Adzin z najbujniejšych biełaruskich vytvorcaŭ śvininy pajšoŭ u bankructva
Adzin z najbujniejšych vytvorcaŭ śvininy ŭ Biełarusi — kampanija «Danprad» — apynuŭsia ŭ ciažkim finansavym stanoviščy i sam źviarnuŭsia ŭ sud z zajavaj ab bankructvie. Jaho sprava ciapier razhladajecca ŭ ekanamičnym sudzie Minskaj vobłaści, piša Office Life.
Pavodle aficyjnych dakumientaŭ, ahulnaja suma daŭhoŭ pradpryjemstva dasiahaje amal 117 miljonaŭ rubloŭ, što značna pieravyšaje jaho mahčymaści raźličycca z kredytorami.
Hetaje pradpryjemstva kaliści ličyłasia adnym z samych ambicyjnych ahrarnych prajektaŭ u krainie. Jašče ŭ 2015 hodzie jano vyjšła na prajektnuju mahutnaść: u Vałožynskim rajonie byŭ pabudavany bujny śvinahadoŭčy kompleks, raźličany prykładna na 110 tysiač hałoŭ śviniej na hod. Abjomy vytvorčaści pavinny byli składać kala 11 tysiač ton miasa ŭ žyvoj vazie.
Prajekt kaštavaŭ vielmi doraha — bolš za 400 miljardaŭ tahačasnych rubloŭ — i realizoŭvaŭsia z udziełam zamiežnych inviestaraŭ, u tym liku z Kipra i Danii. U finansavańni ŭdzielničała taksama viadomaja biełaruskaja kampanija «Trajpł», što naležała ciapier apalnamu, a tady favaryzavanamu Łukašenkam biznesmienu Juryju Čyžu. Pierad joj u «Danprada» nazapasiŭsia značny doŭh — bolš za 40 miljonaŭ rubloŭ.
Pieršapačatkova płanavałasia, što amal usia pradukcyja pradpryjemstva — da 97 pracentaŭ — budzie pastaŭlacca na ekspart. Adnak ź ciaham času ekanamičnyja ŭmovy źmianilisia, i «Danprad» straciŭ zdolnaść stabilna pracavać i atrymlivać prybytak. Na siońnia jaho aktyvy aceńvajucca ŭsiaho prykładna na 14,5 miljona rubloŭ, što ŭ razy mienš za sumu zapazyčanaści. Pry hetym štat skaraciŭsia da minimumu — usiaho vosiem čałaviek.
Situacyja ŭskładniajecca tym, što ŭ hetym siezonie pradpryjemstva faktyčna nie viało sielskahaspadarčuju dziejnaść, tamu nie maje krynic dachodu. U suviazi z hetym sud pryjšoŭ da vysnovy, što kampanija nie zdoleje adnavić płaciežazdolnaść i vypłacić pazyki. U dačynieńni da jaje ŭžo raspačataja konkursnaja vytvorčaść — heta pracedura, jakaja praduhledžvaje prodaž majomaści dla raźlikaŭ z kredytorami.
Kančatkovaje rašeńnie adnosna losu kampanii pavinna być pryniata 27 žniŭnia. Adnak užo ciapier jość vysokaja vierahodnaść taho, što «Danprad» budzie pryznany bankrutam i likvidavany, što aznačaje poŭnaje spynieńnie jaho dziejnaści.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy19
Kamientary