Kiroŭca vypadkova zapraviŭ poŭny bak, a ciapier choča viarnuć svaje hrošy. Ci maje jon racyju?
Praktyčna na ŭsich biełaruskich AZS vy spačatku płacicie za paliva i tolki zatym zapraŭlajeciesia. Adnak u sietcy «Hazpramnafta-Biełnaftapradukt» dziejničaje postapłata. Čytač vydańnia «Anłajnier» pra heta nie viedaŭ, i vypadkovaja zapraŭka poŭnaha baka abiarnułasia dla jaho niepradbačanymi vydatkami. Prosta tak pakidać heta mužčyna nie choča i ŭžo napisaŭ skarhu pa hetym vypadku.
«Dla mianie heta było šokam»
Aŭtaamatar raskazaŭ žurnalistu «Anłajniera», što ŭsio zdaryłasia 25 krasavika kala 15:00 na AZS «Hazpramnafta-Biełnaftapradukt» №24, raźmieščanaj na źniešnim kalcy MKAD u rajonie Malinaŭki.
«Padjechaŭ da kałonki, vyjšaŭ z aŭtamabila, ustaviŭ u lučok bienzabaka pistalet z 92‑m bienzinam, zacisnuŭ kurok i pajšoŭ u budynak AZS. Padychodžu da kasira, kažu: «Pieršaja kałonka, 92‑hi bienzin na 30 rubloŭ, kali łaska, zapraŭcie». A mnie adkazvajuć: «U vas užo na 105 rubloŭ i 40 kapiejek zapraŭlena».
Aŭtaamatar padkreślivaje, što płanavaŭ zapravicca tolki na 30 rubloŭ, na kartcy było tolki kala 50 rubloŭ.
«Mnie kasir kaža, što ŭ ich takaja aŭtamatyčnaja sistema, što spačatku zapraŭka, a potym apłata. I ŭ ich na zapraŭkach pra heta ŭsiudy napisana. Ja kažu: «Pačakajcie, ja hetaha nie bačyŭ». Zvyčajna, byvaje, visić tablička, što pistalet nie pracuje. Hetaha ničoha nie było. Usiu astatniuju infarmacyju ja ŭsprymaju jak rekłamu».
«U ich kałonki siniaha koleru. I hety infarmacyjny tekst, jon bieła-siniaha koleru — heta značyć, źlivajecca. Adna sprava, kali čałaviek viedaje: pahladzi tudy, pačytaj.
Jano niečytelna było. Ja na heta navat uvahi nie źviarnuŭ. Zvyčajna, kali chočuć danieści niejkuju važnuju infarmacyju, vyłučajuć tekst jarkimi kolerami, vialikim pamieram šryfta. Tam hetaha naohuł ničoha nie było.
Jany na zapraŭcy skazali, što ŭ ich užo hadoŭ z 10 pracuje hetaja sistema. Što spačatku zapraŭka, potym apłata. Ja ŭpieršyniu zajechaŭ na hetuju sietku. Pieršy raz z takim sutyknuŭsia. I mianie prosta šakuje toje, što nie dali prava vybaru».
Mužčyna kaža, što paśla taho, jak paprasiŭ dać jamu knihu zaŭvah i prapanoŭ, kasir patelefanavała načalniku AZS.
«Jon pačaŭ kazać, što na kožnaj kałoncy AZS jość infarmacyja, na što ja adkazaŭ, što ja hetaha nie bačyŭ, ničoha tam niečytelna. Potym jon skazaŭ, što ja vinavaty, što ja niapravilna karystajusia AZS, što ja ŭstaviŭ pistalet i zaščapiŭ [kurok], što tak nielha było rabić. Dalej ź im nie było pra što razmaŭlać».
Kab raspłacicca za paliva, mužčyna paprasiŭ siabra dasłać na kartu hrošy. Paśla hetaha jon patelefanavaŭ u tavarystva abarony pravoŭ spažyŭcoŭ, dzie apisaŭ situacyju, ź jakoj sutyknuŭsia.
«Mnie adrazu skazali, što tam jość parušeńnie, bo mnie nie dali prava vybaru, i skazali, što darma ja apłaciŭ [za ŭsio paliva — zaŭv. «Anłajniera»]. Ja zrabiŭ zapis u knizie skarhaŭ. Padyšoŭ jašče raz da kasira i skazaŭ, što ja apłaciŭ hetuju sumu, ale ja z hetym nie zhodny i ciapier patrabuju, kab mnie viarnuli hrošy, voś hetuju roźnicu [pamiž faktyčnym koštam zapraŭki 105,4 rubla i sumaj u 30 rubloŭ, na jakuju aŭtaamatar źbiraŭsia zapravicca — zaŭv. Onlíner] u 75,40 rubla. Albo kab hetaje paliva nazad źlili. Kasir mnie adkazała, što ŭ ich niama takich mahčymaściaŭ i jana hetaha rabić nie budzie».
«Niachaj pravodziać pravierku»
Mužčyna kaža, što patelefanavaŭ na haračuju liniju sietki AZS, apisaŭ usiu situacyju, papiaredziŭšy, što hetuju razmovu jon zapisvaje na dyktafon. Jamu paabiacali pieradać infarmacyju kiraŭnictvu i źviazacca ź im na praciahu troch pracoŭnych dzion.
Taksama čytač skazaŭ, što patelefanavaŭ u Ministerstva antymanapolnaha rehulavańnia i handlu (MARH), dzie jamu prapanavali napisać praz «obraŝienije.bieł» u Minski rajonny vykanaŭčy kamitet, što jon i maje namier zrabić.
«Va ŭsioj hetaj historyi, paŭtarusia, ja chaču raźbiralnictva, a taksama pakryćcia sumy ŭ 75,4 rubla. Liču, što mianie chitra naduryła AZS, — kaža mužčyna. — Ja patelefanavaŭ čatyrom znajomym, taksama kiroŭcam, raskazaŭ pra situacyju, pra taki sposab zapraŭki — nichto z takim nie sutykaŭsia, jany taksama ŭ šoku, pieršy raz čujuć, uvieś čas na AZS «Biełarusnafta», «Łukojł» ci «A-100» zapraŭlajucca.
Chaču, kab hetaja sietka AZS pryniała miery pa infarmavańni klijentaŭ: kab jarka, zaŭvažna, vialikim tekstam prapisvali ich sposab zapraŭki. Tamu što asabista mnie heta navat u vočy nie kinułasia, usia infarmacyja ŭsprymałasia jak śmiećcievy spam, rekłama. Ja ŭsiaho tolki chacieŭ zapravić svoj aŭtamabil na 30 rubloŭ, a nie da poŭnaha baka».
Praź niekalki dzion mužčyna dapoŭniŭ svaju infarmacyju. Jon paviedamiŭ, što ź im źviazaŭsia pa telefonie načalnik AZS.
«Telefanavaŭ jon mnie z nahody taho, što ja pytaŭsia proźviščy tych, z kim kamunikavaŭ, jon pradstaviŭsia, nazvaŭ usich, z kim ja razmaŭlaŭ, pahutaryli nakont hetaj usioj situacyi.
Spytaŭ mianie, čym jon moža dapamahčy. Ja adkazaŭ hetak ža: kampiensavać sumu albo niachaj źlivajuć toje paliva (roźnicu) z baka i hrošy viartajuć. I pryniać miery pa narmalnym infarmavańni ludziej.
Chaču adznačyć, što ŭ razmovie jon užo vietliva i akuratna sa mnoj razmaŭlaŭ, nie tak, jak pieršy raz. Prasiŭ prabačeńnia, ale ja skazaŭ, što nie prymaju takija prabačeńni. Jahonuju pazicyju ja taksama razumieju. 10 hadoŭ jak takaja sistema pracuje, jość ludzi, jakija pra heta viedajuć i karystajucca, i niama ŭ ich pytańniaŭ. Ale vyrašać budzie treci bok, kudy ja napisaŭ skarhu. Niachaj robiać pravierku».
Kamientaryj sietki AZS
Žurnalist «Anłajniera» źviarnuŭsia ŭ ZTAA «Hazpramnafta-Biełnaftapradukt» z prośbaj dać kamientaryj nakont apisanaj vyšej situacyi. Voś całkam jahony adkaz:
«Usie AZS sietki ŭ Minsku pracujuć pa sistemie postapłaty: spačatku zapraŭka, zatym apłata. Takaja aŭtamatyzavanaja technałohija pavyšaje chutkaść absłuhoŭvańnia i zapatrabavanaja siarod aŭtamabilistaŭ, jakija pryzvyčailisia aščadžać svoj čas i samastojna kantralavać praces zapraŭki.
Dla našych klijentaŭ na kožnaj PRK raźmieščanaja pakrokavaja instrukcyja, a taksama praviły zapraŭki. Dla zapraŭki da poŭnaha baka varta ŭstalavać razdatačny kran u bak aŭtamabila i nacisnuć ryčah — paliva zaljecca da adsiečki. Pry zapraŭcy na peŭnuju sumu abo litraž kiroŭcu nieabchodna spynić zapraŭku na patrebnaj sumie abo kolkaści, adcisnuŭšy ryčah, albo ŭvieści kolkaść litraŭ abo sumu zapraŭki na kłavijatury palivarazdatačnaj kałonki.
Pry samastojnaj zapraŭcy kantrol i adkaznaść za kolkaść paliva, jakoje pastupiła ŭ bak, niasie klijent. Viartańnie zapraŭlenaha paliva pa techničnych pryčynach niemahčymaje. Kali klijent nie maje nieabchodnaj sumy, jamu varta raśpiskaj paćvierdzić hatoŭnaść raźličycca, paśla čaho zrabić apłatu ŭ zručny dla jaho čas u sistemie ARIP».
Kamientaryj jurysta
«Paradak akazańnia pasłuh na AZS sietki ZTAA «Hazpramnafta-Biełnaftapradukt» rehłamientavany Praviłami pavodzin i zapraŭki klijentaŭ, aznajomicca ź jakimi možna na aficyjnym sajcie, — adznačaje jurystka Taćciana Ravinskaja.
— Zhodna z praviłami, kiroŭca moža vybrać zručny sposab apłaty: papiarednie (na kankretnuju sumu abo litraž) albo pa fakcie ździejśnienaha nalivu. Važna ŭličvać, što ŭ abodvuch vypadkach praces zapraŭki pavinien adbyvacca stroha ŭ prysutnaści kiroŭcy. Taksama vyznačany šerah zabaron (naprykład, zabaroniena vypuskać z ruk palivarazdatačny kran da zaviaršeńnia padačy paliva).
Hetaja infarmacyja, zhodna z zakanadaŭstvam, davodzicca da spažyŭcoŭ u dastupnaj formie: na infarmacyjnych stendach, elektronnych tabło, śpiecyjalnych papkach abo ŭ inšym miescy — jak paličyć patrebnym pradaviec. Pradstaŭnik kampanii, jak vynikaje ź jaho kamientaryja, paćviardžaje, što pakrokavyja instrukcyi raźmieščanyja niepasredna na kožnaj palivarazdatačnaj kałoncy (PRK).
U dačynieńni da situacyi, kali spažyviec ličyć, što infarmacyja ab praviłach była dadzienaja nie ŭ poŭnym abjomie abo ŭ niedastupnym miescy, Zakon ab abaronie pravoŭ spažyŭcoŭ daje jamu prava adstojvać svaje intaresy ŭ sudzie. Ale pry hetym važna razumieć, što vykanańnie pravił pradaŭca — heta pramy abaviazak klijenta pry atrymańni pasłuhi».
U Homieli ŭ dziaŭčyny zadymiłasia mašyna, a jana pryjechała na joj prosta da bienzakałonki VIDEA
U Litvu ŭpieršyniu nie puścili rejsavy aŭtobus ź Biełarusi praz novyja sankcyi
Jašče adzin aŭtobus nie puścili ź Biełarusi ŭ Litvu praz novyja sankcyi
Na aŭtazapraŭcy ŭ Biełarusi pačaŭ pracavać robat Cikavik
Z 4 krasavika ŭ Biełarusi padaražeje bienzin
Ciapier čytajuć
28‑hadovaha avijatara asudzili na 13 hadoŭ kałonii: «zdrada dziaržavie» za pierapisku z adnakurśnikami z USU16
28‑hadovaha avijatara asudzili na 13 hadoŭ kałonii: «zdrada dziaržavie» za pierapisku z adnakurśnikami z USU
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»1010
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»10
Niebaraka ź Lachavičaŭ źnik «na SVA» ŭžo na treci dzień, a ŭ baraćbie za hrabavyja sčapilisia siastra, sužycielka i žonka — z čatyrma dziećmi, ale čužymi88
Kamientary
Addaŭ by siabru tyja hrošy pazyčanyja - dy i ŭsio narešcie. A na budučyniu zapomniŭ by, što na hetaj zapraŭcy voś tak, i na jaje bolš nie jeździŭ by navat pryncypova, kali sistema nie padabajecca. A hetyja razborki na pustym miescy navošta?
Tym bolš što vidavočna ž, što kali nadpis pry kałoncy jość, a ty na jaho nie źviarnuŭ uvahu, to heta tvaje prablemy. Toje, što jon, maŭlaŭ, nie vielmi kidajecca ŭ vočy - heta ŭsio subjektyŭna. Inšamu i mietrovymi litarami napišy - taksama nie zaŭvažyć.
Prosta voś jość ludzi takija zvadnyja - jany kajf atrymlivajuć, skandalačy navat z-za drabiazy.