«Ja raskazvaŭ im pra mietady niehvałtoŭnaha supracivu Rasii». Partniora Karač pa pacyfiźmie źbili ŭ kijeŭskim vajenkamacie

Ukrainski błohier Juryj Šalaženka pazicyjanuje siabie jak navukovaha supracoŭnika i vykanaŭčaha sakratara «Ukrainskaha pacyfisckaha ruchu», dyrektara Instytuta miru i prava va Ukrainie, a taksama jak siabra praŭleńnia Jeŭrapiejskaha biuro pa pytańniach admovy ad vajskovaj słužby pa mierkavańniach sumleńnia i arhanizacyi «Śviet biez vajny».

Jon nazyvaje siabie kvakieram-pacyfistam i zaklikaje supraciŭlacca rasijskaj ahresii niehvałtoŭnymi sposabami. Pieraškodaj da miru jon ličyć nie tolki rasijski impieryjalizm, ale i ŭkrainski nacyjanalizm.

U 2023 hodzie błohier zaklikaŭ spynić pastaŭki zbroi Ukrainie. U tym ža hodzie Šalaženku zatrymlivała Słužba biaśpieki Ukrainy — za toje, što jon zaklikaŭ žycharoŭ Kijeva ŭchilacca ad pryzyvu i ŭciakać za miažu. U vyniku jaho abvinavacili ŭ apraŭdańni rasijskaj ahresii.

22 sakavika 2026 hoda Šalaženka vystupiŭ ź videazvarotam, u jakim abvinavaciŭ supracoŭnikaŭ terytaryjalnych centraŭ kamplektavańnia (TCK) u vykradańni i katavańniach.

Pavodle jaho słoŭ, viečaram 19 sakavika, kali jon išoŭ na poštu, jaho zatrymała palicyja — nibyta dla składańnia pratakoła. Adnak zamiest hetaha błohiera zapichali ŭ mašynu i dastavili ŭ Piačerski TCK.

Kvakier-pacyfist śćviardžaje, što padčas zatrymańnia i znachodžańnia ŭ vajenkamacie jaho «katavali, pšykali bałončykam u tvar. Bili pa tvary, ciahali za vałasy pa padłozie. Bili kułakami i nahami».

U jakaści dokazaŭ mužčyna prademanstravaŭ try siniaki na levaj ruce i pasmu vyrvanych vałasoŭ. Taksama Šalaženka zajaviŭ, što ŭ jaho adabrali mabilny telefon, viarnuŭšy tolki birku ad jaho.

Pa słovach błohiera, jon davodziŭ palicyi svajo prava na «dobrasumlennuju admovu ad vajskovaj słužby». Jon spasyłaŭsia na 35‑y artykuł Kanstytucyi Ukrainy i 23‑i artykuł zakona ab mabilizacyi, jaki vyzvalaje navukovych supracoŭnikaŭ ad pryzyvu.

Paźniej błohiera pieraviali ŭ Śviatošynski TCK, dzie, jak jon kaža, umovy byli prynižalnymi — jamu navat admaŭlali ŭ tualetnaj papiery. Šalaženka nie ŭdakładniŭ, pry jakich abstavinach jaho ŭ vyniku praz dva dni adpuścili, nazvaŭšy heta «Božaj dapamohaj».

Pavodle jaho słoŭ, znachodziačysia ŭ rasparadžeńni siłavikoŭ, jon «praciahvaŭ prapaviedavać mir, raspaviadać pra navukovyja asnovy niehvałtoŭnych dziejańniaŭ, raspaviadać pra mietady niehvałtoŭnaha supracivu rasijskaj ahresii, pra adpaviednyja prapanovy, nakiravanyja ŭ Ofis prezidenta».

Ciapier błohier rychtuje zvaroty ŭ orhany pa abaronie pravoŭ čałavieka.

«U majoj pravaabarončaj dziejnaści pieražyć takoje samomu — heta jašče adna nahoda pracavać bolš uparta, kab abaranić pravy čałavieka va Ukrainie. A jak dla viernika heta taksama pamiać pra Božaje błasłavieńnie na dobryja spravy. Isus Chrystos skazaŭ nam, što treba imknucca da śviatła, i śviatło pieramoža ciemru. Niachaj budzie tak», — takimi słovami Šalaženka zakončyŭ zvarot.

Adznačym, što Šalaženka zaniesieny na sajt «Miratvorac» z nastupnymi abvinavačvańniami:

«Z 2009 da 2022 hoda rehularna pisaŭ dla rasijskaha vydańnia «Echo Moskvy», viadomaha jak padkantrolnaje rasijskamu režymu psieŭdalibieralnaje ŚMI. U 2015‑m vystupaŭ suprać mabilizacyi, a ŭ 2017‑m pieraškadžaŭ błakavańniu rasijskich sacyjalnych sietak».

Šalaženka — daŭni partnior biełaruskaj aktyvistki Volhi Karač. Ich arhanizacyi ŭdzielničajuć u adnych i tych ža samitach, ich razam «naminavali» na Nobieleŭskuju premiju miru. Kali Volhu Karač nazvali pahrozaj dla nacyjanalnaj biaśpieki Litvy, mienavita arhanizacyja ŭkrainskaha błohiera rassyłała pa ŚMI zajavy ŭ jaje padtrymku.

• 4
• 2
• 18
• 20
• 1
• 0
• 0
• 0