Jak Pakistan arhanizavaŭ krochkaje spynieńnie ahniu pamiž ZŠA i Iranam
U hadziny, što papiaredničali navinie pra dvuchtydniovaje pieramirje pamiž Iranam i ZŠA, pieršyja aściarožnyja nadziei źjavilisia dziakujučy Pakistanu, piša Bi-bi-si.
Krynica ŭ Isłamabadzie na ŭmovach ananimnaści paviedamiła Bi-bi-si, što pieramovy vialisia «dynamična», a Pakistan vystupaŭ pasiarednikam pamiž Iranam i ZŠA. Pieramovy z boku hetaj krainy viali «vielmi vuzkaje koła asob». Udzielniki apisvali atmaśfieru jak «zmročnuju i surjoznuju, ale z nadziejaj na spynieńnie bajavych dziejańniaŭ».
Na praciahu apošnich niekalkich tydniaŭ Pakistan pracavaŭ pasiarednikam pamiž Iranam i ZŠA, pieradajučy paviedamleńni ad adnaho boku inšamu. Kraina maje daŭnija suviazi ź Iranam, ahulnuju miažu i rehularna nazyvaje adnosiny z susiedam «brackimi».
Što da adnosin z ZŠA, prezident Tramp nazvaŭ kiraŭnika ŭzbrojenych sił Pakistana fieldmaršała Asima Munira svaim «lubimym» fieldmaršałam i adznačyŭ, što toj viedaje Iran «lepš za mnohich».
Pakistan razam ź Izrailem i ZŠA źjaŭlajecca aficyjna pryznanaj jadziernaj dziaržavaj i ŭvachodzić u «jadzierny kłub».
Dasiahnieńnie pahadnieńnia zastavałasia pad pytańniem. Vystupajučy ŭ parłamiencie ŭ aŭtorak uviečary, ministr zamiežnych spraŭ Pakistana Ischak Dar adznačyŭ: «Da ŭčorašniaha dnia my mieli vialiki aptymizm adnosna pazityŭnaha raźvićcia padziej», — heta było jašče da taho, jak u paniadziełak Izrail atakavaŭ Iran, a Iran nanios udar pa Saudaŭskaj Aravii.
Pavodle jaho słoŭ, Pakistan «usio jašče sprabavaŭ maksimalna ŭrehulavać situacyju».
Fieldmaršał Munir vykazaŭsia jašče bolš krytyčna. Padčas razmovy z vajskovymi čynoŭnikami ŭ aŭtorak jon zajaviŭ, što napad na Saudaŭskuju Araviju «psuje ščyryja namahańni pa mirnym vyrašeńni kanfliktu».
Heta była, mahčyma, samaja žorstkaja rytoryka Pakistana ŭ dačynieńni da Irana z pačatku supraćstajańnia.
Niekatoryja analityki dapuścili, što heta moža ŭzmacnić cisk na Tehieran. Pakistan maje abarončy pakt z Saudaŭskaj Aravijaj, i choć Er-Ryjad nieadnarazova padviarhaŭsia atakam, Pakistan pakul nie zadziejničaŭ umovy hetaha pahadnieńnia.
Paśla 00:00 pa pakistanskim časie premjer-ministr krainy Šachbaz Šaryf napisaŭ u X, što «dypłamatyčnyja namahańni… upeŭniena i mocna prasoŭvajucca, što daje nadzieju na istotnyja vyniki ŭžo najbližejšym časam».
Jon taksama zaklikaŭ prezidenta Trampa padoŭžyć krajni termin na dva tydni, a Iran — na hety ž pieryjad adkryć Armuzski praliŭ.
Ambasadar Irana ŭ Pakistanie Reza Amiry Mahadam kala 03:00 pa miascovym časie paviedamiŭ u X, što baki zrabili «krok napierad, pieraadoleŭšy krytyčnuju i adčuvalnuju stadyju».
Krychu raniej za 05:00 premjer-ministr Pakistana Šachbaz Šaryf abviaściŭ pra dasiahnieńnie damoŭlenaści ab spynieńni ahniu i zaprasiŭ abodva baki sustrecca ŭ Isłamabadzie ŭ piatnicu, 10 krasavika, dla «dalejšych pieramovaŭ dziela kančatkovaha pahadnieńnia».
«My ŭsio jašče zachoŭvajem vialikuju aściarožnaść», — paviedamiła krynica ŭ Pakistanie Bi-bi-si, padkreśliŭšy «praciahłuju krochkaść» situacyi.
Pamiž bakami dahetul niama davieru, a ich pazicyi zastajucca žorstkimi i niepachisnymi.
Choć Pakistan i moža pasadzić abodvuch apanientaŭ za stoł pieramoŭ, hałoŭnym pytańniem zastajecca, ci zmohuć jany znajści punkty sudakranańnia dla kančatkovaha pahadnieńnia.
Kamientary