Kaśmičny karabiel «Aryjon» sychodzić z arbity Ziamli i adpraŭlajecca da Miesiaca
Čatyry astranaŭty — try amierykancy i adzin kanadiec — stanuć pieršymi ŭ historyi ludźmi, jakija ŭłasnymi vačyma ŭbačać advarotny bok Miesiaca.
Kaśmičny karabiel «Aryjon», jaki lacić da Miesiaca ŭ ramkach misii «Artemida-2» z čatyrma astranaŭtami na borcie, sychodzić z arbity Ziamli i nakiroŭvajecca ŭ bok jaje spadarožnika.
Jak i było zapłanavana, kala 19:49 pa časie Uschodniaha ŭźbiarežža ZŠA (02:49 pa Minsku), ruchaviki «Aryjona» ŭklučylisia i praviali tak zvany «tranśmiesiacavy inžekcyjny impuls», heta značyć nadali karablu paskareńnie.
Jany pracavali na praciahu prykładna šaści chvilin, u vyniku čaho karabiel pačaŭ pakidać ziamnuju arbitu. Heta adzin z klučavych etapaŭ misii, pakolki paśla jaho karablu ciažka paviarnuć nazad da Ziamli.
«Čałaviectva znoŭ pakazała, na što jano zdolna, — skazaŭ paśla impulsu Džeremi Chansien, astranaŭt Kanadskaha kaśmičnaha ahienctva. — Našamu šlachu da Miesiaca dapamahajuć vašyja nadziei na budučyniu».
Paźniej členy ekipaža paviedamili, što im adkryŭsia vielmi pryhožy vid na cienievy bok Ziamli.
Supracoŭniki NASA skazali na pres-kanfierencyi, što impuls prajšoŭ biezdakorna.
«Ź vialikaj radaściu mahu vam paviedamić, što ŭpieršyniu z 1972 hoda, kali prachodziła misija «Apałon-17», ludzi pakinuli arbitu Ziamli», — skazała žurnalistam pradstaŭnik NASA Łory Hlejz.
Paźniej členy ekipaža praviali svaju pieršuju kaśmičnuju pres-kanfierencyju: jany adkazali na pytańni amierykanskich telekanałaŭ.
Astranaŭt Kryścina Koch pryznałasia, što mienavita joj davodziłasia zajmacca ramontam bartavoha tualeta, i dadała: «Lublu kazać, što [vantuz] — heta samy važny instrumient u kosmasie». Jana patłumačyła, što paśla niekatorych niepaładak ciapier hety vuzieł pracuje.
Padčas pres-kanfierencyi pierad astranaŭtami płavała miakkaja cacka-talisman misii, jakuju namalavaŭ vaśmihadovy žychar San-Francyska Łukas Ji.
Da hetaha «Aryjon» paśpiachova raskryŭ soniečnyja paneli, a praź niekatory čas zrabiŭ manieŭr, jaki vyvieŭ jaho na vysokuju kalaziamnuju arbitu — tam ekipaž pravioŭ sieryju vyprabavańniaŭ karabla, piša Bi-bi-si.
Pierad impulsam «Aryjon» znoŭ nabliziŭsia da Ziamli: u momant paskareńnia jon znachodziŭsia ad jaje na adlehłaści kala 185 km.
Ciapier pačaŭsia šlach karabla z astranaŭtami ŭ bok Miesiaca, da jakoha jany pavinny prybyć u paniadziełak, 6 krasavika. Pasadki na ziamny spadarožnik u ramkach misii nie budzie, «Aryjon» tolki pralacić vakoł jaho.
Čatyry astranaŭty — try amierykancy i adzin kanadiec — stanuć pieršymi ŭ historyi ludźmi, jakija na ŭłasnyja vočy ŭbačać advarotny bok Miesiaca.
Zatym jany pačnuć zvarotny šlach da Ziamli, jakomu dapamoža naturalnaja hravitacyja Miesiaca. Takim čynam ciapierašni impuls adnačasova dazvolić karablu dasiahnuć Miesiaca i viarnucca na Ziamlu.
Čałaviek znoŭ lacić da Miesiaca. NASA siońnia adpraŭlaje pieršy za paŭstahodździa piłatavany karabiel da spadarožnika Ziamli — misiju «Artemida-2»
ZŠA adpravili kaśmičny karabiel z astranaŭtami na Miesiac
Čamu ludzi paŭstahodździa nie lotali da Miesiaca?
U astranaŭtaŭ «Artemidy II» ŭźnikła pieršaja prablema: złamałasia kaśmičnaja prybiralnia
Kamientary