Palityk, jaki nie braŭ udziełu ŭ vybarach, šmatrazova sudzimy. Što viadoma pra litoŭca z prapahandysckich pieradač BT
Apošnimi dniami ŭ Litvie asudzili dvuch litoŭskich hramadzian, jakija stajać na prarasijskich pazicyjach i rehularna ŭdzielničali ŭ prahramach dziaržaŭnych prapahandysckich ŚMI Biełarusi — Łaŭrynasa Rahielskisa i Eryku Švienčonienie. Ciapier ža ŭ prahramy BT, prynamsi, Hrodzienskaj abłasnoj telekampanii najčaściej zaprašajuć jašče adnaho litoŭca — Antanasa Kandrotasa. Jaho tam nazyvajuć «viadomym litoŭskim palitykam». «Radyjo Svaboda» pahladzieła, jak i čym jon viadomy.
Palityk, jaki nikoli nie ŭdzielničaŭ u vybarach
Antanas Kandrotas naradziŭsia ŭ Koŭnie 28 śniežnia 1980 hoda. Jon viadomy taksama pad mianuškaj Cełafan, u litoŭskich miedyja fihuruje jak Kandrotas-Celofanas.
U 2020 hodzie jon źbiraŭsia iści na vybary ŭ parłamient z partyjaj «Sajuz zmaharoŭ za Litvu», ale partyja nie zapłaciła ŭniosak, nie sabrała podpisy, a tamu jaje nie zarehistravali dla ŭdziełu ŭ vybarach.
Heta nievialikaja ultrapravaja partyja, jakuju ŭznačalvaŭ skandalny mer Koŭna Vitaŭtas Šustaŭskas (pamior u 2023 hodzie), što zajaŭlaŭ pra namier prasić palityčnaha prytułku ŭ Biełarusi — jaho niekalki razoŭ zatrymlivali za źniavahu palicejskich. Mieŭ prarasijskija pohlady, vystupaŭ suprać intehracyi Litvy ŭ Jeŭrasajuz i NATA, adzin raz abiraŭsia ŭ parłamient, a viadomaść jamu prynios tak zvany Bal žabrakoŭ, jaki jon zładziŭ u 1999 hodzie dla naroda pierad vilenskaj Ratušaj, dzie tady pieršyja asoby dziaržavy pravodzili dabračynny «Vienski bal».
U 2024 hodzie Antanas Kandrotas zajaŭlaŭ pra namier udzielničać u prezidenckich vybarach ad uznačalenaj im partyi «My — Litva» («Mes Lietuva»), ale jaho nie zarehistravali, bo jon nie padaŭ usich patrebnych dakumientaŭ.
Šmarazova asudžany za finansavaje machlarstva i nie tolki
U 2013 hodzie Vilenski akruhovy sud upieršyniu asudziŭ Kandrotasa za finansavaje machlarstva. Tady jaho pakarali pazbaŭleńniem voli na adzin hod i 7 miesiacaŭ. U 2007 hodzie jon stvaryŭ fiktyŭnuju kampaniju, jakaja nabyvała aktyvy ŭ doŭh, a potym źnik.
Druhi raz na taki ž termin jaho asudzili ŭ 2017 hodzie — jon nie spłaciŭ 700 tysiač jeŭra padatkaŭ za dziejnaść fiktyŭnaj kampanii, jakaja zajmałasia nabyćciom i prodažam bienzinu.
U listapadzie 2023 hoda jaho asudzili na čatyry hady źniavoleńnia za finansavaje machlarstva, ale ŭ 2025 hodzie daterminova vyzvalili.
U vieraśni 2025 hoda Antanasa Kandrotasa asudzili na 4 hady pazbaŭleńnia voli za ŭdzieł u biesparadkach kala litoŭskaha parłamienta. Prysud pakul nie nabyŭ jurydyčnuju siłu, bo Kandrotas jaho abskardziŭ i praces pakul nie zavieršany.
Sioleta ŭ lutym sud razhladaŭ spravu suprać jaho za abrazu byłoha deputata i raspalvańnie nianaviści na hlebie seksualnaj aryjentacyi. Abvinavačańnie prasiła sud pakarać jaho adnym hodam pazbaŭleńnia voli.
Udzielnik antyhłabalisckich pratestaŭ
Kandrotas byŭ udzielnikam akcyj pratestu suprać abmiežavańniaŭ praz pandemiju COVID-19. Na ich jon spravakavaŭ sutyknieńni z palicyjaj, sud abmiežavaŭ jaho ŭ mahčymaści ŭdzielničać u dalejšych pratestach. Na sudovych pasiadžeńniach jon u znak pratestu suprać našeńnia masak zaklejvaŭ rot skotčam.
«Palityčny ekśpiert» prapahandy ŭ Biełarusi byŭ adnym z arhanizataraŭ «Vialikaha maršu ŭ abaronu siamji» ŭ mai 2021 hoda suprać prapanavanaha ŭradam prajekta zakona ab hramadzianskim partniorstvie.
Udzielničaŭ u antyŭkrainskich akcyjach paśla rasijskaha ŭvarvańnia va Ukrainu.
Suviazi ź Biełaruśsiu
U 2021 hodzie jaho zaŭvažyli za rulom aŭtamabila z čyrvonymi numarnymi znakami — takija znaki majuć mašyny dypłamatyčnych pradstaŭnictvaŭ u Litvie. Zhodna ź infarmacyjaj litoŭskich miedyja, aŭtamabil moh naležać pasolstvu Biełarusi ŭ Litvie. Ale Antanas Kandrotas heta abviarhaŭ i śćviardžaŭ, što mašyna naležyć Maltyjskamu ordenu, siabram jakoha jon nibyta źjaŭlaŭsia. Maltyjski orden heta adchiliŭ i aficyjna ad Kandrotasa dystancyjavaŭsia.
Na svajoj staroncy ŭ Facebook Celofanas LIVE Antanas Kandrotas publikavaŭ dopisy suprać Śviatłany Cichanoŭskaj.
U studzieni 2022 hoda Antanas Kandrotas naviedvaŭ Biełaruś razam ź inšymi ŭdzielnikami antyjeŭrapiejskaj partyi «Zara spraviadlivaści» (jaje ŭznačalvaŭ Alhirdas Paleckis, asudžany za špijanaž na karyść Rasii) i ŭdzielničaŭ u sustrečy ź ministram zamiežnych spraŭ Uładzimiram Makiejem. Jany nazyvali siabie pradstaŭnikami «litoŭskaj hramadzianskaj supolnaści» i na sustrečach aburalisia palitykaj urada Litvy ŭ dačynieńni da Biełarusi paśla prymusovaj pasadki samalota Ryanair z Ramanam Pratasievičam na borcie, prezidenckich vybaraŭ 2020 hoda i mihranckaha kryzisu, jaki ŭłady Biełarusi raspačali ŭ 2021 hodzie suprać svaich jeŭrapiejskich susiedziaŭ.
U žniŭni 2025 hoda Kandrotas aktyŭna ŭdzielničaŭ u mitynhu suprać prysutnaści Śviatłany Cichanoŭskaj u Litvie, jaki arhanizavaŭ krajnie pravy deputat Vitaŭtas Sinica.
U Litvie nienaviśniku biełarusaŭ dali chatniuju chimiju i zabaranili karystacca internetam
Litoviec, jakoha abviaścili na radzimie ŭ vyšuk, znajšoŭsia ŭ Biełarusi — byŭ «niezaležnym» naziralnikam na vybarach
Biespracoŭny z sudzimaściu, niania, administratar hatela i admaŭlalnik Chałakostu. Kaho łukašenkaŭskaja prapahanda vydaje za zamiežnych ekśpiertaŭ?
Kolki kaštuje biełaruskaja prapahanda dla Polščy i chto jaje robić
Kamientary