«Heta ličanyja kiłamietry». U Kramli raspaviali, čamu nie ruchajucca pieramovy z Ukrainaj
Roznahałośsi Maskvy i Kijeva pa terytaryjalnym pytańni zaklučajucca ŭ «ličanych kiłamietrach», zajaviŭ pres-sakratar rasijskaha prezidenta Dźmitryj Piaskoŭ. Jon skazaŭ, što paśla vielikodnaha pieramirja vajskovyja dziejańni praciahnucca.
Śpikier Kramla Dźmitryj Piaskoŭ paćvierdziŭ, što terytaryjalnaje pytańnie źjaŭlajecca adnoj z hałoŭnych tem dla abmierkavańnia padčas pieramoŭ nakont vajny va Ukrainie, i pa hetym pytańni nie było nijakaha prasoŭvańnia.
Asnoŭnaj pieraškodaj dla miru Piaskoŭ nazvaŭ pazicyju ŭkrainskaha boku. Jon skazaŭ, što «roznahałośsi Maskvy i Kijeva pa terytaryjalnym pytańni zaklučajucca ŭ ličanych kiłamietrach», majučy na ŭvazie častku Danieckaj vobłaści, jakuju Rasija patrabuje pieradać pad svoj kantrol.
«Nie, heta sapraŭdy ličanyja kiłamietry… hruba kažučy, tam 18—17% Danieckaj Narodnaj Respubliki, jakuju zastałosia nam vyzvalić, i heta budzie aznačać vychad na administracyjnyja miežy», — skazaŭ svaju viersiju pradstaŭnik Kramla.
Kreml aficyjna paćvierdziŭ namier praciahnuć vajennyja dziejańni suprać Ukrainy paśla zakančeńnia 36‑hadzinnaha «vielikodnaha pieramirja». Piaskoŭ skazaŭ, što Maskvie patrebny «ŭstojlivy mir». «Adnak jon moža nastupić, kali my zabiaśpiečym našy intaresy, dasiahniom tych metaŭ, jakija stavilisia z samaha pačatku», — dadaŭ jon.
U svaju čarhu Uładzimir Zielenski vystupiŭ za padaŭžeńnie režymu cišyni, padkreśliŭšy hatoŭnaść Ukrainy da dypłamatyčnaha šlachu. «Było b pravilna, kab spynieńnie ahniu praciahvałasia i dalej. My vysunuli hetuju prapanovu Rasii, i kali Rasija znoŭ vybiera vajnu zamiest miru, heta jašče raz prademanstruje śvietu, chto i čaho nasamreč choča», — zajaviŭ prezident Ukrainy.
Kijeŭ praciahvaje nastojvać na tym, što lubyja damoŭlenaści pavinny supravadžacca mižnarodnymi harantyjami biaśpieki dla praduchileńnia novaj ahresii.
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary