Bieły dom nie źviazvaje Rasiju z vypadkami «havanskaha sindromu»

U vajskovym viedamstvie i Biełym domie admovilisia kazać pra mahčymaje dačynieńnie RF, piša Deutsche Welle.

U Biełym domie admovilisia kamientavać dačynieńnie Rasii da viadomych vypadkaŭ «havanskaha sindromu». «Nakolki nam viadoma, Departamient Nacyjanalnaj raźviedki nie rabiŭ vysnovy, što da incydentaŭ datyčnaja Rasija», — zajaviła žurnalistam na tradycyjnym bryfinhu ŭ paniadziełak pres-sakratarka Biełaha doma Karyn Žan-Pjer.

Raniej u Pientahonie paviedamili, što simptomy, jakija atrymali nazvu «havanski sindrom», byli adznačanyja padčas samitu NATO ŭ Vilni ŭ 2023 hodzie.

«Ja mahu paćvierdzić, što vysokapastaŭleny čynoŭnik Ministerstva abarony adčuŭ simptomy, anałahičnyja tym, pra jakija paviedamlałasia pry anamalnych incydentach sa zdaroŭjem», — raspaviała žurnalistam namieśnica pres-sakratara Pientahona Sabryna Sinhch.

Pavodle jaje infarmacyi, čynoŭnik prysutničaŭ na samicie, ale nie ŭvachodziŭ u skład aficyjnaj delehacyi amierykanskaha vajennaha viedamstva.

Pry hetym i Karyn Žan-Pjer, i Sabryna Sinhch adznačyli, što pytańni ab mahčymym dačynieńni rasijskich śpiecsłužbaŭ da incydentaŭ varta zadavać pradstaŭnikam nacyjanalnaj raźviedki ZŠA.

HRU i «havanski sindrom»

Pad «havanskim sindromam» razumiejuć sukupnaść šerahu nieŭrałahičnych simptomaŭ, jakija ŭklučajuć hałavakružeńnie, młosnaść, hałaŭnyja boli i prablemy sa słycham, jakija ŭpieršyniu naziralisia ŭ listapadzie 2016 hoda ŭ niekatorych supracoŭnikaŭ pasolstvaŭ ZŠA i Kanady i členaŭ ich siemjaŭ u Havanie.

U nastupnyja hady anałahičnaja simptamatyka była vyjaŭlena ŭ niekalkich sotniaŭ amierykanskich dypłamataŭ, vajskoŭcaŭ i supracoŭnikaŭ śpiecsłužbaŭ u roznych krainach śvietu, što prymusiła ŭłady ZŠA ličyć toje, što adbyvajecca, nastupstvam dziejnaści zamiežnych śpiecsłužbaŭ.

Sumiesnaje rasśledavańnie CBS, Der Spiegel i The Insider vyjaviła suviaź niekatorych vypadkaŭ uźniknieńnia «havanskaha sindromu» ź dziejnaściu supracoŭnikaŭ Hałoŭnaha ŭpraŭleńnia Hienieralnaha štaba US RF (HRU).

Niekatoryja z paciarpiełych apaznali pa fatahrafijach rasijskich vajskovych raźviedčykaŭ z vajskovaj čaści 29155, jak ludziej, jakich jany bačyli pierad uźniknieńniem simptomaŭ abo adrazu paśla ich. Taksama ŭ rasśledavańni adznačajecca, što źviazanaja z HRU vajskova-miedycynskaja akademija vyvučała kliničnyja efiekty, vyklikanyja «havanskim sindromam», a adzin z klučavych udzielnikaŭ hrupy 29155 atrymaŭ dziaržaŭnuju zamovu na raspracoŭku akustyčnaj zbroi.

Pry hetym u studzieni 2022 hoda CRU pryjšło da vysnovy, što šmatlikija vypadki «havanskaha sindromu» mohuć mieć naturalnyja pryčyny i nijak nie źviazanyja ź mierkavanaj varožaj dziejnaściu inšych dziaržaŭ.

• 1
• 0
• 0
• 1
• 0
• 0
• 1
• 0