«Finski palityk», jakoha štodnia cytujuć kramloŭskija i łukašysckija ŚMI, akazaŭsia santechnikam biez hramadzianstva Finlandyi

Tak, rasijskaje ahienctva RIA «Naviny» 12 sakavika pryśviaciła jaho pastu ŭ Ch materyjał pad zahałoŭkam «Na Zachadzie zabili tryvohu praz novyja kroki ES suprać Rasii», 13 sakavika — «Novy front». U Finlandyi zrabili rezkuju zajavu pra vajnu z Rasijaj», 14 sakavika — «U Finlandyi spałochalisia praz papiaredžańnie Rasii», 15 sakavika — adrazu dva materyjały: «Najhoršy sihnał». U Finlandyi zrabili raptoŭnuju zajavu pra Rasiju» i «Pieraškoda da miru». Słovy Zielenskaha pra Rasiju vyklikali ździŭleńnie na Zachadzie», 16 sakavika — «Udała zaviaršyć»: u Finlandyi vykazalisia pra sustreču Zielenskaha z Pucinym», 17 sakavika — «Zielenski viedaje, što nie zmoža pieramahčy, zajaviŭ finski palityk» i «Heta nie spracuje». Zajava Zielenskaha pra Rasiju razaźliła Zachad».

Heta značyć, RIA tranśluje ledź nie ŭsio, što vychodzić z-pad piara Miemy. Akramia RIA «Novosti», jahonyja vykazvańni taksama rehularna publikujuć TASS, RT i inšyja prapahandysckija vydańni.

Nie nadta adstajuć i biełaruskija dziaržSMI — cytavańnie Miemy možna znajści i na BiełTA, i na «SB-Biełaruś siehodnia», i na inšych resursach.

Pry hetym u Finlandyi Miemu praktyčna nie viedajuć. Tolki ŭ apošnija miesiacy bujnyja finskija vydańni zacikavilisia nikomu nie viadomym finskim palitykam, jaki ŭ Rasii raptam staŭ adnym z samych zaŭvažnych ńjusmejkieraŭ dziaržaŭnaj presy.

U listapadzie 2025 hoda hazieta Helsingin Sanomat apublikavała artykuł pra Miemu pad zahałoŭkam «Jak santechnik z Nurmijarvi staŭ «finskim palitykam», jaki daŭ intervju rasijskim ŚMI».

U hetym artykule finskija žurnalisty źviartajuć uvahu na toje, što rasijskija ŚMI ci, naprykład, samaja pradavanaja ŭ śviecie anhłamoŭnaja hazieta The Times of India u apošni čas źmiaščajuć artykuły pad hučnymi zahałoŭkami, cytujučy «finskaha palityka». Adnak u asnovie hetych materyjałaŭ — nie vykazvańni sapraŭdy ŭpłyvovaj fihury, a pasty ŭ sacyjalnych sietkach mała kamu viadomaha ŭ Finlandyi čałavieka.

Armanda Miema — 32‑hadovy žychar Finlandyi, jaki pracuje santechnikam. Jon naradziŭsia ŭ Ałbanii, ale jaho siamja emihravała ŭ Italiju ŭ 1990‑ch hadach. Paźniej, u 2019 hodzie, jon pierajechaŭ u Finlandyju na pracu i zastaŭsia tam. Niahledziačy na toje, što jon nie maje finskaha hramadzianstva, jon krychu ŭdzielničaje ŭ miascovaj palitycy, što na peŭnych uzroŭniach (miascovym i jeŭrapiejskim) dazvolena dla ŭsich pastajannych žycharoŭ hetaj krainy.

Spačatku Miema byŭ źviazany z partyjaj «zialonych» i navat udzielničaŭ u jaje palityčnaj dziejnaści, u tym liku ŭ pieradvybarčaj kampanii viadomaha palityka Pieki Chaavista. Ale ŭ 2024 hodzie jon pakinuŭ hetu partyju, bo nie pahadžaŭsia ź jaje pazicyjaj adnosna kanfliktu ŭ Hazie, žadajučy bolš žorstkaj krytyki Izraila.

Paśla hetaha Miema bałatavaŭsia na vybarach ad nievialikaj jeŭraskieptyčnaj nacyjanał-kansiervatyŭnaj partyi «Aljans svabody». Adnak vyniki byli vielmi ścipłyja: mienš za sotniu hałasoŭ na jeŭrapiejskich vybarach i jašče mienš na miascovych.

U partyi «Aljans svabody» ŭvohule niama pradstaŭnictva ŭ parłamiencie, tamu Miemu, jak i luboha inšaha dziejača z hetaj partyi, nielha ličyć choć by kolki-niebudź značnaj palityčnaj fihuraj. Niahledziačy na heta, jaho asabistyja mierkavańni pačali raspaŭsiudžvacca ŭ miedyja jak pazicyja «finskaha palityka», što stvaraje skažonaje ŭjaŭleńnie pra realnyja nastroi ŭ Finlandyi.

Asobnuju ŭvahu pryciahnuŭ incydent u 2024 hodzie ŭ Chielsinki. Padčas mierapryjemstva, dzie vystupała staršynia Jeŭrakamisii Ursuła fon der Lajien, Miema z natoŭpu vykryknuŭ pytańnie pra hibiel dziaciej u Hazie. Paśla hetaha jaho vyvieli supracoŭniki palicyi. Sud pryznaŭ, što jon parušyŭ paradak i akazaŭ pravaachoŭnikam supraciŭ, za što pryznačyŭ štraf. Sam Miema ličyć, što nie pavodziŭ siabie ahresiŭna, i abskardžvaje rašeńnie.

Paśla hetych padziej jon pačaŭ śćviardžać, što sutykajecca z cenzuraj u Finlandyi i što jaho pohlady ihnarujucca. Jon taksama škaduje, što jaho ŭdzieł u vybarach nie atrymaŭ šyrokaha rozhałasu.

Takim čynam, «finski palityk», jakoha kožny dzień cytujuć samyja važnyja «rupary» kramloŭskaj prapahandy, a niaredka i łukašenkaŭskaj, pa fakcie akazaŭsia santechnikam biez hramadzianstva Finlandyi, jaki biespaśpiachova sprabavaŭ bałatavacca ŭ roznyja pradstaŭničyja orhany ad karlikavaj ultrakansiervatyŭnaj partyi.

• 2
• 0
• 35
• 2
• 1
• 0
• 1
• 0