Biełaruska źlotała na Maldyvy i viarnułasia z zapazyčanaściu amal 18 000 rubloŭ
Dziaŭčyna ŭ sakaviku 2026‑ha adpraviłasia ŭ adpačynak na Maldyŭskija astravy. Jak śćviardžaje biełaruska, padčas adpačynku jana adklučyła na svaim smartfonie mabilny internet praź vidžet, adnak telefon usio adno padklučyŭsia praź biełaruskuju sim-kartu da miascovaj sietki, što abiarnułasia zapazyčanaściu na 17 840 rubloŭ, piša «Anłajnier».
«Pavodle słoŭ apieratara, mabyć, u mianie niedzie ŭ hateli źlacieŭ vaj-faj i padklučyŭsia mabilny internet», — raskazvaje dziaŭčyna.
Zhodna ź infarmacyjaj na sajcie apieratara MTS, 1 Mb danych praz mabilny internet u roŭminhu na Maldyvach kaštuje 97,75 rubla. Takim čynam, za krychu bolš čym 180 Mb abanientcy naličyli amal 18 000 rubloŭ.
Biełaruska źviarnułasia da apieratara z prośbaj pierahladzieć zapazyčanaść, ale raźbiralnictva zaciahnułasia, bo numar pieršapačatkova byŭ zarehistravany na baćku dziaŭčyny. Pry hetym, pavodle słoŭ čytački, uvieś hety čas zapazyčanaść pavialičvałasia, bo adbyvalisia śpisańni za bieźlimit zvankoŭ, trafik i prymusovaje błakavańnie.
U vyniku dziaŭčynie ŭdałosia dabicca aficyjnaha adkazu ad MTS, u jakim apieratar paviedamiŭ:
«Naličeńni i śpisańni hrašovych srodkaŭ z asabovaha rachunku rabilisia abhruntavana, za faktyčna akazanyja pasłuhi ŭ adpaviednaści z Damovaj, taryfami na absłuhoŭvańnie ŭ režymie roŭminhu i infarmacyjaj, dadzienaj roŭminh-partnioram Ooredoo Maldives.
Razam z tym, prytrymlivajučysia pryniataj u MTS kancepcyi maksimalnaj adpaviednaści čakańniam abanienta, suma naličeńniaŭ za razhladanyja pasłuhi pieradačy danych pamienšanaja. Suma viartańnia składaje 15 988,43 rub.».
Takim čynam, biełaruska zastałasia vinavataja apierataru 1780 rubloŭ.
Taksama apieratar u liście-adkazie papiaredžvaje:
«Padklučeńnie abstalavańnia, jakoje vykarystoŭvajecca, da sietki Wi-Fi nie błakiruje pieradaču danych u sietcy apieratara sotavaj suviazi. Kali adnačasova dastupnyja złučeńni Wi-Fi i mabilnaj pieradačy danych, telefon vykarystoŭvaje złučeńnie Wi-Fi, ale kali sietka Wi-Fi adklučajecca (stračvajecca), to pieradača danych idzie praz mabilny internet».
«Heta była mara ŭsiaho majho žyćcia». Biełaruska palacieła na Maldyvy i nie moža viarnucca dadomu
Znajšli cieły italjanskich dajvieraŭ, jakija źnikli na Maldyvach
Tanny anałah Jehipta. Biełaruska raskazała, jak adpačyła ŭ Kambodžy
U Biełarusi abmiažoŭvajuć chutkaść mabilnaha internetu. A jakija ceny i ŭmovy ŭ Polščy i Litvie?
Ciapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary
vynuła by biełorusskuju simku jeŝie v aeroportu Minska, i polzovałaś by Travel eSIM
[Zredahavana]