Maci biełarusa, jaki vajavaŭ suprać Ukrainy i byŭ aryštavany ŭ Biełarusi za zdradu dziaržavie, zapisała videa da Łukašenki
Jana aburanaja tym, što jaje syn, Maksim Ziaziulčyk, jaki ŭdzielničaŭ u «SVA» na baku Rasii i maje ŭznaharody, byŭ aryštavany ŭ Biełarusi, kali pryjechaŭ adnaŭlać dakumienty, a ŭ kałonii jaho «štučna zrabili złosnym parušalnikam».
Pra ŭradženca Rudzienska Maksima Ziaziulčyka, jaki paśla viartańnia z ukrainskaha pałonu byŭ asudžany ŭ Biełarusi, stała viadoma ŭ minułym hodzie. Ciapier jaho maci raskazała padrabiaznaści, źviarnuŭ uvahu kanał «Vitiebsk, ja hulaju!»
Ała Rysieviec, maci Maksima Ziaziulčyka, zapisała videazvarot da Alaksandra Łukašenki, u jakim prosić ab spraviadlivaści i faktyčna sprabuje damahčysia dla syna mahčymaści padać prašeńnie ab pamiłavańni.
Ź jaje słoŭ vynikaje, što zaraz zrabić heta amal niemahčyma: pavodle jaje viersii, u kałonii Maksima štučna zrabili «złosnym parušalnikam», pazbavili častki naležnych umoŭ utrymańnia, a za sproby nakiravać chadajnictva na imia Łukašenki adpraŭlali ŭ ŠIZA.
Jana aścierahajecca, što i hety zvarot moža adbicca na ŭmovach jaho ŭtrymańnia ŭ horšy bok.
U zvarocie jana taksama ŭpieršyniu publična nazyvaje prysud: pavodle jaje słoŭ, Ziaziulčyku dali 7 hadoŭ uzmocnienaha režymu pa č. 1 art. 356 KK RB — artykule ab «zdradzie dziaržavie».
U čym sutnaść abvinavačańniaŭ, jana nie ŭdakładniaje.
Jana kaža, što jaje syn vajavaŭ na baku Rasii, byŭ uznaharodžany miedalom «Za advahu», pradstaŭleny da ordena Mužnaści i, pavodle jaje słoŭ, «vyratavaŭ i navučyŭ na terytoryi SVA šmat chłopcaŭ». Paśla pałonu, pavodle jaje, jon padpisaŭ novy kantrakt z vojskam RF, i prajšoŭ usie pravierki.
Sa słoŭ maci vynikaje, što va ŭkrainskim pałonie Maksim pravioŭ paŭtara hoda. Jana śćviardžaje, što tam jaho padviarhali katavańniam, pravakacyjam, źbićciu, hoładu, nie akazvali miedycynskuju dapamohu, a rany hnailisia. Pry hetym, pavodle jaje słoŭ, kali syn apynuŭsia ŭ pałonie, «u Biełarusi nichto navat palcam nie pavarušyŭ, kab dapamahčy».
Jak raskazvaje jana, Ziaziulčyka zatrymali, kali toj pryjechaŭ u Biełaruś dla adnaŭleńnia dakumientaŭ.
Maksim Ziaziulčyk — hramadzianin Biełarusi, jaki vajavaŭ u składzie PVK «Redut» i trapiŭ u pałon 19 vieraśnia 2022 hoda. Paśla abmienu 8 lutaha 2024 hoda jaho pieradali Rasii, a vosieńniu 2024 hoda zatrymali ŭžo pry pierasiačeńni miažy Rasii i Biełarusi. 8 žniŭnia 2025 hoda jaho sudzili ŭ Mahiloŭskim abłasnym sudzie ŭ zakrytym režymie pa artykule ab dziaržzdradzie. Raniej ŚMI pisali i pra artykuł za najomnictvie, ale maci Ziaziulčyka pra heta nie zhadvaje.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary