Маці беларуса, які ваяваў супраць Украіны і быў арыштаваны ў Беларусі за здраду дзяржаве, запісала відэа да Лукашэнкі
Яна абураная тым, што яе сын, Максім Зязюльчык, які ўдзельнічаў у «СВА» на баку Расіі і мае ўзнагароды, быў арыштаваны ў Беларусі, калі прыехаў аднаўляць дакументы, а ў калоніі яго «штучна зрабілі злосным парушальнікам».
Пра ўраджэнца Рудзенска Максіма Зязюльчыка, які пасля вяртання з украінскага палону быў асуджаны ў Беларусі, стала вядома ў мінулым годзе. Цяпер яго маці расказала падрабязнасці, звярнуў увагу канал «Витебск, я гуляю!»
Ала Рысевец, маці Максіма Зязюльчыка, запісала відэазварот да Аляксандра Лукашэнкі, у якім просіць аб справядлівасці і фактычна спрабуе дамагчыся для сына магчымасці падаць прашэнне аб памілаванні.
З яе слоў вынікае, што зараз зрабіць гэта амаль немагчыма: паводле яе версіі, у калоніі Максіма штучна зрабілі «злосным парушальнікам», пазбавілі часткі належных умоў утрымання, а за спробы накіраваць хадайніцтва на імя Лукашэнкі адпраўлялі ў ШІЗА.
Яна асцерагаецца, што і гэты зварот можа адбіцца на ўмовах яго ўтрымання ў горшы бок.
У звароце яна таксама ўпершыню публічна называе прысуд: паводле яе слоў, Зязюльчыку далі 7 гадоў узмоцненага рэжыму па ч. 1 арт. 356 КК РБ — артыкуле аб «здрадзе дзяржаве».
У чым сутнасць абвінавачанняў, яна не ўдакладняе.
Яна кажа, што яе сын ваяваў на баку Расіі, быў узнагароджаны медалём «За адвагу», прадстаўлены да ордэна Мужнасці і, паводле яе слоў, «выратаваў і навучыў на тэрыторыі СВА шмат хлопцаў». Пасля палону, паводле яе, ён падпісаў новы кантракт з войскам РФ, і прайшоў усе праверкі.
Са слоў маці вынікае, што ва ўкраінскім палоне Максім правёў паўтара года. Яна сцвярджае, што там яго падвяргалі катаванням, правакацыям, збіццю, голаду, не аказвалі медыцынскую дапамогу, а раны гнаіліся. Пры гэтым, паводле яе слоў, калі сын апынуўся ў палоне, «у Беларусі ніхто нават пальцам не паварушыў, каб дапамагчы».
Як расказвае яна, Зязюльчыка затрымалі, калі той прыехаў у Беларусь для аднаўлення дакументаў.
Максім Зязюльчык — грамадзянін Беларусі, які ваяваў у складзе ПВК «Рэдут» і трапіў у палон 19 верасня 2022 года. Пасля абмену 8 лютага 2024 года яго перадалі Расіі, а восенню 2024 года затрымалі ўжо пры перасячэнні мяжы Расіі і Беларусі. 8 жніўня 2025 года яго судзілі ў Магілёўскім абласным судзе ў закрытым рэжыме па артыкуле аб дзяржздрадзе. Раней СМІ пісалі і пра артыкул за наёмніцтве, але маці Зязюльчыка пра гэта не згадвае.
Цяпер чытаюць
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары