Prosty biełarus ździviŭ ludziej, kali ŭ Hiermanii pryznavaŭsia ŭ lubovi da Łukašenki. Ale akazałasia, što jon niaprosty
Padčas vuličnaj apytanki ruskamoŭny błohier u Hiermanii vyrašyŭ parazmaŭlać z dalnabojščykam z Bresta. «Naša Niva» vyśvietliła, što ž za prychilnik Łukašenki ciahajecca pa Hiermanii. Jon akazaŭsia byłym pahraničnikam.
Ruskamoŭny błohier Adynajeŭ zvyčajna robić apytanki z pradstaŭnikami roznych nacyjanalnaściaŭ na vulicach Hiermanii. Na jaho kanał u YouTube padpisana bolš za 70 tysiač čałaviek, u instahramie jon maje 107 tysiač padpisčykaŭ.
Čarhovym surazmoŭcam błohiera staŭ biełarus u kaŭbojskim kapielušy, jaki pradstaviŭsia Alaksandram z Bresta. Maŭlaŭ, užo try hady pracuje dalnabojščykam kadencyjami ŭ Jeŭropie.
Na pytańnie błohiera pra toje, čym adroźnivajecca Hiermanija ad Biełarusi, mužčyna adkazaŭ prapahandysckimi štampami. Vydaŭ i pra čyściniu biełaruskich vulic, i pra toje, byccam by niemcy bolš abyjakavyja da žyćcia, inšaja sprava — vychadcy z byłoha SSSR.
Alaksandr zajaviŭ, što sam by nikoli nie zmoh pryžycca ŭ Hiermanii, bo vielmi mocna lubić Biełaruś. U jakaści dokazu svajho patryjatyzmu pieradaŭ pryvitańnie Łukašenku.
Błohier spytaŭ u Alaksandra, čamu narod Biełarusi padtrymlivaje Łukašenku: «Zachad kaža, što jon dyktatar, ale ž my viedajem, što ŭ Biełarusi 99% jaho padtrymlivaje».
I voś što adkazaŭ dalnabojščyk:
— Heta kaža zachodni ŭrad, jakomu nie padabajecca jahony punkt hledžańnia. Jamu nie padabajecca naš paradak. Nie padabajecca, što ŭ nas usio pracuje niahledziačy ni na što. Pryčym narod — luby narod — Bielhii, Francyi, Ispanii stanoŭča staviacca [da Łukašenki].
Na pytańnie, čaho z pabačanaha ŭ Hiermanii nie chapaje ŭ Biełarusi, Alaksandr skazaŭ:
— Nu voś sabor hety možna było b — cha-cha — sabrać u nas. Mnie padabajecca architektura, historyja hłybokaja. Bo ŭ majoj krainie ŭsio było razburana vajnoj, i jana zanava była adbudavana. Tut taksama byli vojny, kaniečnie, ale maštaby tut uražvajuć. Pryhažość nievierahodnaja.
Błohier paprasiŭ Alaksandra skazać niekalki słoŭ pa-biełarusku — maŭlaŭ, jon zvyčajna prosić surazmoŭcaŭ kryšačku parazmaŭlać na ich rodnaj movie.
Biełarus u adkaz paśmichnuŭsia i zajaviŭ, što dla biełarusaŭ rodnaja mova — ruskaja. Ale ŭsio ž vycisnuŭ ź siabie: «Šanoŭnyja hledačy, vitajem u Hiermanii!»
Videa publikavałasia jašče letaś, a ciapier znoŭ zavirusiłasia.
Hieroj videa — Alaksandr Ahapaŭ z Bresta. Raniej jon byŭ pamiežnikam — u adpaviednaj formie jaho možna pabačyć na fotazdymkach BiełTA jašče ŭ minułym hodzie.
Taksama ŭ rodnym horadzie Alaksandr viadomy i jak vadałaz-ratavalnik, niekatory čas jon pracavaŭ na ratavalnaj stancyi № 1 u Breście. Ale potym staŭ na zamovu šukać u vadajomach zhublenyja rečy.
ŚMI pisali pra jaho i z toj nahody, što mužčyna vypadkova znajšoŭ u race miedal vieterana. Alaksandr šukaŭ zaručalny piarścionak, jaki niechta zhubiŭ pry kupańni, a ŭ pracesie znajšoŭ i miedal 1945 hoda «Za advahu». Uładalnika miedala atrymałasia znajści i ŭručyć jamu stratu.
Zaśviaciŭsia Alaksandr u masoŭcy filma «Palavańnie na haŭlajtara» — hraŭ adnaho z fašystaŭ, jaki sustrakaŭ u Minsku Vilhielma Kube.
U Threads zavirusiłasia intervju z Alaksandram. Kamientaryi ŭ asnoŭnym ździeklivyja.
Ludzi cikaviacca, čamu taki nibyta patryjot nie pracuje ŭ Biełarusi:
«Łukašenka — cudoŭny prezident, tamu jon vymušany być hastarbajtaram», «Usie zajzdrościać, ale pracuju ŭ Hiermanii. Dziŭna», «Pytańnie: kali ŭsio cudoŭna, čamu ty pracuješ u Hiermanii? Čamu amierykancy, anhličanie nie jeduć pracavać u Hiermaniju?», «Na słovach lubić radzimu, ale charčavacca jeździć da panoŭ u hiejropu, jakaja zahnivaje», «Biełarus, jaki ruski, a ŭ Jeŭropie pa polskich dakumientach. Patryjot. Pytańnie, čamu pałova biełarusaŭ u Jeŭropie, pałova ŭ Rasii, a Łukašenka małajčyna?».
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty10
Kamientary