Ukrainski vajskovy ekśpiert nazvaŭ małavierahodnym nastup ź Biełarusi
Pahroza pramoha nastupu małavierahodnaja, adnak inšy scenar całkam realny.
Paŭnočnaja pryhraničnaja zona Ukrainy dastatkova dobra ŭmacavanaja, tamu maštabny nastup praciŭnika małavierahodny, chacia ŭdary pa pryhraničnych rehijonach abo roznyja dyviersijnyja dziejańni z metaj skoŭvańnia ŭkrainskich sił vyklučać nielha, ličyć vajenny ekśpiert Pavieł Narožny, piša LRT.
«Pierš za ŭsio, na hetym učastku, jaki znachodzicca vielmi blizka da Kijeva, jość dźvie raki. Na adnym adrezku miaža prachodzić na ŭschod uzdoŭž Dniapra. Na inšym učastku, na zachadzie, — uzdoŭž raki Prypiać, krychu na poŭnač (…) Kali b na hetym bližejšym učastku pravodziŭsia nastup, pryjšłosia b farsiravać raku. Farsiravańnie rek — nadzvyčaj składanaja vajennaja zadača, źviazanaja ź vialikimi stratami», — skazaŭ jon.
Akramia taho, pavodle jaho słoŭ, na poŭnačy Ukrainy šmat azior, nievialikich rek, bałot i vielmi mała daroh.
«Usie hetyja darohi zaminiravanyja, tam ustanoŭleny inžyniernyja ŭmacavańni (…) Tamu prosta prajści praz hetuju terytoryju nie atrymajecca. Uzdoŭž usioj miažy pabudavany davoli surjoznyja ŭmacavańni», — padkreśliŭ Narožny.
Na jaho dumku, pahroza pramoha nastupu małavierahodnaja, adnak inšy scenar — kancentracyja vojskaŭ — całkam realny. Rasija mahła b raźmiaścić kala 50—60 tysiač vajskoŭcaŭ, i Ukraina nie zmahła b ihnaravać takuju situacyju.
«Nam daviałosia b pierakidvać tudy siły ź inšych učastkaŭ frontu. Inakš kažučy, heta prosta źviazała b našy vojski. Jany b stajali tam, i my b taksama stajali tam, u toj čas jak aktyŭnyja bajavyja dziejańni mahli b iści na inšych učastkach frontu», — patłumačyŭ ekśpiert.
Pry hetym praciŭnik moh by prybiehnuć da abstrełaŭ pryhraničnych rajonaŭ, «kab Ukraina była vymušana reahavać evakuacyjaj ludziej, pierakidkaj palicyi, techniki i praviadzieńniem abarončych mierapryjemstvaŭ», dadaŭ jon.
Pavodle słoŭ Narožnaha, treci scenar praduhledžvaje vykarystańnie dyviersijna-raźviedvalnych hrup.
«Jany pierasiakajuć miažu (…) tam jość lasy i bałoty, tearetyčna jany mohuć znajści jakoje-niebudź słaboje miesca. My nie zmahli b heta ihnaravać. Heta aznačała b pierakidku dadatkovych sił ź inšych učastkaŭ frontu i ŭzmacnieńnie padraździaleńniaŭ, raźmieščanych tam, što pryviało b da surjoznaha raspyleńnia armii», — rastłumačyŭ ekśpiert.
Jon taksama adznačyŭ, što jašče adzin vierahodny scenar — uvarvańnie paraŭnalna nievialikich padraździaleńniaŭ praciŭnika ŭ asobnyja rajony.
«Jany mahli b nakiravać tudy niekalki tysiač vajskoŭcaŭ i pačać bajavyja dziejańni niedaloka ad ukrainskaj miažy, i na heta znoŭ daviałosia b reahavać. My razumiejem, jakoje ŭ hety čas było b infarmacyjnaje asiarodździe — śćviardžałasia b, što «ź Biełarusi pačynajecca nastupleńnie», bo jany chacieli b vyklikać paniku ŭ Kijevie i inšych ukrainskich haradach», — patłumačyŭ Narožny i dadaŭ, što Rasija całkam łahična sprabuje ŭciahnuć Alaksandra Łukašenku ŭ vajnu. «Adnak pakul my bačym, što Łukašenka supraciŭlajecca i robić usio mahčymaje, kab hetaha nie adbyłosia», — dadaŭ jon.
Ciapier čytajuć
Kala Safii ŭ Połacku pastavili pomnik lotčykam Ničyparčyku i Kukanienku. Ale navat nie samalot toj madeli, na jakoj jany zahinuli, a aerapłan stalinskaha času2020
Kamientary