź joj da śpiecyjalistaŭ, pakul nieviadoma.
Kamientary
Tolki chto zdymaŭ, piesiek ? )
A zabirać z lesu da vieterinary davoli niebiaśpiečna stała, bo kali spýnić u darozie jakoje boŭdziła ŭ furažcy - pryšjuć artykuł, i chren ty što dakažaš...