Małady smarhonski ščypač zvolniŭsia z «Kranaspana» i pajechaŭ šturmavać Kupiansk — ciapier maci šukaje, jak atrymać mahilnyja
Viedajučy zvyčki Siarhieja Ivanova, u rodnaj Smarhoni na narmalnuju pracu jaho nie brali. Ale mieniedžmientu aŭstryjskaha «Kranaspana» było ŭsio roŭna — vialikija draŭlanyja paneli nie ŭvałačeš, možna brać hruzčykam. U 2023 hodzie aŭstryjcy syšli ź Biełarusi, a małady biełarus pajechaŭ šukać ščaścia ŭ Rasiju i ŭrešcie zahinuŭ pad Kupianskam.
«Našaj Nivie» stała viadoma pra jašče adnaho maładoha biełarusa, jaki naradziŭsia na zachadzie krainy — u Smarhoni, — ale vybraŭ niapravilnuju stratehiju žyćcia i ŭ vyniku skončyŭ jaho daloka na ŭschodzie, šturmujučy pazicyi ŭkraincaŭ pad Kupianskam.
Heta Siarhiej Ivanoŭ, jamu 32 hady. Reputacyja ŭ horadzie siarod ravieśnikaŭ — admoŭnaja. Kažuć, kraŭ ź dziacinstva. Kali skraŭ pieršy raz, vyznačyć niemahčyma, ale voś kali pieršy raz trapiŭsia — možna.
Pavodle dadzienych Belpol, pieršuju kryminałku na Siarhieja zaviali ŭ 2017 hodzie, pa zajavie sabutelnic.
Dźvie rabotnicy aŭtaahrehatnaha zavoda łaskava zaprasili Ivanova ŭ svoj pakoj rabočaha internata «dla sumiesnaha raśpićcia śpirtnych napojaŭ». Kali dziaŭčaty rassłabilisia i stracili pilnaść, Siarhiej zrabiŭ što? Ściahnuŭ z sumački adnoj ź ich 100 rubloŭ.
Nastupny raz Siarhieja złavili ŭ 2019‑m na tym, što jon zabraŭ čužy rovar z-pad praduktovaj kramy ŭ centry horada — haspadar u hety čas zakuplaŭsia ŭnutry. Doŭha šukać złodzieja ŭ nievialikaj Smarhoni nie pryjšłosia.
Škodu znoŭ acanili na tyja ž 100 rubloŭ, ale dla kałonii hetaha było małavata.
Mienš čym praz hod, u pačatku viasny 2020 hoda, Siarhiej pavysiŭ staŭki — sarvaŭ kavałkam armatury zamok z haraža ŭ dvary šmatkvaternaha doma. Adzinaje kaštoŭnaje, što akazałasia ŭnutry — nabor starych instrumientaŭ koštam 75 rubloŭ. Ivanova znoŭ złavili i znoŭ nie pasadzili, choć staraja sudzimaść pahašanaja nie była.
Na toj momant jaho ŭžo vyhnali z raboty hruzčykam u dziaržaŭnym ŽKH, bo — z adnaho boku — całkam vyjšaŭ z davieru, ź inšaha boku — taksama byli tajamničyja źniknieńni instrumientaŭ.
Bolš nikudy jaho nie brali, ale źlitavaŭsia zavod «Kranaspan», na jakim robiać vialikija draŭlanyja paneli, jakija adnamu čałavieku nie źnieści i nie pradać. Uziali hruzčykam.
Ale Siarhiej nie pakidaŭ idei chutka razbahacieć. Sa svaich kryminalnych pryhodaŭ jon vynies hałoŭnuju vysnovu — nielha kraści ŭ horadzie, bo jość śviedki i znojduć. Z hetaj dumkaj Siarhiej znajšoŭ idealnuju achviaru — dom na chutary Čorny Bor, u jakim nichto nie žyŭ. Staŭka sapraŭdy syhrała.
Ulezšy ŭ chatu, Ivanoŭ vynies adtul 9000 dalaraŭ, 700 jeŭra, 2 550 biełaruskich rubloŭ. Miarkujučy pa vypiscy z bazy FSAN, heta byli samyja vialikija hrošy ŭ žyćci Ivanova.
Ale radavaŭsia jon niadoŭha — jaho znoŭ złavili, pryjšłosia addavać.
Što adbyvałasia ŭ žyćci Ivanova ź leta 2021, my nie viedajem.
Ale fakt — u pačatku 2024 hoda jaho ŭžo pačali publična šukać svajaki. Historyja była byccam by ŭ tym, što Ivanoŭ źbiraŭsia viartacca na radzimu. Čym zajmaŭsia ŭ Rasii — nieviadoma.
Tak ci inačaj, u 2025‑m hodzie Siarhiej uspłyŭ u rasijskaj pieršaj tankavaj armii (v/č 61899, 27 AMSBR). Skidvaŭ svajakam i znajomym svaje fota ŭ vajennaj formie. Ale doŭha nie vajavaŭ — 5 kastryčnika 2025 hoda pajšoŭ na šturm u rajonie Kupianska, paśla čaho na suviaź nie vychodziŭ.
Što ź im zdaryłasia možna zrazumieć pa intaresach maci Siarhieja, Niny, u sacyjalnych sietkach: va «UKantakcie» jana čaściej za ŭsio naviedvaje kansultatyŭnuju supołku pa atrymańni mahilnych vypłat za zahinułych mužykoŭ.
Što viadoma pra viciebčuka, jakoha vinavaciać u sprobie padryvu samalota ŭ Hiermanii12
Kamientary