Siabroŭka pa Niaśvižy pra Mielnikavu: Niby padmianili žančynu, ja ž viedała zusim inšuju Anžaliku
Mastačka, paetka i hramadskaja dziejačka ź Niaśviža Natalla Bordak, jakuju šmat chto viedaje pad psieŭdanimam Natałka Chvoja, raspaviała «Salidarnaści» pra byłuju śpikierku Kaardynacyjnaj rady Anžaliku Mielnikavu, jakaja spačatku tajamniča źnikła z Polščy, a paśla, vyhladaje, apynułasia ŭ Biełarusi.
Natalla Bordak
— Niekatoryja ahulnyja znajomyja nie vierać ni ŭ ciapierašnija fota, ni ŭ toje, što pišuć zaraz pra Anžaliku.
U 2020‑m jana ładziła akcyju na rovarach sa ściahami pa parku. A paśla, byli ŭ domie jaje maci, Anžalika zaprasiła. Dom dobry, pryhoža vakoł, harbatu pili. Niejak ciažka ŭjavić, što jana mahła akazacca sa śpiecsłužbaŭ.
— Ale ž dźvie kvatery ad jaje imia nibyta nabyli niadaŭna…
— Dziŭna ŭsio heta, zahadkava. Kali ŭ Anžaliki była svaja kvatera, jakuju spačatku apiačatali vorhany, potym viarnuli, — tady navošta jašče dźvie? I čamu nie pakazvajuć pa BT? Pakažycie ŭžo žyŭcom!
Nibyta zvonić baćku, razmaŭlaje, a jon Anžalicy patelefanavać nie moža. Dziŭnaja historyja, ćmianaja, zabłytanaja — u Niaśvižy padazrona staviacca da ŭsiaho hetaha.
Pieršy raz Anžaliku pabačyła naprykancy leta 2020‑ha na mitynhu, kali ludzi sabralisia nasuprać pałaca Radziviłaŭ. Tady ž asabista i parazmaŭlała ź joj. U toj čas Mielnikava śmieła vykazvałasia ŭ adras dziejučaha režymu, i pra falsifikacyju vybaraŭ, i pra dalejšyja dziejańni, i šmat inšaha.
Kali Anžaliku zasudzili, jana ź siamjoj adrazu źjechała. Pisała, što jaje papiaredziła znajomaja. Žonka milicyjanta.
Ja z Anžalikaj niejki čas jašče pierapisvałasia. I razam byli ŭ čacie «Svobodnyj Nieśviž», u mianie jašče zastaŭsia skryn fota ad 8 sakavika 2021-ha: «Pavinšujem našych aktyŭnych zmaharak!»
Adzin čas Anžalika navat sprabavała dapamahčy. U 2020-m, kali mianie zabrali, napisała pra heta ŭ fejsbuku.
Paśla maich sodniaŭ, viedajučy, što žyviem na adnu maju piensiju, bo synoŭ pazvalniali, Anžalika zapościła na svajoj staroncy ŭ sacsietcy niekalki maich karcin. Chtości navat adhuknuŭsia i nabyŭ.
— Vy raspaviadajecie pra mitynhi dy padtrymku Anžaliki. Ale ž chtości padumaje, što kali jana ŭžo atrymała zadańnie, to i pavodziła siabie adpavjedna. Ažno z 2020-ha.
— Dyk my i na sud da Anžaliki prychodzili, čałaviek 20 sabrałasia. I videa było, ale ž jaje staronka pačyščanaja, vydalenyja i videa, i fotazdymki. Nie viedaju ź jakoha času, napeŭna ž, sama pavydalała. Kali toj sud pieranieśli, bo šmat ludziej pryjšło, Anžalika vyjšła na prystupki, dy rezka raskrytykavała i pracu suda. Vykazała ŭsio, što chacieła ŭ bok supracoŭnikaŭ vorhanaŭ. Adzin ź jakich nastojliva prasiŭ razyjścisia.
Pamiataju, što na staroncy Anžaliki byli fotazdymki, dzie jana sa svajoj maci na fonie mora. I z dačkoj byŭ fotazdymak, kali małodšaja ŭ Biełastoku ŭ škołu pajšła, pryhožyja takija.
Prykra, što historyja atrymałasia vielmi brudnaj. Niby padmianili žančynu: ja ž viedała zusim inšuju Anžaliku — spahadlivuju (prynamsi, tak vyhladała), pramaliniejnuju, aktyŭnuju. Dakładna, staiš, jak na razdarožžy, nie viedajučy — vieryć ci nie?
Kali Anžalika ŭžo ŭ Biełastoku žyła, to bolš choładna mnie adkazvała. A potym i ŭvohule vydaliła. I z čata, i z telehrama, viasnoj 2021-ha.
Byłaja śpikierka Kaardynacyjnaj rady Anžalika Mielnikava źnikła ŭ sakaviku 2025 hoda. U apošni raz jaje bačyli na Šry-Łancy, kudy ŭ toj ža čas pryjazdžaŭ Alaksiej Łabiejeŭ — 32‑hadovy mužčyna, ź jakim u Mielnikavaj byli adnosiny i jaki źjaŭlajecca, jak vyśvietlili žurnalisty, supracoŭnikam Upraŭleńnia vajennaj kontrraźviedki KDB.
Anžalika Mielnikava paśla źniknieńnia nabyła dźvie kvatery ŭ Minsku
Łatuška: Nie mahu vyklučyć, što na niejkim etapie Mielnikava mahła trapić u pastku śpiecsłužbaŭ
«Jaje «vyvieli» z Polščy». Byłaja aficerka Ahienctva ŭnutranaj biaśpieki — pra toje, što Mielnikava znajšłasia
Łatuška: Anžalika Mielnikava viedała šmat adčuvalnaj infarmacyi
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja
Hulajuć skrynšoty z Anžalikaj Mielnikavaj u trenažorcy ŭ Minsku
Ciapier čytajuć
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč36
Kamientary